በሊቢያ ቤንጋዚ አካባቢ ያሉ ወገኖቻችንን ወደ ግብድ ለመዉሰድ ታስቧል። እርሱ ላይ ችግር የለም። በትሪፖሊ/ሚስራታ ያሉትን ግን በሱዳን በኩል ለመዉሰድ ነው ኢሕአዴግ እየሰራ ያለው። ይሄ በጣም አደገኛ ነው። እዚህ ላይ ወገኖቻችን በሱዳን በኩል እንዲወጡ ቢደረግ 100% አይሰስ ይይዛቸዋል ማለት አይደለም። ምናልባት በወታደራዊ ኮንቮይ ታጅበው ይሆናል ለማስወጣት የታሰበው። ቢሆንም ትልቅ ሪስክ ነው እየተወሰደ ያለው።


አንደኛ ከዚህ በፊት በአይሰስ የተገደሉት ወገኖቻችን ከሱዳን ወደ ትሪፖሊ ሲጓዙ ነው የተያዙት። ያለዉን ሁኔታ ለመረዳት የተያያዘውን ማኦ ይመለክቱ። አሁን ደጎም ከትሪፖሊ ወደ ሱዳን መጓዝ፣ ያለ ምንም ጥርጥር ወገኖቻችንን አደጋ ላይ የሚጠል መታሰብ ያልነበረበት ነው።
ከትሪፖሊ ሱዳን ያለው ጉዞ በመኪና ቢያንስ አራት፣ አምስት ቀን የሚፈጅ ነው። እጅግ እጣም በረሃማ በሆነ ቦታ የሚያልፍ ነው። ወደ ሁለት ሺህ ኪሎሜትር ይርቃል። የሁለት ሰዓት ተኩል መንገድ የሚፈጅና ከ300 ኪሎሜተር በታች የምትረቀዋ ቱኒዚያ እያለች ወደ ሱዳን መታሰቡ በጣም አሳዛኝ ነው።

ራዲዮ ፋና የሚከተለዉን ነው ያሰፈረው

“ቤንጋዚ የሚገኙ ኢትዮጵያውያንን በግብፅ በኩል እና በትሪፖሊ ያሉትን ደግሞ በሱዳን በኩል ወደ አገራቸው ለመመለስ ነው ጥረት እየተደረገ ያለው።በግብፅ የሚገኘው የኢትዮጵያ ኢምባሲ እንዳስታወቀው 200 የሚሆኑ በሊቢያ የሚገኙ ኢትዮጵያውያን ወደ አገራቸው ለመመለስ ተመዝግበዋል።”
ዶር ቴድሮስና ጨመሮ ከፍተኛ የኢሕአዴግ ባለስልጣናት ወንድም ወይም እህት ሊቢያ ቢኖሩ ነው፣ ባለስልጣናቱ በሱዳን ሊያወጧቸው ይሞክሩ ነበር ወይ ? በመሐል አይሰስ ሊኖር በሚችልበት ቦታ በመዉሰድ ለአደጋ እንዲጋለጡ ያደርጉ ነበር ወይ ? በጭራሽ አያደረጉትም ነበር።
እንግዲህ በአገር ዉስጥና ከአገር ዉጭ ያለን ኢትዮጵያዉያን በዚህ ረገድ በጣም ድምጻችንን ማሰማት አለብን። ወገኖቻችን ሲሞቱ ብቻ ማዘን አይደለም። ዳግም ኢትዮጵያዊያን የአይሰስ ሰላባ እንዳይሆኑ መድከም፣ መጣር፣ መጮህ ፣ የድርሻችንን ማድረግ አለብን።
አንዴት ነው ልንረዳ የምንችለው ፡

1) ይሄንን መረጃ ሼር እናደርግ። ኢሕአዴግ ምን እያሰበ እንዳለ፣ ያለዉን አደጋ ለህዝብ እናሳወቅ። ሕዝባዊ ሞቢላይዜሽን ያስፈልጋል። በኢሜል፣ በኤስ.ኤም.ኤስ፣ በቫይበር፣ በስካፕይ፣ ተዊተር …ኢሕአዴግ ወገኖቻችን ለአደጋ አጋልጦ በሱዳን በኩል ሊያስወጣ እንዳሰባ እናሳወቅ።
2) ዶር ቴድሮስ የፌስ ቡክ ገጽ አላቸው። ብዙዉን ጊዜ እዚያ ላይ ሳያጠፉ አይቀርም። ስለዚህ በፌስቡክ ገጻቸው በመሄድ በሺሆች የምንቆጠር «ወገኖቻችን በሱዳን በኩል በመዉሰድ ለአደጋ እንዳታጋልጡ። ከወሰዳቹሃቸው በቱኒዚያ በኩል አስወጧቸው» ብለን አስተያየት እንስጥ።
አንዳንዶች እነርሱ የበለጠ ጉዳዩን ያወቁታል የሚል መከራከሪያ ሊያቀርቡ ይችላሉ። ማንም ኢትዮጵያዉ ካርታውን አይቶ መፍረድ ይችላላል። ማንም በርግጥ የሚሻለዉና የሚመረጠው በቱኒዚያ በኩል እንዲወጡ ማድረግ እንደሆነ ማየት አያቅተዉም።
አንዳንዶቻችን ላይክ፣ ሼር ለማድረግና አስተያየት ለመስጠት እንኳን የምንፈራ አለን። የድርሻችንን ለመወጣት እንፈልጋለን ግን በፍርሃት ታስረናል። ወያኔዎች አይተው ከሥራ ያባርሩናል፣ ያስሩናል ብለን እንሰጋለን። ዉጭ አገር ያለን ደግሞ፣ ወያኔዎች አገር ቤት ያለንን ቤትም ሆነ ቢዝነስ የሚወስዱብን ይመስለናል። በቃ በአደገኛ ፍርሃት ተተብትበናል።

አንዳንዶቻችን ደግሞ የፍርሃት ችግር የለብንም፣ ግን ምንም ለዉጥ የማናመጣ ይመስለናል። የሚሆነውን አይተን፣ አንብበን፣ ተናደን ፣ ተስፋ ቆርጠን እንተወዋለን። ገና ምንም ለማድረግ ሳንነሳ ራሳችንን በራሳችን እናሸንፈዋለን።
ግን አንድ ነገር ልጠይቅ «እነዚህ ወገኖቻችን የስጋ ወንድሞቻችን እና እህቶቻችን ቢሆኑ ኖር ፣ በሱዳን በኩል ኢሕአዴግ ለአደጋ ሊያጋልጣቸው ሲሞክር፣ ፈርተን ወይንም ተስፋ ቆርጠን ዝም እንል ነበር ወይ ? እንግዲህ ከሕሊናችን ጋር እንነጋገር፤፡ ከተሰማን፣ ካዘንን፣ ወገኖቻችን የኛው ናቸው ካልን፣ እንቀሳቀስ። አንድ ተብሎ ነው ወደ ሁለት የሚኬደው። ድምጻችንን ፣ ተቃዉሟችንን እናሰማ።

ከሁለት ሳምንታት በኋላ ምርጫ ይደረጋል። ሆኖም ከምርጫው በፊት ኢሕአዴግ እንዳሸንፈ ምርጫ ቦርድ በድህረ ገጹ ላይ ባስቀመጠው ሰነድ አሳወቀ።

አርባ ሰባት የሚሆኑ ድርጅቶች እንደሚካፈሉ ምርጫ ቦርድ በድህረ ገጹ ላይ ይፋ ያደረገ ሲሆን አርባ አምስት የሚሆኑት ለፌዴራል ፓርላማ ተወዳዳሪዎች አሰልፈዋል።

መንግስት ለመቆጣጠር አንድ ድርጅት 274 የፓርላማ መቀመጫዎችን ማሸነፍ ይጠበቅበታል። ምርጫ ቦርድ ባሰፈረው ሪፖርት መሰረት፣ ኢሕአዴግ ለ501 የፓርላማ መቀመጫዎች ተወዳዳሪዎች ያሰለፈ ሲሆን (በደቡብ ክልል፣ በአማራዉ ክልል፣ በትግራይ እና በአዲስ አበባ በሙሉ) ፣ በሌሎች ክልሎችም የራሱ አጋር ደርጅቶች በስፋት እንዲወዳደሩ አድርጓል። (በነገራችን ላይ መድረክ በአማራው ክልል ዜሮ ተወዳዳሪዎችን ነው ያሰለፈው)

በመቀጠል በሰንጠረዡ የተቀመጠው መድረክ ነው። መድረክ 270 እጩዎችን ብቻ ነው ያሰለፈው። ሁሉንም መቀመጫዎች ቢያሸንፍ እንኳን፣ መድረክ መንግስት የመሆን እድል የለውም። 165 መቀመጫ ብቻ ያሰለፈው ኢዴፓም እንደዚሁ። ስለዚህ በሂሳቡ ስሌት መሰረት ( ማቴማቲካሊ) ምርጫዉን ኢሕአዴግ እንዳሸነፈ ምርጫ ቦርድ ከወዲሁ አረጋግጧል ማለት ነው።

የሰማያዊ ፓርቲ 139 የፓርላማ ተወዳዳሪዎችን ብቻ ያሰለፈ ሲሆን፣ በአየለ ጫሚሶ የሚመራው ቡድን 108 ተወዳዳሪዎችን አሰልፏል።
በአቶ በላይ ፍቃዱ የሚመራው አንድነት፣ ከ500 በላይ የፓርላማ ተወዳዳሪዎች ለማሰለፍ ተዘጋጅቶ እንደነበረ ይታወቃል። ሆኖም ምርጫ ቦርድ ከሕወሃት የተሰጠውን የፖለቲካ ዉሳኔ በመቀበል፣ በትግስቱ አወሉ የሚመራ ተለጣፊ አንድነትን በመመስረት፣ ጠንካራዉን ድርጅት፣ ሕጋዊ እውቅና በመንጠቅ ከጨዋታ ዉጭ አድርጓል። አሁን ተለጣፊው (ድንኩ) አንድነት 92 ተወዳዳሪዎች ብቻ ነው ያሰለፈው።

ለምርጫዉ ቅስቀስ ምርጫ ቦርድ ከመደበው ገንዘብ 15 ሚሊዮን ብር የሚሆን ለኢሕአዴግ ሲሰጥ፣ ለ 270 መቀመጫዎች ተወዳዳሪዎችን ላሰለፈው መድረክ፣ 2 ሚሊዮን ብር፣ ለ165 እና ለ139 መቀመጫዎች ተወዳዳሪዎች ላሰለፉት ኢዴፓና ሰማያዊ ወደ ስምንት መቶ ሺህ ብር የተመደበላቸው ተመድቦላቸዋል። ለትግስቱ አወሉ ቡድን ግማሽ ሚሊዮን ብር ተፈቅዶለታል።

አንድ የፓርላማ ተወዳዳሪ ብቻ ያሰለፉ ድርጅቶች ወደ አምሳ ሶስት ሺህ ብር ድጋፍ ከምርጫ ቦርድ አግኝተዋል ። ለምሳሌ የኢትዮጵያ ብሄራዊ አንድነት ፓርቲ እና የሶዶ ጎርዳና ህዝቦች ፓርት እያንዳንዳቸው አንድ የፓርላማ ተወዳዳሪ ብቻ ያሰለፉ ሲሆን ፣ እያንዳንዳቸው 53 790 ብር ተችረዋል። የመላው ኢትዮጵያ ዴሞክራቲክ ፓርቲ 2 ተወዳዳሪዎች ብቻ ሲያሰለፍ፣ ወደ 55875 ብር ተለግሰዋል።

የምርጫው ሂደት በርግጥ ትልቅ ዘረፋ የሚደረግበት፣ ፓርቲ በማቋቋም ጥቅም የሚገኝበት ቢዝነስ እንደሆነ፣ የምርጫ ቦርድ የገንዘብ ድጋፍ ቀመር በገሃድ ያመላከተበት ሁኔታ ነው።

ከአራባ ሰባት ለምርጫ ተወዳዳሪዎች ካሰለፉ ፓርቲዎች መካከል 83 በመቶ የሚሆኑት ስ9 ድርጅቶች ከ20 በታች ተወዳዳሪዎችን ነው ለፓርላም ያሰለፉት። ሃያ ሰባት ድርጅቶች ( 57% ) ከአሥር በታች፣ ሃያ ድርጅቶች ደግሞ (42% ) ከአምስት በታች ነው ለፓርላማ ተወዳዳሪዎች ያሰለፉት። ይሄም ብዙ ፓርቲዎች አሉ የሚባለው ከገዢው ፓርቲ የሚነዛው ፕሮፖጋንዳና መከርከሮያ ምን ያህል ባዶና እንደሆነ የሚያሳይ ነው።
ይሄንን መረጃ ሼር በማድረግ ያሰራጩ። መረጃ ኃይል ነው።

http://www.electionethiopia.org

ለማንበብ እዚህ ይጫኑ

የዙሉ አክራሪዎች በኢትዮጵያዉያን እና ሌሎች የአፍሪካ ዜጎችን ላይ ኢሰብዓዊ ጥቃት በሚፈጽሙበት ጊዜ፣ እንደ ናይጄሪያ ያሉ አገሮች በዙማ መንግስት ላይ ጠንካራ አቋም ወሰዱ። ዙማ ተጽኖ ሲበረታባቸው፣ አስቸኳይ እርምጃዎች ለመዉሰድና ነገሮችን ለማረጋጋት ተገደዱ። ከነናይጄሪያ በደረሰው ግፊትና ጫና በደቡብ አፍሪካ ያለው ሁኔታ ለጊዜውም ቢሆን መረጋጋት ታየበት። በዚሁ ሁሉ ግን ሕወሃት/ኢሕአዴጎች የተከሰተዉን ቀውስ አሳንሰው በማቅረብ፣ ለኢትዮጵያዉያን ጥብቅና የቆሙ ሳይሆን፣ የዙማ ቃላ አቀባይ ነበር የመሰሉት።

ብዙም አልቆየም፣ እሁድ ሚያዚያ 11 ቀን በሊቢያ ወገኖቻችን አንገታቸው ተቀላ። ኢትዮጵያ በትልቅ ሐዘን ተመታች። የዚያኑ ቀን ቢቢስ፣ አል ጃዚራ፣ ሲ.ኤን.ኤን የመሳሰሉ ታላላቅ ሜዲያዎች ኢትዮጵያዉያን ክርስቲያኖች እንደተገደሉ መዘገብ ጀመሩ። ሰኞ ሚያዚያ 12 ቀን የአሜሪካ መንግስት በይፋ ለኢትዮጵያ ህዝብ እና ለሕወሃት/ኢሕአዴግ የሐዘን መግለጫ አቀረበ። ሆኖም ሕወሃት/ኢሕአዴግ ዜናውን አሳንሶ በማቅረብ፣ እንደ ሶስተኛ ተራ ዜና «በሊቢያ ስደተኞች በአይሰስ ተገደሉ። አንዳንድ ሜዲያዎች ኢትዮጵያዉይን ናቸው ይላሉ። ግን ኢትዮጵያዊ ስለመሆናቸው ምንም አይነት ማረጋገጫ የለም» ሲል ኢትዮጱያዉያን መሆናቸውን በኢቢሲ/ኢቲቪ ካደ። የሚያስብና የሚጨነቅ መንግስት እንደሌለ በመገለጽ ሕዝቡ በራሱ አነሳሽነት ተቃዉሞዉን እና ሐዘኑን፣ ሀሙስ ሚያዚያ 15 ቀን እንዲገልጽ የሐዘን እና የተቃዉሞ ቀን በሚል፣ በሶሻል ሜዲያ ዘመቻዎች ተከፈቱ።ሰልፎችና የሥራ ማቆም አድማዎች ተጠሩ።

በነጋታው ማክሰኞ ሚያዚያ 13 ቀን ከሶሻል ሜዲያ ፎቶዎችን በማየት ልጆቻቸው እንደሞቱ ያረጋገጡ ወላጆች፣ በጨርቆስ አካባቢ ድንኳን ጣሉ። ያኔ በጨርቆስ ያሉ ሰላዮች መረጃዎች ለጌቶቻቸው አቀረቡ። ብዙም አልቆየም ሰበር ዜና ብሎ፣ ኢቢሲ/ኢቲቪ የተገደሉት ኢትዮጵያዉይን መሆናቸውን ፣ ፓርላማው በነጋታው ተሰብስቦ የሶስት ቀን የሐዘን ቀን እንደሚያወጅ ገለጸ። የዚያኑ ቀን በጨርቆስና ሌሎች በርካታ ቦታዎች፣ ሐሙስን ሳይጠበቁ፣ የተለያዩ የተቃዉሞና የሐዘን ሰልፎች ተደረጉ።

ሕወሃት/ኢሕአዴግ የሐሙስን ሰልፍ ለማጨናገፍ ሲል፣ ቀድሞ፣ ረእቡ ሚያዚያ 14 ቀን ሰልፍ ጠራ። በሰልፉ ህዝቡ ሐዘኑን ገለጸ። ተቃዉሞዉን አሰማ። ሆኖም ዜጎች በአደባባይ በግፍና በጭካኔ ተደበደቡ። ከአንድ ሺህ በላይ ታሰሩ። በሰልፉ ወቅት «እኛን ከምትደበድብ፣ አይሰስን ደብድቡ» ነበር ያላቸው። ሆኖ ሕወአት/ኢሕአዴጎቭ አይሰስ ላይ ሳይሆን ጡንቻዉን ሰላማዊ ዜጎች ላይ አሳዩ። ሴቶች ሁሉ ሳይቀሩ ተደበደቡ።

ሕወሃት/ኢሕአደግ አገር ቤት ያሉትን በማሰርና በመደብደብ ተጠምዶ ባለበት ሁኔታ፣ በሊቢያ ቁጥራቸው እጅግ በጣም በርካታ የሆኑ ኢትዮጵያዉያን ችግር ላይ እንዳሉ በኢሳትና በአሜሪካን ድምጽ ራዲዮ መስማት ጀመርን። ሕወሃት/ኢሕአዴግ፣ ግብጽ ባሉት አምባሳደሩ በኩል «በሊቢያ በአይሰስ እጅ ዉስጥ የገቡ ኢትዮጵያዉይስን የሉም። በሊቢያ ያለውም ሁኔታ በአንጻራዊነት ሰላም ነው» በሚል ለጉዳዩ ክብደት ሳይሰጡበት ቀረ። ሕወሃት/ኢሕአዴግ ፣ ከወዲሁ የዉሸት የሆነው ምርጫ ላይ እና አገር ቤት ያሉ ሰላማዊ ዜጎችን ማሳደዱ ላይ ጊዜና ጉልበት ማጥፋቱን ቀጠለ።

በዚህ መሐል ከሁለት ሳምንታት በኋላ ፣ የግብጽ ወታደሮች ወደ ሰላሳ የሚሆኑ ኢትዮጵያዉይንን ከአይሰስ እጅ ነጻ እንዳወጡ ተዘገበ። ኢትዮጵያዉያኑ ከሊቢያ ወደ ግብጽ ሲመጡም ፕሬዘዳንት አሲሲን ጨምሮ በርካታ የግብጽ ባለስልጣናት አቀባበል አደረጉላቸው። ኢትዮጵያውያኑ፣ መንግስታቸው ረስቷቸው፣ በግብጽ መንግስት እርዳታ ከሞት አመለጡ።

የዉጭ ጉዳይ ሚኒስትሩ ዶር ቴድሮስ አዳኖም ኢትዮጵያዉይን ከሊቢያ ወደ ኢትዮጵያ እየመጡ እንደሆነ በመናገር መንግስታቸው ጥረቱን እንደሚቀጥል በፌስ ቡካቸው ገልጸዋል። ሆኖም ሮይተርስ ፣ ኢትዮጵያዊያንን የማስወጣቱ ሥራ 100% በግብጽ እንደተሰራ ነው ያሳወቀው። በዘገባው ምንም አይነት የኢትዮጱያ መንግስት አስተዋጾ እንዳለ የገለጸበት ሁኔታ የለም። ኢትዮጵያዊያንን ይዞ የመጣውም አይሮፕላን የኢትዮጵያ አየር መንገድ አይሮፕላን ሲሆን፣ ኢትዮጵያዉያኑንም ለመቀበል ዶር ቴዶርስም ሆነ ሌሎች የኢትዮጵያ ከፍተኛ ባልስልጣን አልተገኙም።

እዉነቱ እንደዚያ ሆኖ፣ ሕወሃት/ኢሕአዴግ ፣ በማጭበርበር ፖለቲካ የተካነ እንደመሆኑ፣ ጅብ ከሄደ ዉሻ ጮኸ እንደሚባለው፣ «ዜጎቼን ከሊቢያ አወጣሁ» የሚል የፕሮፖጋንዳ ዘመቻ ሊያደርግ እንደሚችልም ይገመታል።

ኢትዮጵያዉያኑ ከቤንጋዚ አካባቢ መምጣታቸው ለኢትዮጵያዉያን ሁሉ ትልቅ አስደሳች ዜናና የጸሎታችን መልስ ቢሆንም፣ አሁን በተለይም በትሪፖሊና በሚስራታ አካባቢ እጅግ በጣም በርካታ ኢትዮጵያዉያን አሉ።ትሪፖሊና ቤንጋዚን የሚቆጣጠረው ኃይል፣ ቤንጋዚን እንደሚቆጣጠረው ኃይል ከግብጽ ጋር ወዳጅነት ያለው ኃይል አይደለም። ይህ ዜና አስደሳች ቢሆንም ከፊታችን ገና ብዙ ይጠብቀናል። ላመለጡ ወገኖቻችን ጌታን እያመሰገንን፣ ገና አደጋ ላይ ላሉት ጸሎታችንን አናቋርጥ። እግዚአብሄር ጸሎትን ይሰማል። ግብጾች በዚህ መልኩ ይረዱናል ብሎ ማን ጠበቀ ?

ኢትዮጵያዉይን ግብጾችና ናይጄሪያኖች ሁልግዜ ይቆሙልናል ብለን መጠበቅ የለበንም። አሁን ስልጣን ላይ ያለው አገዛዝ ህዝብን የሚያሸብር ሳይሆን፣ ሕዝብን የሚያገለግልና ለሕዝብ የቆመ እንዲሆን ለማድረግ ግፊታችንን ከመቼዉም ጊዘ እየበለጠ ፣ማጠናከር አለብን። በተቃዋሚ ጎራ ያለነውም ከስልጣን እና መርዛማ ከሆነው የድርጅት ፍቅር ተላቀን፣ በአገራችን ለዉጥ እንዲመጣ መሰባሰብ አለብን። አሁን ካልተነሳን መቼ ? እኛ ካልተነሳን ማን ?

(በነገራችን ላይ ህወሃት/ኢሕአዴግ የተወሰኑትን ከግብጽ ወደ አዲስ አበባ እንዲመጡ አድርጓል። ለዚህ ምስጋና ካስፈለጋቸው መስጠት ይቻላል)

የሚኒሊክ ሳልሳዊ የሳምንቱ መልዕክት :- በራሳችን ላይ ያለውን ጉድፍ ማየት ሳንችል በሌሎች ላይ ጥፋት የምንደርት ከሆነ ፍፃሜያችን አያምርም፡፡

የፌስቡክ አርበኛው ቴድሮስ አድሃኖም ቦሌ ሄደው ከሊብያ ነጻ የወጡ ዜጎችን ሲቀበሉ አየን። እፊታቸው ላይ የማፈር ሳይሆን የጀግንነት ስሜት ይነበባል። አቀባበላቸውም 90 ደቂቃ በእንቴቤ የሚለውን ታሪክ ይመስላል። ኡጋንዳ ላይ የታገቱ ዜጎችዋን ለማስለቀቅ እስራኤል ያደረገችው ገድል። ቴድሮስ አድሃኖምም በኩራት እና በድል አድራጊነት ስሜት ነው ስደተኞቹን የተቀበሉት። መቼም ሼም የሚባል ነገር ከነሱ ዘንድ ጠፍቷል። በስራቸው ማፈር ሲገባቸው አይናቸውን በጨው እያጠቡ የሌላውን ድል እንደራስ ያጣጥሙታል። ህሊና ያለው ሰው ያሳደዳቸውን እና በባእድ ነጻ የወጡ ዜጎቹን ሲመለከት ብርክ ነው የሚይዘው። አልገባቸው ይሆናል እንጂ ክብራቸውን የሚቀንስ ማንነታቸውን የሚፈትን ድርጊት ነው። አስቀድመን በግብጽ መገናኛ ብዙሃን ዜናውን ባንሰማ ኖሮ ደግሞ ሌላ ታሪክ ይነግሩን እንደነበር ጥርጥር የለውም።

ሁኔታቸው አባት እና እናቱን በግፍ ገድሎ ፍርድ ቤት የቀረበውን አይነደረቅ ያስታውሰናል። ወንጀል መፈጸሙን ያመነው ይህ ጎረምሳ የፍርድ ማቅለያ እንዲናገር በመሃል ዳናው በተጠየቀ ግዜ እንዲህ አለ። “ያው አባት እና እናት ስለሌለኝ፤ ለወላጅ አልባ ልጆች እንደሚደረገው ልዩ እንክብካቤ ያስፈልገኛል።”

በአለም-ዓቀፍ መገናኛ ብዙሃን እንደሰማነው እነዚህን ዜጎች ነጻ ያወጣችው ግብጽ ናት። ከአይሲስ ጥርስ ወጥተው ግብጽ ምድርን ሲረግጡ አቀባበል የተደረገላቸው በምንስቴር ደረጃ ሳይሆን በረዕሰብሄር ደረጃ ነው። ከአውሮፕላን ሲውርዱም የግብጽን ባንድራ እያውለበለቡ ነበር። አዲስ አበባ ላይ ግን ባንዲራ አልያዙም። ይህም ትልቅ ትርጉም አለው። ባንዲራ የአገር ክብርና ፍቅር ነው። የህዝብ አንድነት እና ትሰስር በባንዲራ ይገለጻል። አንገት ላለው፤ አንገቱን የሚያስደፋ እውነታ!
በግብጽ መከላከያ ሃይል ነጻ የወጡት እነዚህ 27 ኢትዮጵያውያን ካይሮ ሲደርሱ የግብጹ ፕሬዚዳንት አብዱል ፈታህ አል ሲሲ ፕሬዝዳንታዊ አቀባበል አድርገውላቸዋል። ቅድምያ ለሰብአዊ ፍጡር ክብርን ከመስጠት የሚመነጭ ተግባር ነው። ትልቅ የፖለቲካ ትርፍ ቢያገኙበትም ይገባቸዋል። ክቡር የሆነን ሰው ነብስ አትርፈዋልና ይህ ለኛ ትልቅ ትርጉም ነው የሚሰጠን። መልካም ስራ ለክፉ ቀን ስንቅ ነው።

አዲስ አበባ ሲገቡ ግን ሃይለማርያም ደሳለኝ ሊቀበሏቸው አልቻሉም። ምክንያቱም ግልጽ ነው። ለሳቸው ያለገደብ የተሰጠው ስልጣን ተቃዋሚዎችን እና ዲይስፖራውን መሳደብ ብቻ ነው። ምናልባትም ለኚህ አሻንጉሊት ዋነኛው ችግር አይሲስ ሳይሆን አሜሪካ ላይ የተነሳው አልሻባብ ነው። አሜሪካ ባሸተተች የኛዎቹ ያስነጥሳቸዋል። ለዚህ የአሜሪካ ቆሻሻ ጦርነት የኢትዮጵያን ወታደር ለመላክ አላንገራገሩም። የኛ ወገን እንደ ከብት ሲታረድ ግን የመረጡት ብሄራዊ የሃዘን ቀን ማወጅ፣ ከንፈር መምጠጥ፤ ሻማና ጧፍ ማቃጠል …። ምክንያቱ እነሱ እንደሚሉት የድንበር መዋሰን ጉዳይ አይደለም። ይህ ቢሆን አሜሪካ ሽብርተናን ለመውጋት አፍጋኒስታን ወይንም ሶርያ አያዋስናትም። መውረር ባስፈለጋት ግዜ ፓናማንም ግሪናዳንም ወርራለች። ሶማልያ ላይ ከሰፈረው ሰራዊት ስንቱ እንደሞተ በፓርላማ ሲጠየቁ የቀድሞው ጠቅላይ ሚንስተር ሲመልሱ፤ “ይህ ጉዳይ እናንተን አይመለከትም!” ነበር ያሉት። የፓርላማ አባላት ይህንን ወሳኝ ጉዳይ የማወቅ መብት ከሌላቸው ታዲያ ለማን ነበር ሪፖርቱ የሚቀርበው? ለአሜሪካ?
አለም ስለ አይሲስ ጭፍጨፋ ሲጨነቅ፣ እነሱ ግን ምርጫው ነው እንቅልፍ የነሳቸው። እናም በዜጋው ሰቆቃ ሳይሆን በሰላማያዊ ፓርቲ ላይ ተጠምደዋል። አይሲስን ከመዋጋት ሰማያዊ ፓርቲን ማጥፋት ይመርጣሉ። የመከላከያ ሰራዊቱ አንበሳነት በሃገር ውስጥ ብቻ መሆኑን አስመስክሯል። በዜጋው ላይ ኮማንዶ ሲለማመድ አሳዩን።
ለእነሱ ሽብርተንኛ አይሲስ ሳይሆን ጋዜጠኛ ነው። የጸረ-ሽብር አዋጅ አውጥተው ጋዜጠኛ እና ተቃዋሚዎችችን ያፍኑበታል። ሽብርተኛው ዜጋዋ ሳይሆን አይሲስ እንደሆነ ግብጽ ትምህርት የሰጠቻቸው ይመስላል። ከራስዋም አልፋ እኛኑ ስትታደግ አየን።
በዚህ ሰሞን የቴድሮስ አድሃኖም ፌስ ቡክ ገጽ ተጨናንቆ ነው የሰነበተው። የስደት ቀውሱ ያመጣውን ችግር ይዞ ትንሽ የፖለቲካ ትርፍ ለማግኘት የሚደረግ ጥረት መሆኑ ነው። የኝህ ሰው ስራ ጨርሶውኑ በፌስ ቡክ ላይ ሆኗል ያስብላል። ጨጓራው የተቃጠለ ዜጋም ይህንኑ ገጽ የንዴቱ ማብረጃ አድርጎታል።

በሳምንቱ መጀመርያ ላይ አይቴ ቴድሮስ እንዲህ ብለው ጽፈዋል። “የመጀመሪያ ዙር ከሊብያ ተመላሽ ወገኖች አዲስ አበባ ገብተዋል። መንግስት ጥረቱን አጠናክሮ ይቀጥላል።”
ታዲያ ሚኒስትሩ እንዲህ ይበሉ እንጂ እነዚህ ወገኖች ሲገቡም ሆነ አቀባበል ሲደረግላቸውም አልታየም። እውነት ነው በኢትዮጵያዊነታቸው ሳይሆን በዘር እየተለኩ፣ ለገዢው ፓርቲ ቅርብ የሆኑ፣ ወዘተ በሱዳን በኩል እንዲገቡ መደረጉ ተሰምቷል።
ተስፋዬ ሁሴን የተባለ ወገን በዚያው ጽሁፍ ስር እንዲህ ሲል መለሰላቸው፣ “መቸስ ውሸትህ አያልቅ፣ በቀደም እለት የደቡብ አፍርካ ተመላሾች ብለህ ቀደድክ። ነገር ግን እዚህ ከደቡብ አፍርካ የገባ አንድም ስደተኛ ባልነበረበት፣ ተመላሾች ብለህ ስትዋሸን ዝም አልን። አሁን ደግሞ ከሊቢያ … መጥኔ ውሸትህን ለሚጋቱ አድርባዮች! ጊዜ እየጠበቅህ ብቻ የእንትን ተመላሾች በል። ነገ ደግሞ የሰማይ ቤት ተመላሾች እንደምትለን ተስፋ አደርጋለው። በውሸት፣ በፌዝ 24 ዓመት…”
ቴድሮስ አድሃኖም መጻፋቸውን ቀጠሉ፣ ስለ ሁለተኛው ዙር ተመላሾች። ዙቤር ኡስማን የተባለ መላሽ ደግሞ “አገር የሌለው ሰው የሄደበት ሁሉ አገሩ ነው! ኢትዮዽያውያን ስደተኞች ከሊቢያ ወደ ግብፅ፤ የግብፅን ሰንደቅ ኣላማ እያውለበለቡ ሲወርዱ! ከሃበሻ ምድር ተሸርፋ “አገር” የሆነችው ግብፅ ዛሬ የእንጀራ እናታችን ሆነች!” ሲል ነበር ቁጭቱን የገለጸው።

እርግጥ ነው። ስልጣን ላይ ያለው ቡድን ለዜጋው ግድ አይሰጠውም። አንድ ኢትዮጵያዊ ይልቅ አንድ የህንድ ወይንም የሳዑዲ ዜጋ በሃገራችን ትልቅ ክብር አለው። ከዜጋው ይልቅ ለባእዳን “ባለሃብቶች” ደህንነት የሚጨነቅ ስርዓት ነው። ሲጀመር ዜጋው ከሀገሩ እንዲሰደድ ያደረገው ብልሹ የሆነ ስርአቱ ነው። አርሶ አደሩችን ከቀያቸው እያፈናቀለ፣ ለም መሬታቸውን ለህንድ እና ሳዑዲ ባለሃብቶች በመናኛ ዋጋ በመቸበችብ የወጣቱን ተስፋ ገደለው። ወጣቱ አገር የለውም። ለመኖር ሲል፣ ፍትህ ፍለጋ፣ ስራ ፍለጋ፣ እንጀራ ፍለጋ ይሰደዳል።

የአሜሪካ ድምጽ ራዲዮው አዲሱ አበበ ከሊቢያ ሁለት ስደተኞችን በስልክ አነጋግሮ ነበር። ሁለቱንም ወደሃገር ቤት መመለስ እንደሚፈልጉ ጠይቋቸው የሰጡት ምላሽ “መመለስ አንፈልግም!” የሚል ነው። እነዚህ ወገኖች በሞት ጥላ ውስጥ ሆነው እንዲህ ማለታቸው በሀገር ቤት ያለው ችግር ምን ያህል የከፋ መሆኑን ይጠቁመናል።

ሰሞኑን በወገኖቻችን ላይ እየደረሰ ያለው ግፍ አዲስ አይደለም። የአይሲሱ ግድያ አለም አቀፍ ትኩረትን ሳበ እንጂ በሳዑዲ አረቢያ፣ በደቡብ ሱዳን፣ በኬንያ፣ በታንዛኒያ፣ በየመን፣ በደቡብ አፍሪካ፣ በእስራኤል ወዘተ ፍጹም ኢ-ሰብዓዊ የሆነ ድርጊት በዜጎቻችን ላይ ተፈፅሟል። ሴቶች እህቶቻችን በጎረምሶች ተደፍረዋል። በአሰቃቂ ሁኔታም ገድለዋል። ለዜጎቹ የሚከራከር አካል ባለመኖሩም የተናቅን ህዝብ አደርጎናል።

እስራኤል ሃገር በፈላሽ ሙራዎች ላይ እየደረሰ ያለውን የዘር መድልኦ አለም ሲያወግዘው የኛዎቹ ዝም ነው ያሉት። ባለፈው አመት ናይሮቢ ውስጥ ሰባ የሚሆኑ ኢትዮጵያውያን እየተለቀሙ ሲታፈሱ እና ሲታሰሩ እዛ ያለው የኢትዮጵያ ኤምባሲ “ኬንያ ውስጥ ጉዳት የደረሰበት ሕጋዊ ዜጋ የለም” ሲል ነበር መልስ የሰጠው። ሊብያ በፈራረሰች ግዜ አፍሪካ ዜጎች በየኤምባሲያቸው ገብተው ሲጠለሉ ኢትዮጵያውያን መሄጃ አልነበራቸውም። በመጨረሻ ግን የናይጄሪያ ኤምባሲ ተቀብላ አስተናገደቻቸው።

አይሲስ ወደ የመን እየገባ መሆኑ በተሰማ ግዜ ሰይፉ ፋንታሁን አንድ ዘገባ አቅርቦ ነበር። በዘገባው ላይ የመን ያሉ ኢትዮጵያውያን መንግስት ከወሬ ያለፈ ምንም ነገር እንዳላደረገ ይናገራሉ። ይልቁንም ዓለምአቀፍ ሞዴልና ተዋናይ የሆነችው የሐረር ወርቅ ጋሻው ስደተኛውን ለመርዳት የአቅሟን እያደረገች እንደሆነ ጋዜጠኛ ግሩም ተ/ሐይማኖት ተናግሯል።

በየመን እየታየ ያለውም ጉዳይ እርግጥ “ኢትዮጵያ መንግስት አላት ወይ?”..የሚለውን ጥያቄ የሚመልስ ነው። ጋዜጠኛው የመን ያለው የኢትዮጵያ ኤምባሲ “እንረዳቸዋለን ወይስ እናርዳቸዋለን?” ነው ያለው ሲል ባሰፈረው ጽሁፉ በዶቺቬሌ ቃላቸውን የሰጡት የኤምባሲው ቃል አቀባይ አቶ አምደሚካኤል ንግግር ኣሳፈሩን ይላል። “ኢትዮጵያዊያኑን እንረዳቸዋለን። ከአይ. ኦ. .ኤም. ጋር በመተባበር ወደ ሀገር መመለስ የሚፈልጉትን እንመልሳለን” ብለዋል። … ” አዎ ይረዳሉ ግን ኤምባሲ ውስጥ ላሉ ሰራተኞች ነው። ..እኛን ግን እንረዳለን ማለት ፈልገው ሳይሆን እናርዳቸዋለን ማለታቸው ነው። ሲያርዱ እንጂ ሲረዱ መቼ ታይተው ነው።” ብሎ ነበር የጻፈው።

እውነታው ይህን ይመስላል። አንዳንድ የስርአቱ አጨብጫቢዎች ታዲያ ይህ እውነታ አይወጥላቸውም። ዜጋ እየተሰቃየ እነሱ ግን ስለ ህንጻ ይነግሩናል፤ ስለ ታምራዊው 11 በመቶ የኢኮኖሚ እድገት ይሰብኩናል። … ሕንጻና መንገድንማ ቅኝ ገዥዎችም ሰርተዋል። ለዚያውም እነሱ ከሚነግሩን የበለጠ።

ሕዝብ ደግሞ እያለ ያለው ፣ “ከህንጻ በፊት ነጻ!” እንሁን ነው! ሀገር ማለት መሬት አይደለም። ሃገር ማለት ወንዙ፣ ተራራው፣ ሽንተረሩ፣ አደለም። ሃገር ማለት ሕዝቡ ነው። የህዝቡ ሰቆቃ ግድ የማይለው አካል መንግስት ሊሆን አይችልም።

የኢትዮጵያ ወጣቶች ድምጽ አዳዲስ ዜና ዘገባዎችን እና ካለፈው የቀጠለ የሰሃራ በረሃ ተጓዦች ትዝታን የሚያስቃኝ ትረካ ቀጣዩን ክፍል 3 እና 4 ይዘን ልናስደምጣቹ ተዘጋጅተናል::የቀድሞ አንድነት ፓርቲ ምክትል አፈ ጉባዬ እና የፋይናንስ ዘርፍ ሃላፊ አቶ ጸጋዬ አላምረው ከስደት ካሉበት ያሳለፉትን የፖለቲካ ሕይወት እና የአንድነት ፓርቲን በተመለከተ ያደረጉት ቃለመጥይቅ በዚህ ፕሮግራም ይቀርባል:: ለማዳመጥ እዚህ ይጫኑ

ለማንበብ እዚህ ይጫኑ

እንደወትሮው ከኢትዮጵያ የሚመጡ ዜናዎች አያስደስቱም፤ ሀገራችን ከጥፋት ማማ ላይ መድረሷን ያሳያሉ። ለአራት ጊዜ በሸፍጥ ተመርጫለሁ ብሎ ሥልጣን ላይ ቂጥ ያለው ወያኔ ለአምስት ጊዜ ሊያወናብድ እየተዘጋጀ ነው። በየጊዜው ጥቂቶች ብቻ በገሃድ የምርጫውን ሸፍጥነት ሲያጋልጡ ምዕላተ ሕዝቡ ግን ከሹሹክታ ያለፈ እንደ ቡርዲና ቡርኪነፋሶ ዳር እስከዳር በአደባባይ ወጥቶ ሲቃወም አይታይም፤ ዘንድሮ ግን ሌላ ድርጅቶች ወይም ግለሰቦች ሣይጠብቅ እርሰ በእርሱ በጎበዝ አለቃ ተቧድኖ ምርጫውን ማክሸፍ አለበት። ወያኔ ለአምስተኛ ጊዜ ለመመረጥ የተዘጋጀ ይመስላል፣ ይህ ከተሣካ ደግሞ ሕዝባችን ሸፍጥን እንደሥረዐት የተቀብሎታል ማለት ይቻላል። የወጪ አገር ታዛቢዎችም ኢትዮጵያ በዲሞክራሲ የምትመራ ሀገር ናት እሰከማለት የደረሱት ይህን በመታዘብ ይመስላል። ‘ወደሸ ከተደፋሽ ቢረግጡሺ አይክፋሽ’ እንደማለት፣ የአሜሪካኗ ዲፕሎማት ወይዘሮ ዊዲ ሸርማንም በተዘዋዋሪ የነገሩን ያንን ነበር። ወያኔ የሽፍጥ መንግሥት መሆኑን ከአሜሪካ በላይ የሚያውቅ የለም ፤ የአሜሪካን ሰቴት ዲፓርትሚት ሪፖርት ያንን ያሣያል፡፡ ሸፍጥና ነፍጥ ርዕዮተ ዓለሙ የሆኑት ወያኔ እንደሥረዐት እንድንቀበል ካደረን ዓመታት ተቆጥረዋል ፤ ከጫቃች ላይ አሽቀጠሩ መጣሉ የእኛ ሕዝቦች ሃላፊነት መሆን አለበት። የትግራይ ሕዝብ ነጻነት ግንባርን ሸፍጥ በዓለም የመገናኛ ብዙሃን ሺፋን ሲያገኝ እኛም ለድርጊቱ አዲስ ሆነን አብርን እናጫፍራለን፤ በሊቢያው በአይሲሲ አረመናዊ ቡድን በወገኖቻችን ላይ ለተፈጻመው ግድያ ያደረግነው ያንኑ ነው። ለምሳሌ በሚያዚያ 11፣ 2007 ዓ ም [Islam Society of Iraq and Syria] ISIS ሃያ ስምንት ወገኖቻችን በዚህ አረመኔ ቡድን በሊቢያ በካራ አነገታቸወን መግዝር፣ በደቡብ አፍሪካ፣ በሚነድ የጎማ ነበልባል መቃጠል፣ በሜዴቴሬያን ሐይቅ፡ በሕንድ ዊቂያኖስ መስመጥ፣ በየመን ከሚያለቅሱ ሕጻናት እናቶች ተነጥለው ወደ መታጎሪያ ሲነዱ፣ ሕጻናት በረሃብ ሲያለቅሱ ዓለም አጀብ ፣አጀብ፣ ሲል ከዚህ የከፋ ግፍ ወያኔ በሕዝባችን ላይ እንዳልፊጸመ እኛም አብረን አጀብ አጀብ ብለናል። በሻማ ማብቱ ሥነስረዓት ላይ ተካፍለናል፣ ያ ባልከፍ ነበር፣ ግን ክፋቱ ግን ይህ ድርጊት መደጋገሙን አምነን ለመጨረሻ ጊዜ የዚህ ሁሉ ግፍ መሐዲሱ ወያኔ መሆኑን ተቀብለን ለማስወገድ በተግባሩ ሥራ ላይ ለመተባበር ቁርጠኛነት ያለመኖሩ ፣ በእግር ኳስ ሕግ ኳሷን እንዴት እንደምትመታት ከማሰብህ በፊት ወደኳሷ ተጠጋ ይላል፤ ሰለመተባበር ሰንደሰኩር በተግባር መሬት ላይ እየሰራን ቢሆን ይመረጣል። ይህን ቡድን ለማስወገድ ቆርጠን መነሣትን ይጠይቃል፤ ለዚህ ውርደት በተዘዋዋሪ የዜጎች አስተዋጾ አለበት፤ ዋነኛውን ተዋናኝ ወያኔን በገሃድ ለማውገዝ እንኳን አልደፈርንም፤’ በሰዎች ሰቆቃ ፖለቲካ አንሥራ የሚሉም አልታጡም፣ የአዛኝ ቅቤ አንጓቾች አይነቶች፣ የሀገር ቤቱ ወጣት ይሻላል፣ ‘የሀገር ውስጥ አንበሣ የውጭ ሬሣ ሲል ተሳልቈል ። በውጪ ሀገር የአንድ ፖለቲካ ድርጅት መሪ ብቻ ናቸው፣ በገሃድ ወያኔ ሌለኛው አይሲሲ ነው ሲሉ የተደመጡት፤ በየአቅጣጫው በተሰደድንበት አገሮች ም ሆነ በሀገራችን ለመሞትን አልፈራንም፣ ሆኖም ግን በአንድነት ወያኔ ይወገድ ለማለት በአደባባይ ምን አሰፈራን? ይህንን ለሃይማኖት አባቶች ልተወው፣ ምክንያቱም የኢትዮጵያ ሲኖደስ ተወካይ አባት፣ የእስልማና ሃይማኖት አባት የወንጌላዊ ቤተክርስትያ ተወካዮች 1997 ዓም በአዲስ አበባ ከተማ ብቻ 200 ሰዎች በአጋዚ ታጣቂ ተገለው እነዚህ እላይ የተጠቀሱት የሃይማኖት አባቶች አይናችንን ግንባር ያድርገው ነበር ያሉት፤ ዛሬም አሲሲን አውግዘው ወያኔ ሲዘሉ አስተምህሮታቸው ሰሚ ይኖረው ይሆን? የካቶሊኩን መሪን አይጨምርም። ፍርዱን ለዓምላካች ልተወውና ሰለአይሲሲ ትንሸ ልበል፤

እነዚያ አይሲሲዎች በእስልምና ሰም ሃያ ስምንቱን ወገኖቻችንን ሲግዝሯቸው የሚሳየው ቪዲዮ በጉታናሞ ቤዬ በአልካይዳ ስም ተጠርጥረው የታሰሩት እስረኞች ለብሰውት የነበረውን ዩኒፎርም ይመስል። ይህን ቡረቱካናዊ መልክ ቱታ አሰለብሰው በኦርቶዶክስ ሃይማኖት ስም አይግዝሯቸው እንጂ በአማራ ሰም ሊቢያ ከተፈጸመው ግፍ በላይ በክርስትያኑኖ ሕብረተሰብ ላይ በወያኔ ታጣቂዎች ተፈጽሟል። በቪዲዮ ባለመቀረጹ ምንም ዓይነት ግድያ በኦርቶዶክስ እምነት ተከታዩ ክርስትያኖች ላይ እንዳልተፈጸም ገምተን የሊቢያውን አጋነን ካራገብን ተሣስተናል። ሳሞራ ዩኑስና ሳራ መኮንን፣ በጋራ ሙለታ፣ በአሰቦት ገዳም፣ በአርባ ጉጉ ከነሕይወታቸው ገደል ያስጣሏቸው የኦርቶዶክስ እምነት ተከታዮች ኢትዮጵያውያን ነበሩ። ዓምላክ ነፍሳቸውን ከገነት ያኑርልነና ፕሮፌሰር አሰራት ወልደየስ የአማር ድረጅት ብለው ሲያቈቁሙ በአማራ ስም ወያኔዎች ያስገድሉት የነበረውን የኦርቶዶክስ እምነት ተከታዩን ለመታደግ ነበር። እንደሳቸው ድሬ ደዋ ተወልዶ ላደገ አማራ ማለት የኦርቶዶክስ እምነት ተከታይ መሆኑን ጠንቅቶ ያውቃል። አንዳንድ የወያኔ ሸፍጥ ያልገባቸው ወይም እንዲገባቸው ያልፈለጉ እኛን ታላቅ ሰው ለዘር ፖለቲካ የቆሙ አሰመስለው ያቀርቧቸዋል። ከአድራጊዎቹ ግን በድፍረት ሐቁን ይነግሩናል፣ ለምሳሌ አቶ ሰብሃት ነጋና አቶ ተፈራ ዋልዋል ተራ በተራ እንዲህ ይነግሩናል፣ በገሃድ’ ‘አማራውነና የኦርቶዶክ እምነት ተከታዮን አከረካሪውን ሰበረነዋል፣ የኦርቶዶክ ቤተ ክርስቲያን የአማራው ምሽግ ናት’ እስከማለት ደርሰዋል፤ ይህ አሉ አሉ ሣይሆን በማስረጃ የተያዘ ነው። በመኝታ ክፍላችን የተኛውን ትልቁን ዘንዶ ረስተን በዱሩ ባለው እባብ ላይ እንጮሃለን፣ ይህ ስሜት ይሰጣችኋል? ለእኔ አይሰጠኝም፤ የክርስቲያኑና የእስልምና ተከታዩ መሳ በመሳ በሚኖርባትት ኢትዮጵያ ላይ ‘ጀሃድ’ የሚያውጅ የእስልምና ተከታይ ካለ እርሱ እስላም አይደለም፣ በክርስታኑም በኩል ያንን የሚያስብ ካለ ሸፍጠኛ ነው። ሸፍጠኛው ወያኔ ‘ጀሃድ’ ታወጀብኝ ብሎ ሱማሌን 1997 ዓ ም የወረረው በምርጫ የደረሰበትን ሸነፈት አቅጣጫ ለማስለወጥ መሆኑን ተግባሩ ገላጭ ነው፤ ራሱ ወያኔ አሸባሪ ሆኖ የሃይማኖት ጽፈኞችን ሊዋጋ አይችልም፣ በሦልጣን የሚያቆየው ከሆነ ከእነረሱ ማበሩን ይመርጣል፣ በዱር በነበረበት ዘመን ያደረገው ያንን ነበር፣ የነርሱን መንገድ ይከተላል፣ በተግባር ሲያደርገው ያየነው ያንኑ ነው፣ በጋንቤላ በአንድ ሌት አራተ መቶ ሰው፣ በቤንሻጉል፣ በጉራ ፈርዳ፣ በኦጋዴን፣ ሬሣ ተጋድሞ ሲቆጠር፣ ወንድሙ የወንድሙን አሰከሬን መሬት ለመሬት እንዲጎትት በውያኔ ታጣቂዎች ትዕዛዝ ሲሰጠው ያየነው ነው፤ እንደዜጋ ከዕንቅልፋች መንቃት አለብን። በየመን የከተመው አልካይዳ በሱማሌ የሚቀሳቀሰው አልሸባብ የሃይማኖት አሰተህምሮታቸው ወደ ኢትዮጵያ ሰርጎ ያልገባው በወያኔ ሠራዊት ጥንካሬ አይደለም፤ በሕዝቡ ውስጥ በቅርበት የሚሰሩ የሁለቱ ሃይማኖት አባቶች አርቆ አሰተዋይነት ነው። በወያኔ የተመለመሉትን የክርስትያኑንም ሆነ የእስልምናው ተከታይ አባቶችን አይመለከትም። ወያኔ በሦልጣን ከቀጠለ ግን ሁኔታዎች መቀጠላቸው አሰተማማኝ አይሆንም፤ የዚህ ቡድን ያለፉ ድርጊቶቹ የሚያሳዩን ሕዝብን በሃይማኖትና በዘር እያለያየ ሲያጋድል፣ቦንቦችን በሕዝብ ማመላሻ መኪናዎች ወስጥ እያጠመደ በተቃዋሚዎቹ ላይ ሲያላክክ ነው። ይህ የሸፍጠኛ ቡድን በጎሣ ፖለቲካ ሽፋን፣ የሃይማኖት ልዩነት ያራምድ እንደነበረ አሁንም እያደረገ እንዳለ አንድ ማስረጃ ልጥቀስ፣ ጃራ የሚባለው በምሥራቅ ሐርረጌ ኢስላሚያ ኦሮሚያ በማለት ቆቱውን ወይም አርሶ አደሩን በግብርና መሣሪያው፣ በጌጅራና በሜጫ ክርስትያኑን አሣርዷል፣ ሳሞራ ዩኑስና ሳራ መኮንን አማራውን ለማስገደል መልክተኛቸው እርሱ ነበር። በአሜሪካ ከአንድ የታወቀ ዩኒቨርሲቲ የጎሳ አቀንቃኝ በጥቅሉ በሜጫና በግጅራ ተዋጓቸው በማለት የጃራን መፈክር ሲያስተጋባ ስሰማ ጆሮዬን አላመንኩም፣ ወያኔም የሚፈልገው ይህን መሰል ካድሬ ነው።

ኢትዮጵያ ሀገራችን በነፃነት ለሦሰት ሺ ዓመት ኖራለች የሚል ታሪክ አለን፤ በሃያ አንደኛው መቶ ዓመት ነፃነታችንን አሳልፈን ሰጥተን በዓለም ሕበረተሰብ ፊት ተዋርደናል፤ ለመሞት የማንፈራ ኢትዮጵያውያን እንዴት ነው በግልም ሆነ በጋራ ወያኔን በቃህ የማንለው? ይህን ማድረግ የማንቸለው ለምንድነው? በትግራይ ሕዝብ ነፃነት ግንባር ሽፋን ይህ ቡድን ሸፍጥ ሲሰራ የትገራይ ሕዝብስ ምን ያስባል? ከተናገርን እናልቃለን፣ አልሰማንም አላየንም ማለቱ ለልጅ ልጆቻችን አይጠቅምም፣ እውነት ኮስሶ ሽፍጥ ሥረዓት በሆነባት ሀገር፣ እንዴት ትውልድ መተካት ይቻላል? ለሸፍጥና ለነፍጥ ሣንበረከክ የዜግነት ግዴታችንን የምንወጣበት ወቅቱ አሁን ነው፣ ከዚህ ከምነያውና ከምንኖረው ሐቅ በላይ ምን ማየት እንሻለን? ታሪክ የጣለብንን ተግዳራት መጋፈጥ ግድ ይለናል። ‘አሣ ግማቱ ከአናቱ’ እንደሚባለው ወያኔ በሸፍጥ የገማ ብድን ሰለሆነ በሕዝብ የተባበረ ከንድ መወገድ አለበት። የሚመጣው ምርጫ የወያኔ ሳይሆን የእኛ እናድርገው፣ ትንሽ አገር ብትሆንም ትልቅ ልብ ካለው የ ቡርኪነፋሶ ሕዝብ እንማር! በሊቢያ አይሲሲ አረመኔው ቡድን ካራውን በአንገታቸው ላይ ሲያርፍባቸወ የሚሰማችው የሞት ጽልመት ፣ዛሬ ያ እንዳይሆን ለወገን ክበር ለሀገር ነጻነት በመቆማችው በወያኔ እስር ቤት የሞት ጽልመት ሰለ አጃበበባችው ወኖች እናስብ፤ ለእዚህም ነው ወያኔና አይሲሲ አንድ ናቸው የምንለው።
ኢትዮጵያ ሀገራችንን እንታደጋት፣ ሕዝባችን ማደሪያ እንደሌላት ወፍ አይከራተት።

tadele@shaw.ca

የኢትዮጵያና የአሜሪካ ግንኙነት ከመቶ ዓመታት በላይ ነው። ይኼ ግንኙነት በሁለቱ ሃገሮች መካከል ሊኖር የሚገባውን የእኩልነትና የጋራ ጥቅም መሰረት ያደረገ እንደ ነበረ ታሪክ ያስታውሳል። መንግሥታት ቢለዋወጡም በሁለቱ ሃገሮች መካከል የተመሰረተው የቆየ ግንኙነት አይፈርስም የሚል እምነት አለኝ። የኢትዮጵያ ስደተኞች አሜሪካን የመጀመሪያ መድረሻ አድርገን አሜሪካዊ የሆንንበትና ወደፊትም የምንሆንበት ዋና ምክንያት የአሜሪካ አስኳል እሴቶች–ነጻነት፤ የግለሰብ ክብር፤ ፍትህ-ርትእ፤ የሰብአዊ መብቶች መከበር፤ በሕግ ፊት ማንኛውም ግለሰብ እኩል መሆን፤ የሕግ የበላይነትና ዲሞክራሳዊ አገዛዝ ስለሳቡንና የመስራት እድል በጎሳ ሳይሆን በሞያ የሚወሰን መሆኑን ስላወቅን ነው። ዛሬ ብዙ መቶ ሽህ የኢትዮጵያ ትውልድ በአሜሪካ ይኖራል፤ ድምጽና መብት አለው። በኢትዮጵያ የማናገኘውን በተሰደድንበት አሜሪካ እናገኛለን። ይኼን እድል ተጠቅመን ለተወልድንባት ሃገር ጠበቃ እንሁን።

በሁለቱ ሃገሮች የተመሰረተው የቆየ ግንኙነት በወታደራዊው፤ ሶሻሊስት አምባገነን መንግሥት ዘመን ተለውጦ አሜሪካኖች አቋማቸውን ለውጠው ተተኪ መንግሥት ይጠባበቁ እንደ ነበር ብዙ ማስራጃዎች አሉ። ደርግን የተካው የጎሳ ልሂቃን ቅንጅት ህወሓት በበላይነት የሚያሽከረክረው የኢህአዴግ መንግሥት ከምእራብ ሃገሮች፤ በተለይ ከአሜሪካ ጋር ያለው የጥቅም ትሥስር እጅግ በጣም የጠነከረ ነው። የኢትዮጵያ እድገት ፈጣን የሆነው በውጭ እርዳታ፤ ስደተኛው በሚልከው ገንዘብ፤ በሃገር ውስጥ ብድርና በቅርቡ በውጭ ኢንቬስተሮች ድጋፍ ነው። ኢኮኖሚው በራሱ ለመንቀሳቀስ አልቻለም፤ ፍትኅ ከሌለ አይችልም። በአሜሪካኖች ስሌት፤ በፈራረሰው፤ እርጋታና ሰላም በሌለበት የአፍሪካ ቀንድና አካባቢ (በሰሜን ኤርትራ፤ በምስራቅ፤ ሶማሊያ፤ በምእራብ ደቡብና ሰሜን ሱዳን፤ በባህር ማዶ በየመን፤ በሶሪያ፤ በኢራክ፤ በሰሜን አፍሪካ በሊብያና በግብፅ) ያለውን የርስ በርስ ግጭት፤ የሃገሮች መፈራረስና የሃብት ውድመት ሲመለከቱ ኢትዮጵያ “የእርጋታና የልማት” ደሴት ናት ወይንም ትሆናለች ብለው ማመናቸው አያስገርምም። ግዙፉ እርዳታ ከዚህ ስሌት ጋር ቀጥተኛ ግንኙነት አለው። ጸረ-ሽብርተኛነት ሰብሳቢ መርህ ሁኗል። አሜሪካኖች ያላስተዋሉት፤ ቢያስተውሉትም የሚመጣውን ችግር ከራሳቸው ጊዚያዊ ጥቅም ባሻገር ያልተገነዘቡት፤ አምባገነኖች ፀረ-ሽብርተኛነትን ምክንያት በማድረግ ራሳቸው ሽብር ፈጣሪዎችና ሽብርተኞች መሆናቸውን ነው። የሰብአዊ መብቶችና የነጻነት መገፈፍ ሁለተኛ ወይንም ሶስተኛ ደረጃ የያዘው ለዚህ ነው። የሕዝብ መብቶች በተከታታይ ሲጎዱ አፍራሽ ኃይሎች፤ ሽብርተኞችን ጨምሮ መግቢያ ቀዳዳ ያገኛሉ፤ ስደተኝነት እየከፋ ይሄዳል።

የአሜሪካ መንግሥት መሪ ፕሬዝደንት ባራክ ኦባማ ልክ የዛሬ ሁለት ዓመት በደቡብ አፍሪካ እንዲህ ብለው ነበር። “በአፍሪካ ሃገሮች በሙሉ የማንኛውም ግለሰብ ክብር ቢከበር አሜሪካኖችም ነጻ ይሆናሉ። እኔ የማምነው እያንዳንዳችን ነጻ ለመሆን ከተፈለገ የሁሉም ሰብአዊ ቤተሰቦችና ግለሰቦች ከድህነት ወይንም ከበሽታ ወይንም ከጭቆና ነጻ መሆን አለባቸው።” ይኼ እሴት የአሜሪካኖች እሴት ነው፤ የመላው በነጻነት ለመኖር የሚፈልግ ሕዝብ እሴትና ተስፋ ነው። የኢትዮጵያ ሕዝብ ለክብሩ፤ ለፍትህ፤ ለነጻነት፤ ለሕግ የበላይነትና ለዲሞክራሲ ሲታገል ከዓመሳ አመታት በላይ ሁኗል። ኢትዮጵያ ባለፉት ሃያ አምስት ዓመታት በአንድ አምባ ገነን ፓርቲ ስትገዛ ቆይታ አሁንም በአራት ቀናት በሚካሄድ “የይስሙላ ምርጫ” የተጠበቀ ውጤት ለሚከተሉት አምስት አመታት ትገዛለች። የኢትዮጵያ የመንግሥት ስርዓት ልክ የፈረሰውን የሶቬት ሕብረት አገዛዝ የሚመስል ጋርዲያን የተባለው ጋዜጣ “ኦርዌሊያን” የሚለው፤ ወይንም በእኔ አመለካከት ፍጹም የሆነ በስለላ መረብ የተቆራኘ፤ በአንድ አናሳ ብሄር የበላይነት የመከላከያ፤ የስለላና የኢኮኖሚ የበላይነት የሚተዳደር አገዛዝ ነው።

ይኼ አገዛዝ ያለ ዓለም ትሥስር የገንዘብ የስለላ፤ የመከላከያ፤ የዲፕሎማሲና ሌላ ድጋፍ ህይወት አይኖረውም። የማይካደው ገዢው ፓርቲ ባለፉት ሃያ አራት አመታት ለልማት ድጎማ ብቻ አርባ ቢሊየን ዶላር ተሰጥቷታል። ኢህአዴግ ከሙስናው፤ ከሃገር በገፍ እየተሰረቀ ከሚሸሽውና ከሌላው ውድመት የተረፈውን ተጠቅሞ መሰረተ ልማት አካሂዷል። ከእድገቱ ባሻገር መታየት ያለበት ሃቅ፤ ባለፉት አራት ዓመታት ብቻ የምግብ እርዳታ ጥገኛ ከሆነችው፤ ወጣቱ ትውልድ በገፍ ከሚሰደድባት ኢትዮጵያ ተሰርቆ የሸሸው ሃብት ግምት አስር ቢሊየን ዶላር ነው። ይኼ ስንት ፋብሪካ ይከፍት ነበር፤ ለስንት ወጣቶች የስራ እድል ያቀርብ ነበር? የተሰረቀው ተሰርቆና ከሃገር ሸሽቶ፤ የተረፈው መንገድ ስርቷል፤ ሃዲድና ግድቦች እየሰራ ነው። ይኼ ግዙፍ እርዳታና መንግሥት ከባንኮች ተበድሮ ሰማይ ጠቀስ ፎቆች፤ ቪላዎች፤ መንገድና ሌላ ቢሰራ ምኑ ያስደንቃል? የማይካደው ኢትዮጵያ ከመቸውም ጊዜ በበለጠ ደረጃ ጥገኛ መሆኗ ነው። ኢትዮጵያ ዛሬ በያመቱ የአራት ቢሊየን ዶላር እርዳታ ተቀባይ ሁናለች፤ ከአፍሪካ ከፍተኛው ከሆነ ቆይቷል። በመንግሥት ደረጃ ሲታይ ከሁሉም ሃገሮች ከፍተኛውን እርዳታ የምትለግሰው አሜሪካ ናት። ፈጣን እድገት አለ በሚባልባት አዲስ አበባ ከፎቆቹ ባሻገር ለማየት ለፈለገ ታዛቢ ቢያንስ አንድ መቶ ሽህ ህፃናት በመንገድ ያድራሉ፤ ብዙ መቶ ሽህ ነዋሪዎች ምግብ ከቆሻሻ ማጠራቀሚያ እየለቀሙ ይበላሉ። ከስምንቶ መቶ ሽህ እስከ አንድ ሚሊየን የኢትዮጵያ ስደተኞች በየመን ብቻ ይገኛሉ። በሊቢያ የታጎሩትን ቁጥር አናውቅም። ለጋሶች ይኼን ሁሉ ግፍ አያውቁም ለማለት አልችልም። በተጨማሪ፤ መጭው ምርጫ ለይስሙላ መሆኑን የአሜሪካ መንግሥት ያውቃል። ጠቅላይ ሚንስትር ኃይለማሪያም ደሳለኝ የያዘው ስራ ይረጋገጥለታል፤ አሜሪካኖች ይኼን እንደሚደግፉ አልጠራጠርም። ሕዝብ የፈለገውና እውነተኛ ውድድር ያለበት ምርጫ ቢሆን ኑሮ፤ የአሜሪካ ኢምባሲና የተባበሩት መንግሥታት ድርጅቶች በምርጫው ቀንና ተከታታይ ቀኖች “ብጥብጥ” ይነሳል በሚል ስሌት የተጠንቀቁ መልእክቶች አያወጡም ነበር።

ከላይ የቀረበውን መሰረት በማድረግ አሜሪካኖችን የጠየቅኋቸውና ያሳስብኳቸው የእርዳታውን ጥቅምና ጉዳት ከራሳቸው መብትና ጥቅም አንፃር እንዲያዩት ነው። “እስኪ አስቡት፤ በአሜሪካ በተከታታይ አንድ ፓርቲ በየ አራት አመቱ በሚደረገው ምርጫ ቢያሸንፍ ምን ትላላችሁ? የፖለቲካ ተወዳዳሪዎች መብታቸውን ለማስከበር ሰላማዊ ሰልፍ ሲወጡ ፖሊስ ቢደበድባቸው፤ ቢያስራቸው፤ ቢያሳድዳቸው ምን ትላላችሁ? ምርጫው ሰፊ ውድድር ተካሂዶ የፖሊሲ አማራጮች ውይይት ባይደረግባቸው ምን ትላላችሁ? አስቡት፤ ኢትዮጵያ ከአርባ ቢሊየን ዶላር እርዳታ በኋላ ከዓለም ሃገሮች መካከል አሁንም ፍፁም ድሃና በዓመት የነፍስ ወከፍ ገቢዋ ከአፍሪካ ሃገሮች አንድ ሶስተኛ የሆነ፤ ከዓለም ሃገሮች መካከል በሙሰኛነት የተበከለች፤ ከዓለም ሃገሮች መካከል ከፍተኛውን የምግብ ጥገኝነት ቦታ የያዘች፤ በአፍሪካ ጋዤጠኞችን ከሚያስሩ ሃገሮች መካከል ሁለተኛውን ደረጃ የያዘች፤ በዓለም ደረጃ አራተኛውን ደረጃ የያዘች መሆኗን ብታውቁ ምን ትላላችሁ? ይህች የምግብ ጥገኛ የሆነችው ኢትዮጵያ አብዛኛውን የምግብ እርዳታ የምታገኘው ከአሜሪካ መንግሥት ነው። ከድሃይቱ ኢትዮጵያ በአራት ዓመታት ብቻ አስር ቢሊየን ዶላር ተሰርቆ ሲሸሽ ለሃገር ጥቅም ቢውል ኑሮ ስንት ፋብሪካዎች ለማቋቋም እንደሚያስችልና ለስንት ኢትዮጵያዊያን የስራ እድል እንደሚፈጥር አስቡት?

እኔ ይኼን ሃተታ ለአሜሪካ ሕዝብና መንግሥት በታወቁ ጋዜጦች አማካይነት ለማቅረብ የተገደድኩት በሙስናውና በገንዘቡ መሰረቅ ምክንያት አይደለም። ያሳሰበኝ፤ የኢትዮጵያዊያን ሰብ አዊ መብቶች በተከታታይ መገፈፋቸው፤ የማህበረሰብ ድርጅቶች፤ ነጻ ጋዜጦችና ጋዜጠኞች፤ ተወዳዳሪ ሊሆኑ የሚችሉና የተሻለ አማራጭ ለሕዝብና ለሃገር ለማቅረብ የሚችሉ የፖለቲካ ፓርቲዎች መደምሰሳቸው፤ መናገር፤ መሰብሰብ፤ መንግሥትን መተቸት ወንጀል መሆኑ ነው። እነዚህን እሴቶች እንደምታከብሩና እንደምትታገሉላቸው አምናለሁ። ታዲያ፤ የአሜሪካ መንግሥት የሚሰጠው እርዳታ እነዚህን እሴቶች ካላጠናከረ ዘላቂ ጥቅሙ ምንድን ነው? የመናገር፤ የመሰብሰብ፤ የመከራከር፤ የመተቸት፤ የመወዳደር ወዘተ መብቶች ፍጹምና አደገኛ በሆነ ደረጃ ታፍነዋል። ሂውማን ራይትስ ወች እንዲህ ሲል አስጠንቅቆ ነበር። “የኢትዮጵያ መንግሥት በአሰቃቂ ደረጃ ከመንግሥት ቁጥጥር ነጻ የሆነውን መገናኛ ብዙሃን አውድሞታል፤ ቢያንስ ሃያ ሁለት ጋዜጠኞች፤ አሳታሚዎችና ብሎገሮችን በወንጀለኛነት ከሶ አስሯል፤ ከሰላሳ በላይ ጋዜጠኞች በፍርሃት ከሃገር እንዲሰደዱ አድርጓል።” ገዢው ፓርቲ ይኼን ሲያደርግ የሚጠቀምባቸው በ2009 ያፀደቃቸው የጸረ-ሽብርተኛና የመንግሥት ያልሆኑ የበጎ አድራጎትና የማህበረሰብ ድርጅቶችን የሚመለከቱ ሕጎችን ነው። ለነጻነት፤ ለፍትህ፤ ለዲሞክራሲና ለሕግ የበላይነት የተሟገተና የቆመ ግለሰብ ሁሉ ሰለባ የመሆን እድሉ ከፍተኛ ነው። በስራ እድል በኩል ሲታይ፤ ለገዢው ፓርቲ ወይንም ለጎሳ ጥቅም ታማኝነት ያላሳየ ሁሉ እድል አይኖረውም። አስተዳደሩ በባለሞያዎች ሳይሆን በታማኝነት ይመራል። ይኼን ሁኔታ ስታዩ፤ አፈናው፤ አድልወው፤ ጭካኔው፤ መገለሉ ወዘተ ለሰላም፤ አብሮ ለመኖር፤ ለእርጋታ አደገኛ መሆኑን ትገምታላችሁ። የአገዛዙ አፋኝነትና አግላይነት ለሽብርተኛነት አመች ሁኔታ ፈጥሯል። የአሜሪካ መንግሥት እንደዚህ ያለ አፋኝና አግላይ መንግሥት ሲደግፍ የአሜሪካን የረዢም ጊዜ ጥቅም ይጎዳል ወይንስ አይጎዳም? ብላችሁ የመጠየቅ ሃላፊነት አለባችሁ።

ይኼን አደጋ በተደጋጋሚ የምናቀርበው ኢትዮጵያዊያን ብቻ አይደለንም። በዚህ ዓመት ፍሪደም ሃውስ ስለ ዓለም ሃገሮች ነጻ መሆን አለመሆን ባወጣው ዘገባ ኢትዮጵያ ከአርባ ዘጠኝ ነጻ ካልሆኑ የአፍሪካ ሃገሮች መካከል አርባ ሶስተኛውን ደረጃ ይዛለች፤ ከኢትዮጵያ የባሱ ስድስት ሃገሮች ብቻ አሉ ማለት ነው። በተመሳሳይ፤ ዘ ኮሚቲ ቱ ፕሮቴክት ጆርናሊስትስ የተባለው ተቋም “ጋዜጠኞችን በከፍተኛ ደረጃ ከሚያስሩ ሁለት የአፍሪካ ሃገሮች መካከል አንዷ መሆኗን፤ በዓለም ደረጃ ሲታይ አራተኛ መሆኗን አመልክቷል። እንደዚህ ጨለማ በሆነ ሁኔታ ነጻና ፍትሃዊ ምርጫ ሊካሄድ አይችልም። ምርጫውን በሚመለከት በዚህ ወር ሂውማን ራይትስ ወች “ምርጫ–የኢትዮጵያን ፈለግ የተከተለ” በሚል እንዲህ ከሚል ድምዳሜ ላይ ደርሷል። “ካለፈው ምርጫ ወዲህ፤ ገዢው ፓርቲ በባሰ ደረጃ ቁጥጥሩን አጠናክሯል፤ የመናገር፤ የመሰብሰብ፤ የመደራጀት መብቶችን ከልክሏል… ኢትዮጵያዊያን ወደ ምርጫ ሲሄዱ ተቃዋሚዎች በገጠማቸው አፈና የተነሳ ያላቸው እድል በጣም የጠበበና ጨለማ የሆነ ነው።” የኢትዮጵያን ሕዝብ፤ በተለይ ተቃዋሚውን በንቀት መነፅር ያየችው የአሜሪካ የውጭ ጉዳይ ምክትል የፖለቲካ ሃላፊ ዌንዲ ሸርማን “ኢትዮጵያ ዲሞክራሲ ናት፤ ምርጫውን በሚመለከት ነጻ፤ ፍትሃዊ፤ ተቀባይነት ያለው፤ ክፍትና ሁሉን አቀፍ የሆነ ምርጫ እንደሚካሄድ እናምናለን” ያለችው ውሸት ብዙ የምእራብ ታዛቢዎችን ቁጣና ትዝብት አምጥቷል። ዋሽንግተን ፖስት የተባለው የታወቀ ጋዜጣ እሷንና የኢትዮጵያን መንግሥት በሚመለከት “የማስመሰል ምርጫ በኢትዮጵያ” በሚል አርእስት እንዲህ ብሏል። “የአሜሪካ መንግሥት የኢትዮጵያን መንግሥት ማውገዝ እንጅ ማሞገስ የለበትም።” ስለሆነም፤ የአሜሪካን መንግሥትና ሕዝብ አደራ የምለው ሽብርተኛነትን ለመከላከል በሚል ምክንያት ሽብርተኛነትን የሚፈጥርና የሚያጠናክር መንግሥት መደገፉን ያቁም ነው።
ምን አማራጭ አለ?

ጠቃሚውን ተቃውሞ ለመቀበል ፈቃደኛ የሆነን ግለሰብ ወይንም መንግሥት ለማሳመን አስቸጋሪ ነው። በእኔ ግምት ለኢትዮጵያ ዘላቂነት፤ ለመላው ሕዝቡ የኑሮ መሻሻል፤ ለአሜሪካ ዘላቂ ጥቅም አጋባብ ያለው አማራጭ ያለምንም ማወላወል ለሰብአዊ መብቶች፤ ለነጻነት፤ ለፍትህና ለሕግ የበላይነት መከበርና ለዲሞክራሲ ግንባታ ያለተቆጠበ ድጋፍ መስጠት ነው። ቢያንስ የአሜርካ መንግሥት ለራሱ ዘላቂ ጥቅም ሲል የሚለግሰውን እርዳታ በሙሉ ከሰብ አዊ መብቶች መከበርና ከዲሞክራሲ ግንባታ ጋር ማጣመር አለበት። ነጻ፤ ፍትሃዊ፤ ተቀባይነት ያለው፤ ክፍትና ውድድር ያለበት ምርጫ ለማካሄድ ቅድመ ሁኔታዎች መከበር ነበረባቸው። አለመከበራቸው ውጤቱን አስቀድሞ ወስኖታል። ገዢው ፓርቲ ያሸንፋል።

የአሜሪካን ሕዝብ፤ የምክር ቤት አባላትንና የመንግሥት ሃላፊዎችን በቀጥታ የምጠይቀው ከሕዝብ ተሰብስቦ ለኢትዮጵያ አምባገነን መንግሥት የሚሰጠው እርዳታ ከዲሞክራዊው አገዛዝ ጋር ምን ግንኙነት አለው፤ ከሌለው ለምን ለሰብአዊ መብቶች፤ ለነጻነት፤ ለፍትህ፤ ለእውነተኛ እኩልነትና ለዲሞክራሲ አትቆሙም? የሚል ነው።”
በእኛ በኩል አብሮና ተባብሮ ከመስራት ሌላ አማራጭ የለንም። የአሜሪካ ዜግነት ያለን ኢትዮጵያዊያን በያለንበት ለአሜሪካ ምክር ቤት ተወካዮች ሳንሰለች ድምፃችን ብናሰማ ከፍተኛ አስተዋፆ እንደምናደርግ አምናለሁ፤ እስቲ ያልሞከርነውን እንሞክር እላለሁ።

ለማንበብ እዚህ ይጫኑ

የኢትዮጵያ ህዝብ ነጻነቱን ተነፍጎ ባገር በቀሉ የወያኔ አፓርታይድ አገዛዝ ስረ ወድቆ ፍዳውን እያየ ነው። ስርአቱ ላለፉት 24 አመታት በሃገራችን ውሰጥ በፈጠራቸው ፖለቲካዊ፤ ማህበራዊ፤ ኢኮኖሚያዊና ስነልቦናዊ ቀውሶች ምክንያት ተተኪው ወጣት ትውልድ ባስደንጋጭ ሁኔታ በየጊዜው አገሩን ጥሎ ሲወጣ በባህር ውስጥ በመስመጥና፤ ከዛም የተረፈው በአፍሪካና በአረብ አገሮች እጅግ አሰቃቂ ለሆኑ ውርደት ስቃይና ግድያ ተጋልጧል።

ከምርጫ ሂደት ጋር በተያያዘ፤ ምርጫውን ተከትሎ ሊፈጠር የሚችለውን የህዝብ አመጽ አስቀድሞ ለማምከን በሚል ስልት በሀገር ውስጥ የሚገኙ ወጣቶችን ወጣት በመሆናቸው ምክንያት ብቻ በሺዎች የሚቆጠሩ በመታፈስና ወደ ተለያዩ እስር ቤቶች በመታጎር ላይ ናቸው። በመላው አገሪቱ ውስጥ የፖለቲካ አመራር አካላትም ይሁኑ አባላት በእስርና ወከባ ላይ ይገኛሉ። በአጠቃላይ የምርጫ ምህዳሩ ዝግ መሆኑ እየተገለጸ በሚገኝበት ሂደት ውስጥ ያለነጻነት ነጻና ፍትሃዊ ምርጫ ማድረግ ስለማይቻል ህዝባችንን ወደ ፍትሃዊና ዲሞክራሲዊ ስርአት የሚያሸጋግረው ውጤት ይገኛል ብለን አናምንም።

በማንኛውም አገር በሚደረጉ የምርጫ ሂደት ላይ የጎላ ሚና ሊጫወቱ የሚችሉ ተቋማትና ድርጅታዊ እንቅስቃሴዎች ምን አህል እንደታፈኑ በአጭሩ በማስረጃ ለማስደገፍ ያህል፤ በርካታ የህዝብ ወገንተኛና የተቃዋሚ ድርጅት መሪዎች፤ አባላትና ደጋፊዎቻቸው፤ ጋዜጠኞች ጦማሪያን በግፍ ታስረው በድቅድቅ ጨለማ በእስር ቤት ውስጥ ባስቸጋሪ ሁኔታ ላይ ይገኛሉ። ኢትዮጵያውያን ሙስሊሞች ከውጭ የመጣ መንግሥታዊ ሃይማኖት ሊጫንብን አይገባም በማለታቸው ብቻ መሪዎቻቸው በአሸባሪነት ተፈርጀው በእስር ቤት እየተሰቃዩ ነው። ህወሓት ከጥንስሱ፤ የኢትዮጵያ ኦርቶዶክስ ተዋሕዶ ቤተ ክርስቲያን፤ የኢትዮጵያ አንድነት መሰረት ነው ከሚል መነሻ፤ በዋና ጠላትነት በመፈረጅ መንበረ ስልጣኑን ከመቆጣጠሩ በፊትና በሗላ በካህናት፤ ምእመናንና በታሪክ ላይ ተከታታይና ከፍተኛ ወንጀል በመፈጸም ላይ ነው። የፖለቲካ ፓርቲዎች እንዲፈርሱ ሆነዋል። ተቃዋሚውን የሚደግፉ ዜጎች ሥራ አያገኙም፤ ከሥራም ይባረራሉ። እጩነት በእጣ ሆኗል። የምርጫ ቦርዱ በአገዛዙ ቁጥጥር ሥር ነው። ተቃዋሚዎች በነፃነት ተንቀሳቅሰው ማደራጀት አይችሉም። ዓለም አቀፍ የምርጫ ታዛቢዎች የሉም። መገናኛ ብዙሃንን አገዛዙ ተቆጣጥሮታል። ጋዜጠኞች ተሰደዋል። ነፃ የፍትኅ ተቋም የለም። ሰብዓዊ መብትን እያፈነ ሽብርተኝነትን እዋጋለሁ በሚል ሰበብ ከምዕራቡ ዓለም በሚያገኘው ዕርዳታ ተቃዋሚውን ያፍናል፤ ምዕራባውያንን ያሞኛል። እነኚህን መሰረታዊ ችግሮች በመረዳት ለመጀመሪያ ጊዜ የአውሮፓ የጋራ ማህበር በምርጫው አንደማይሳተፍ ይፋ አድርጓል።
ከላይ በጥቂቱ የተዘረዘሩትን ኩነቶች ስንገነዘብ የምርጫው ውጤት አስቀድሞ መታወቁን ለማወቅ አዳጋች አይሆንም። አምባገነኑ የወያኔ አገዛዝ ይህንን ምርጫ ለይስሙላ ዲሞክራሲ ለውጭ መንግስታት ገጸ በረከት ለማቅረብና ዓለም አቀፍ እውቅና በማግኘት ለቀጣይ ተመሳሳይ አስርተ ዓመታት ሀገሪቷን በመግዛት የስልጣን ጥሙን ሊያረካበት የተዘጋጀ መሆኑን በግልጽ እንረዳለን።

ህዝባችን ላለፉት 24 አመታት ያለነጻነት በወያኔ የግፍ አገዛዝ ስር ፍዳውን በሚያይበት በዚህ ወሳኝ ወቀት ስርአቱን ለማስወገድ ህዝብን መሰረት ያደረገ ባንድ ማከል የሚንቀሳቀስ ሁሉን አቀፍ ያማራጭ አካል በማቋቋም የህዝባችንን እምቢተኝነት በተማከለ ሁኔታ ለመምራት የተቃዋሚው ኃይል በሙሉ ባስቸኳይ ተሰባስቦ አማራጭ ኃይል ሆኖ መቅረብ የወቅቱ ጥያቄ መሆኑን በመረዳት የእንሰባሰብ ጥሪያችንን እናቀርባለን።

ቀጥለው የተዘረዘሩት ድርጅቶች፤ ከላይ የተገለፁትን ችግሮች የኢትዮጵያ ህዝብ ለነፃነቱ የሚያካሂደው ትግል ላይ የሚያስከትሉትን አስከፊ አደጋዎች ከወዲሁ በመረዳት፤ በዋነኝነት ደግሞ ብሄራዊና ወቅታዊ ጉዳዮችን በማስቀደም፤ የአማራጭ ሃይል ባስቸኳይ የሚቋቋምበትን ሁኔታዎች ለማመቻቸት ከፍተኛ ጥረት በማድረግ ላይ መሆናቸውን እየገለፅን፤ ሁሉም የፓለቲካ ድርጅቶች የጉዳዩን አሳሳቢነት በመረዳት የጋራ አቋም ላይ እንዲደርሱ ጥሪያችንን በአክብሮት እናቀርባለን።

በዚህ አጋጣሚ ነጻነት ናፋቂ ለሆነው ወገናችን ለማሳሰብ የምንወደው፤ ይህ መሰረታዊ ጉዳይ የፖለቲካ ድርጅቶች ሀላፊነት ብቻ አለመሆኑን ተገንዝቦ አገርና ህዝብን ለነጻነት ለማብቃት አስፈላጊውን ተሳትፎ እንዲያደርግ አገራዊ ጥሪያችንን በአክብሮት እናስተላልፋለን።

ይህን አደገኛ የቁልቁለት ጉዞ እንዲገታ በጋራ እንቁም!
የኢትዮጵያ ህዝብ የጋራ ትግል ሸንጎ (SHENGO)
የኢትዮጵያ ብሄራዊ የሽግግር ምክር ቤት (ENTC)
የኢትዮጵያ ሙስሊሞች ሰላማዊ ንቅናቄ ደጋፊዎች ህብረት (UEM-PMSG)
የኢትዮጵያ ወጣቶች ብሄራዊ ንቅናቄ (EYNM)

ይሄ ሁሉ ናዳ ይህ ሁሉ ውርጅብኝ
እንደ ዝናብ ወርዶ የሚቀጠቅጠኝ
ህሊናን አስቶ የሚደበድበኝ፤
ተስፋየን አሟጦ፡
በጭካኔ ረግጦ፤
ሙቀትና ብርዱ
አዘቅቱ ንዳዱ፡
ችግር ቸነፈሩ
ስቃይ ግርግሩ
መከራው በርትቶ የሚያደናግረኝ
ምንድነው ነገሩ? ግራ ግብት አለኝ!?
እኮ ለምን ሆነ?በኔ ጠነከረ፤
ጥላቻና ክፋት እየተካረረ፡
ግድያና እስራት፡
ወከባና እንግልት፡
ምነው እንዲህ ሆነ?
ተደጋገመብኝ፡ በረታ ጨክነ፡፡
ዘመኑን አርዝሞ፡
ክንዱን አፈርጥሞ፡
በላዩ ላይ ቆሞ፤
ይሄ ሁሉ ናዳ፤ ይህ ሁሉ ውርጅብኝ
እንደዝናብ ወርዶ የሚቀጠቅጠኝ
ህሊናን አስቶ የሚደበድበኝ፤
እኮ ለምንድን ነው!?
በኔ ላይ የሆነው?

መካን ወላድ ሆኜ፡ በሃዘን ቆዝሜ
ዘመናት አለፉ በተስፋ ደክሜ፤
ልጆቼን እያየሁ በዘር ተከፋፍለው፡
መተማመን ጠፍቶ በመሃከላቸው፤
ማየት መመልከቱ፤
በቃኝ ምርር አለኝ፡
መታገስ አቃተኝ፡፡
የንጹሃንን ደም በውስጤ ማድረቁ፡
የእናቶችን እንባ መዋጥ መሰልቀጡ፡
ያባቶችን ቁጭት ቆሞ መመልከቱ፡
መሸከም አቃተኝ ከበደኝ እውነቱ፡፡

አንዱ በሌላው ላይ በግዴታ ነግሶ፡
ሲፈልገው ገድሎ፤ ሲፈልገው ከሶ
ሲያሻው አንገላቶ፤ ወይ ካገር አባሮ፡
ወንድም በወንድሙ በሃሰት መስክሮ
አሽቀንጥሮ ጥሎ እስር ቤት ወርውሮ፤

ይኖሩባት ምድር፤ የሚጠሯት ሀገር፡
መሆኑ ሰለቸኝ አረገኝ ድንግርግር፡፡
እምባ ውሃ ሆኖ፡ ወደ ውስጤ ሲፈስ፡
ላብና ንጹህ ደም ምድሬን ሲያረሰርስ፤
ዘመናት ተቆጥረው ዘመኑ ሲመለስ፡
ውርጅብኙ አልቆመም
እስከዛሬ ድረስ፡፡
ይሄ ሁሉ ናዳ፤ ይህ ሁሉ ውርጅብኝ፡
እንደዝናብ ወርዶ የሚቀጠቅጠኝ፡
ህሊናን አስቶ የሚደበድበኝ፤
አሁንስ በዛብኝ፡
መሸከም አቃተኝ፡፡
ንጹህ ደም አፍስሶ
ሜዳ ላይ አርክሶ
አንዳንዱንም ከሶ
ከርቼሌ አበስብሶ
ልጁን ሚስቱን አቅፎ በሰላም አዳሪ
ህሊና የሌለው እውነትን ቀባሪ
በደም የሚቀልድ፤
በእንባ የሚዝናና ደረቅ አይነ ሌባ
የ’ህዝብ ነኝ’ ብሎ ወጥቶ የሚገባ
ከንቱ የሞላባት የከንቱዎች ምድር
ተብሎ መጠራት የባለዶች ሃገር:
ይብቃ ይቁም አሁን
ከመሃል ይቀስቀስ
ክምሩም ይደርመስ
ግፉ ይብቃ ይፍረስ

ቀና ልበል ዛሬ፤ ይድረስ ለኔ ወጉ፡
ጨለማው ተገፎ ይጥራ ጥጋጥጉ፡፡
ሜይ 21/2015

ለማንበብ እዚህ ይጫኑ

የኢትዮጵያ ወጣቶች ድምጽ አዳዲስ ዜና ዘገባዎችን እና ካለፈው የቀጠለ የሰሃራ በረሃ ተጓዦች ትዝታን የሚያስቃኝ ትረካ ቀጣዩን ክፍል 3 እና 4 ይዘን ልናስደምጣቹ ተዘጋጅተናል::የቀድሞ አንድነት ፓርቲ ምክትል አፈ ጉባዬ እና የፋይናንስ ዘርፍ ሃላፊ አቶ ጸጋዬ አላምረው ከስደት ካሉበት ያሳለፉትን የፖለቲካ ሕይወት እና የአንድነት ፓርቲን በተመለከተ ያደረጉት ቃለመጥይቅ በዚህ ፕሮግራም ይቀርባል:: ለማዳመጥ እዚህ ይጫኑ!!

የ”ምርጫው” ድራማ እየተተወነ ሳለ፤ የቦርዱ ሊቀመንበር ዶ/ር መርጋ በቃና እና ምክትል ሊቀመንበሩ ዶ/ር አዲሱ ገብረእግዚአብሔር ለአቦይ ስብሃት ስልክ ደወሉ።
“ሃሎ?”
“ሃሎ፣ አቦይ ስብሃት ኖት?”
“ነኝ፣ ምን ፈለግክ?”
“ዶ/ር መርጋ በቃና እና ዶ/ር አዲሱ ገብረእግዚአብሔር ነን።”
“ችግር መስማት አልፈልግም። የታዘዛችሁትን አደረጋችሁ?”
“99.8% ህዝብ አልመረጠንም። ግን በታዘዝነው መሰረት ውጤቱን ገልብጠነዋል!”
“0.2% ብቻ ነው የመረጠን ማለት ነው?”
“አዎን ጌታዬ። ሌላ ምን እንታዘዝ?”
“99.8% ህዝብ የስም ዝርዝሩን አንብብልኝ።” አሉ አቦይ ስብሃት እየተባለ ይወራል።

አንድ ወዳጄ ስለ አቦይ ስብሃት የነገረኝ ታወሰኝ። ሰውዬው ከግመል እንኳን የማይሻል እንስሳ ብጤ ነው። ግመል ሳትጠጣ ለቀናት ትሰራለች አቦይ ስብሃት ደግሞ ሳይሰራ ቀኑን ሙሉ ይጠጣል። አብዛኞቹ የህወሃት አባላት እድሜያቸው እንደ አስተሳሰባቸው ስላረጀ ጨዋታቸው ከውሃ ጋር ነው። ከውድ ውሃ ጋር! ድንጋይን ውሀ ያስጮኸዋል!
ሜዳው የኢህአዴግ፣ ዳኛው ኢህአዴግ፣ ታዛቢው ኢህአዴግ፣ ድምጽ ቆጣሪው ኢህአዴግ እንዲሆን ተደርጎ የተዘጋጀው “ምርጫ” እነሆ ተጠናቀቀ። በአፈና የታጀበው ምርጫ ጸጥ-እረጭ ባለ ድባብ ተጠናቅቋል። ልክ አስገድደው እንደሚደፍሩ ወሮበሎች፤ በሃይል ጠልፈው ያላቻ ትዳር እንደሚመሰርቱ ጉልበተኞች፣ የኢትዮጵያ ሕዝብ ያለፍቃዱ እንደገና የአምስት አመት የትዳር ቁርኝት ውስጥ ገብቷል። ሌላ አምስት አመት። ሌላ የህወሀት ዘመን። ሌላ የጥርነፋ ዘመን! ሌላ የቁምራ ዘመን! ሌላ የመፈናቀል ዘመን! ሌላ የመሬት ነጠቃ ዘመን! ሌላ የስደት ዘመን!…

የህወሃት ሰዎች አሁን የጭንቀቱ ምእራፍ ሁለት ላይ ናቸው። በዛሬው እና በትላንቱ እለት የህወሃት ባለስልጣናት ተሰባስበው በፐርሰንቱ ምደባ ላይ ውይይት ይዘዋል። ዘረፋው ላይ ሁሉም በ 100% ይስማማሉ። ምደባው ላይ ግን ችግር አለ። አንዳንዶቹ ይህ ጉዳይ ተአማኝነት እንዲኖረው ለተቃዋሚዎቹ ትንሽ መልቀቅ ይኖርብናል ሲሉ ለሎች ደግሞ ይህንን ሃሳብ ይቃወማሉ። ጥቂት ተቃዋሚዎችን ፓርላማ እንዲገቡ መፍቀድ አለብን የሚሉ ተከራካሪዎች “ሌባ ከሰረቀው ጥቂቱን ቢሰጥ” እንደማይጎዳው ይናገራሉ። ይህንን የማይቀበሉት ግን የተቃዋሚዎች በፓርላማ መግባት ራስ ምታት እንደሚሆንባቸው በስፋት መክረዋል። 547 መቀመጫ የነበረው የቀድሞው ፓርላማ ውስጥ እውነትን የያዘ አንድ ተቃዋሚ ብቻ ጭንቅላታቸውን በጥብጦት እንደነበር ሁሉም አይዘነጉትም። ይህንን በድጋሚ መፍቀድ አልያም ውግዘቱን በመቀበል መሃል ባለ አጣብቂኝ ውስጥ ከርመዋል። ውጤቱን ከሰሞኑ ይፋ ያደርገዋል ዶ/ር መርጋ።

የዘንድሮው ዝርፍያ ጤናማ አይደለም። ልክ እንደ ቦራት ዘ-ዲክታተር ፊልም ተወዳዳሪዎችን እግር እግራቸውን እየመቱ ለብቻ ሮጦ፤ በራስ ዳኛ የድል ዋንጫ መረከብ? ይህ በእውነት በዚህ በ21ኛው ዘመን እጅግ የሚያሳፍር ተግባር ነው። ተቃዋሚ ሃይሎች በምርጫው ክርክር እና በትውልድ ስፍራቸው ላይ የነበራቸው የሕዝብ ድጋፍ ምን ያህል እንደሆነ በግልጽ በታየበት ሁኔታ ህወሃቶች 100% አሸንፈናል ሲሉ ከሌብነታቸው ይልቅ ንቀታቸው ጥርስ የሚያስነክስ መሆኑን ለአፍታ እንኳ አላስተዋሉትም። እጅግ ትንሽ ጭል ብላ የነበረችውን ዲሞክራሲ በምድረ ኢትዮጵያ ገድለው፣ ከፍነው ቀበሩት። አዲዮስ ዲሞክራሲ…
ፈረንጆች የሚሉት አባባል አለ። “ለነብሰ-ገዳዮች ትክክለኛ ዲሞክራሲ ማለት ፍጹም አንባገነን መሆን ነው።”

“በ100% ድምጽ ተመርጠናል!” አሉ። የመረጣቸው ህዝብ የቱ ይሆን? በአዲስ አበባ በነቂስ ወጥቶ “ወያኔ በቃን! መንግስቱ ይግደለን” ያለው ህዝብ ነው ወይንስ ለም መሬቱን ተነጥቆ ለባእድ የተሰጠበት የገጠር ህዝብ? በጋምቤላ፣ በቤንሻንጉል፣ በሁመራ…ወዘተ የተፈናቀለው ህዝብ ነው የመረጣቸው? ወይንስ አምቦ – ጉደርን እንደ ሱናሚ ያጥለቀለቀው ህዝብ ? የቱ ነው ወያኔን የመረጠው? ከስርአቱ ጋር ሆድና ጀርባ የሆነው ሙስሊሙ እምነት ተከታይ ነው ወይንስ በእምነቱ ጣልቃ እየገቡ ካድሬ ጳጳስ የሚሾሙለት ክርስቲያኑ ህብረተሰብ? ማን ነው ህወሃትን የመረጠው? እንደ ምጽዓት ለስደት እያኮበኮበ ያለው ስራ-አጥ ወጣት ነው ወይንስ በአነስተኛና ጥቃቅን ተደራጅቶ ድንጋይ የሚፈልጠው ወጣት ምሁር? መብራት እና ውሃ በፈረቃ ያደረጉበት ህዝብ ነው የመረጣቸው?… ለመሆኑ ስንት አመት ነው ህዝቡ ላይ እንዲህ የሚቀልዱት?

እነሱ ልባቸው በትእቢት ስለተወጠረ፤ ሌላው ህዝብ የማይመለከትና የማይሰማ ይመስላቸው ይሆናል። ትእቢት ደግሞ የውድቀት ምልክት ናት። በመጀመርያ የውጭ ታዛቢዎች እንዳይገቡ ተደረገ። ዝም! በምርጫው ወቅት ደግሞ የተቃዋሚ ፓርቲ ታዛቢዎችን አሰሯቸው። አሁንም ዝም ተባለ። ከዚያ ኮሮጆ እየተሞላ ቀረበና በቁም ያሰሯቸው ታዛቢዎችን ምሽት ላይ ፈትተው እንዲፈርሙ አዘዝዋቸው። የተያያዙት አስገድዶ መድፈር ነውና አንዳንዱን አስገድደው በተሰረቀ የድምጽ ሳጥን ላይ አስፈረሟቸው። ምርጫ 2007 በዚህ ሁኔታ “ሰላማዊ፣ ፍትሃዊ፤ ዲሞክራሲያዊና የህዝብ ተዓማኒነትን አግኝቶ” ተጠናቅቋል ሲሉ ፕ/ር መርጋ በቃና አበሰሩ። እኚህ ፕሮፌሰር ግን ህሊና ይኖራቸው ይሆን? ካላቸው በምን ለወጡት? በገንዘብ? ህሊና ስንት ያወጣል?
አለም አቀፍ መገናኛ ብዙሃን ከምርጫው በኋላ ስላለው ነገር ብዙም አላሉም። ማን እንደሚያሸንፍ እና በምን ያህል ድምጽ እንደሚያሸንፍ አስቀድመው ዘግበው ስለነበር ውጤቱን መድገም የፈለጉ አይመስልም። አስቀድሞ ውጤቱ የታወቀበት ምርጫ መሆኑን አለም አቀፍ መገናኛ ብዙሃን ብቻ ሳይሆኑ፣ ራሱ የምርጫው ቦርድ በድረ-ገጹ ላይ በግልጽ አስቀምጦት ነበር። የምርጫው ቦርድ በድረ-ገጹ እንዳስቀመጠው የኢሕአዴግ 501 ተወዳዳሪዎች የተመዘገበለት ሲሆን መድረክ 270፣ የሰማያዊ ፓርቲ 139 እጩዎች ብቻ እንዲኖራቸው ተደረገ። የሰማያዊ ፓርቲ 200 እጩዎች በምርጫ ቦርዱ ተሰርዘውበታል። 108 እጩዎች አስመዝግቦ የነበረው አንድነት ፓርቲም ስልታዊ በሆነ ዘዴ በቦርዱ እንዳይሳተፍ ታግዷል። ይህ እንግዲህ በሎተሪ ሰበብ የተገለሉትን ሳይጨምር ነው።
መቼም ይታገሉታል እንጂ አይታደሉትምና ቀኑ እስኪደርስ የኢትዮጵያ ሕዝብ ባልፈለገው ሊገዛ፤ ባላመነበት ሊዳኝ፣ ባልመረጠው ሊተዳደር ነው። አሁንም ዝምታን መርጧል። ዝምታ ራሱን የቻለ መልስ ነው። በዝምታ የተዋጠች እያንዳንድዋ ሰከንድ ቁርሾ ይዛ ማለፍዋም ግልጽ ነው። ማሰብ ላልተሳነው ሁሉ ዝምታ ያስፈራል። ምጥና ውሃ ሙላት በድንገት እንዲሉ ዝም ያለ ወራጅ ሲወስድ አይታወቅም። ጽዋም ሲሞላ ይፈስሳል…
አለም-አቀፉ ህብረተሰብም ዝርፊያውን ስለለመደው ችላ ብሎታል። የእንግሊዙ “ዘ ጋርዲያን” ጋዜጣ “ምርጫውን ለአብዛኛው ኢትዮጵያዊ እንደ አንድ ክስተትም አይቆጥረውም።” ሲል፣ ሂዉማን ራይትስ ዎች፤ አምነስቲ ኢንተርናሽናል፣ ፍሪደም ሃውስ፣ ሲፒጄ፣ የመሳሰሉት አለም አቀፍ የመብት ተከራካሪ ተቋማት አፈና የሰፈነበት እና ነጻ ሜድያ በሌለበት ሁኔታ የሚካሄደው ይህ ምርጫው ፍሱም ኢ-ፍትሃዊ እንደነ ገልጸዋል። አልጃዚራ፣ ዋሽንግተን ፖስት፣ ኒውዮርክ ታይምስ የመሳሰሉ ታላላቅ ሜድያ ውጤቱ አስቀድሞ የታወቀ ምርጫ ሲሉ ሂደቱን በክፉ ኮንነውል።

ነገሩ ግልጽ ነው። ነጻ ሜድያ በሌለበት፣ ገለልተኛ ታዛቢዎች ባልተፈቀዱበት፣ ነጻ ዳኛ በልተመደበበት ነጻ ምርጫ አይታሰብ። የዘንድሮው ክስተት ህወሃት የዘረፋ ደረጃውን ያወረደበት ምርጫ ነው። ከረቀቀ የዘረፋ ስልት ወደ ግልጽ የውንብድና ተግባር።

የጀርመን ድምጽ እንግሊዝኛው ክፍል ከምርጫው በኋላ ምንጮችን ጠቅሶ ሲዘግብ “ታዛቢዎ የቁም እስር ላይ ስለነበሩ ወደ ውጭ ወጥተው ምርጫውን መታዘብ አልቻሉም” ብሏል። የሰራዊት እና የሚሊሽያ አባላት በየምርጫ ጣብያው እየተገኙ መራጮችን እያስፈራሩ የተካሄደ ምርጫ በአለም ላይ ይህ ብቻ ነው። የምርጫ ዘመቻም በታጠቁ ሃይሎች ወታደራዊ ትእይንት የተካሄደው በኢትዮጵያ ብቻ ነው።
30 አመት ሙሉ ያል ህዝብ ፍቃድ በስልጣን መቆየት ይሰለቻል። እነዚህ ሰዎች የምእተ አመቱን አንድ አራተኛ የሃገሪትዋን ሃብት ብቻ ሳይሆን የህዝብን ድምጽም እየዘረፉ ተቀመጡ። ባለፉት 24 አመታት በአሜሪካ አምስት ግዜ መንግስት ተቀይሯል። በሆላንድ 7 ግዜ መንግስት ወርዶ በህዝብ ድምጽ ሲቀየር አይተናል። አፍሪካዊቷ ጋና አምስት ግዜ ፕሬዝዳንታዊ ምርጫ ፣ ሶስት ግዜ ፓርላሜንታዊ ምርጫ አድርጋለች።… ያልታደልን ወይንም ያልታገልን እኛ ግን ለ30 አመታት በአንድ አንባገነን ተይዘናል።
ህወሃቶች በሩን ሁሉ ዘግተው ህዝቡን ወደማይፈለገው አመጽ እየገፉት ነው። ያልተረዱት ቢኖር አንደኛው በር ሲዘጋ ሌላኛው በር መከፈት መቻሉን ነው። የ90 ሚሊዮን ህዝብን ድምጽ ሰርቀው፣ አንደበቱን ለጉመው ምን ያህል እንደሚዘልቁ የምናየው ይሆናል። መቶ አመት የዘለቀ አንባገነን በታሪክ አልተከሰተም።
ከዚህ ቀደም ባስነበብኳችሁ ቀልድ ጽሁፌን ልቋጭ። አንድ የህንድ ኢንቨስተር አዲስ አበባ ዮሴፍ ቤተ ክርስቲያንን የቀብር ስፍራ አይቶ በሊዝ ሊገዛ ፈለገ። የአዲስ አበባ ባለስልጣናትን ጠርቶ እንዲሸጡለት ጠየቀ። ባለስልጣናቱም መልሰው ሌሎች ቦታዎች ሳያልቁ የቀብር ስፍራ ለግዜው እንደማይሸጡለት ነገሩት። ህንዱ መለሰና መከራቸው። “እኛ አገር ሰው ሲሞት እናቃጥላለን እንጂ አንቀብርም። ለምን ይህን ለም ቦታ ታባክናላችሁ?” አላቸው። ባለስልጣናቱም መለሱ፣ “እኛ አገር ደግሞ ሰውን በቁሙ እንጂ ሲሞት አናቃጥልም!”

ገና ከጅምሩ፣ የተቃዋሚ ፓርቲወችን በመበታተን፣ መሪዎችንና አባላቶቻቸውን በማሰር፣ በማሳደድና በማዋከብ፤ ነጻ የሃሳብ ልውውጥ እንዳይኖርና አማራጭ ሃሳቦች ለህዝብ እንዳይደርሱ ነጻ የመገናኛ ብዙሃን ጋዜጠኞችንና ጦማራውያንን በግፍ ወደ እስር ቤት በመወርወርና የሚወዷትን ሀገራቸውን ጥለው እንዲሰደዱ በማድረግ፤ ከአገዛዙ ጋር እጅና ጓንት ሆኖ በጭቆና መሣርያነት የሚያገለግለውን የምርጫ ቦርድ በመጠቀም ተቃዋሚ ፓርቲዎችን በማፈራረስ የጀመረው ምርጫ ተብየ በትናንቱ እለት ተካሂዷል።

በዚህ ምርጫ ተብየ፣ የተስተዋለው ድባብ ተቃዋሚ የፖለቲካ ድርጅቶችን መፈናፈኛ በሚነሳ ሁኔታ እግር ከወርች አስሮ በተለያየ አሻጥር ቀፍድዶ እንዳይንቀሳቀሱ የሆነበት አካሄድ በግልጽ ሲታይ በአኳያው ደግሞ የገዠው ፓርቲ የሀገሪቱን ሀብትና ንብረት ገደብ በለለው ሁኔታ ለራሱ ጠቀሜታ እንደፈለገ ሲያውላቸው ተስተውሏል።

በሃገሪቱ ሙሉ ለሙሉ ማለት በሚቻል መልክ ገዠው ፓርቲ በብቸኛነት ተወዳዳሪም፣ አወዳዳሪም፣ ታዛቢም የሆነበትና የገዝው ወያኔ/ኢህአዴግ ካድሬዎች በምርጫ ጣቢያዎች በመገኝት ድምጹን ለመስጠት የተሰለፈን ህዝብ አንድ ባንድ የገዠውን ቡድን እንዲመርጡ በማሰፋራራት፣ አልፎ ተርፎም “እዚህ ላይ ምልክት አድርጉ” በማለት ከገዥው ቡድን ውጭ ማንንም እንዳይመርጡ በማድረግ ተግባር ላይ ተሰማርተው እንደዋሉ ተስተውሏል።

የሀገሪቱ ጠቅላይ ሚኒስቴር “ማን እንዳሸነፈ መናገር የሚችለው ምርጫ ቦርድ ብቻ ነው” ብሎ እንዳላለ ሁሉ የድምጽ መስጠቱ ሂደት እንደተጠናቀቀ ብዙም ሳይቆይ የራሱን ትእዛዝ ጥሰው የገዥው ቡድን ደጋፊ የሆኑ መገናኛ ብዙሀን (ለምሳሌ አይጋ ፎረም የተሰኝው ድረገጽ) “አዲሰ አባበን ሙሉ በሙሉ ኢህአዴግ አሽንፏል፣ የመድረክ መሪዎች የሆኑት ፕሮፊሰር በየነ ጴጥሮስ እና ዶክተር መረራ ጉዲና ተሸንፈዋል፣ ኢህአዴግ በመላው ሀገሪቱ አሽንፏል”…. ወዘተ የሚል ዜና አሰራጭተዋል።
እጅግ የሚያሰገርመው ደግሞ፣ ኢህአዴግ አሽንፏል፣ የተቃዋሚ ድርጅቶች አመራር አባላትም ተሸንፈዋል የተባለው፣ ድምጽ ተቆጥሮ ሳያልቅ መሆኑ ነው።

ይህ ታዲያ የሚያሳየው የተሰጠው ድምጽ ዋጋ እንዳልነበረው እና በያንዳንዱ የምርጫ ጣቢያ ማን እንደሚያሸንፍ በወያኔ/ ኢህአዴግ እና ይህንኑ ጉዳይ ለማስፈጸም ባቋቋመው ምርጫ ቦርድ ቀድሞ እንደተወሰነ ነው።
ባጠቃላይ ፣ ቅድመ ምርጫ የነበረው አካሄድ፣ በምርጫ መዳረሻ የተከሰቱት የመብት ረገጣዎች እና በምርጫው ቀን የተከሰተው ሁሉ ፣ ምርጫው በምንም መልኩ ፍትሃዊም ሆነ ዴሞክራሲያዊ እንዳልነበረ በትክክል የሚያሳዩ ነበሩ። በአጠቃላይ ፣ ምርጫ ተብየው በምንም መልኩ አንድን ምርጫ ነጻና ፍትሃዊ ለማለት የሚያሰችሉ መመዘኛዎችን አላሟላም።

ይህ ሁኔታ በሀገራዊ ደረጃ ለአምስተኛ ጊዜ መደገሙ አሳፋሪ ብቻ ሳይሆን አሳዛኝና እጅግ ታላቅ ቁጣን የሚቀሰቅስ ተግባር ነው። የኢትዮጵያ ህዝብ የጋራ ትግል ሽንጎ (ሽንጎ) የዚህን የተጭበረበረ ምርጫ አካሄድና ውጤት ሙሉ በሙሉ አይቀበለውም። የተፈጸመውን የመብት ረገጣም ያወግዛል።

የህዝብን መብት እየረገጡ ተደላድሎ በስልጣን ለመቀጠል ማሰብ ከታሪክም ከአካባቢ ሁኔታም አለመማር ነው።ህዝብ መብቱ ሲረገጥ አንገቱን ደፍቶ መገዛቱን ይቀጥላል ብሎ መገመት ደግሞ ከተራ ትምክህት የሚመነጭ ቅዠት ብቻ ነው። ወያኔ/ኢህአዴግ እና ተባባሪው የምርጫ ቦርድ ይህ የህዝብ መብት መጣስ ሊያስከትለው ለሚችለው ማንኛውም አደጋ ተጠያቂ እንደሚሆኑ ከወዲሁ ልናሰምርበት እንወዳለን።
ለኢትዮጵያ ህዝብ እና የህዝባችንን መብት ለማስከበር ለተንቀሳቀሱ ድርጅቶች ሁሉ ያለንን አክብሮት እየገለጽን የተነጠቅነውን መብታችንን፣ የታፈነውን ድምጻችንን፣ የተገፈፍነውን የዜግነት ክብራችንን ለማስከበር፣ የጋር ትግሉን በአዲስ ስሜት፣ በህ ብረት፤ አስፈላጊውን መስዋዕት በመክፈል ቆርጠን አንድንቀጥል ጥሪያችንን እናሰማለን።
ድል ለኢትዮጵያ ህዝብ
የኢትዮጵያ ሕዝብ የጋራ ትግል ሸንጎ

ለማንበብ እዚህ ይጫኑ

የኢትዮጵያ ብሄራዊ የሽግግር ምክር ቤት፤ የኢትዮጵያ ሕዝብ የጋራ ትግል ሸንጎ፤ የኢትዮጵያ ወጣቶች ብሄራዊ ንቅናቄና የኢትዮጵያ ሙስሊሞች ሰላማዊ ንቅናቄ ደጋፊዎች ኅብረት ጋር በተደረጉ ተከታታይ የሁለትዮሽ ውይይቶችና ስምምነቶች፡ ህዝባችን ላለፉት 24 ዓመታት ያለነፃነት በህወሓት የግፍ አገዛዝ ሥር ፍዳውን የሚያይበት ዋና ምክንያት፤ ሕዝብን መሠረት ያደረገና ብሄራዊ ጥቅምን ያስቀደመ፤ በአንድ ማዕከል የሚንቀሳቀስ ሁሉን አቀፍ የአማራጭ አካል በማቋቋም ሥርዓቱን ለማስወገድ አስፈላጊውን ትግል የማድረግ ቁርጠኝነቱ በተቃዋሚው ጎራ ያለመኖሩ ዋና ጉዳይ መሆኑን የጋራ ግንዛቤ ላይ ደርሰናል። ይህን አዙሪት በመስበርና ሁኔታዎችን በጋራ በማመቻቸት የአማራጭ ኃይሉ በአስቸኳይ እንዲቋቋም ስምምነት ላይ መድረሳችንንም በተከታታይ ባወጣናቸው የሁለትዮሽ መግለጫዎች ይፋ መሆናቸው የሚታወስ ነው።

ሥርዓቱ ባሳለፍነው ሳምንት ውጤቱ ምን ሊሆን እንደሚችል አስቀድሞ የታወቀውን የህወሓት/ኢህአዴግ የምርጫ ድራማ በማካሄድ፤ ሕዝብን ተስፋ በማስቆረጥና ግፉን አሜን ብሎ በመቀበል፤ ቀደም ሲል ሲያደረግ የነበረውን ሀገር የማፈራረስ ሂደትና የሕዝብን ስቃይ የሚያበዛ አገር በቀል የአፓርታይድ አገዛዝ ለቀጣይ አምስት አመታት ለማስቀጠል የሚያስችለውን ህጋዊ ሽፋን በማመቻቸት ላይ በሚገኝበት በዚህ ወሳኝ ወቅት፤ አገር አድን የምክክር ጉባዔ በማድረግ በሕዝብ ተቀባይነትና ታማኝነት ያለው ሁሉን አቀፍ የአማራጭ ኃይል በማቋቋም ትግሉን በተጠናከረ ሁኔታ መቀጠል ወቅታዊና አስቸኳይ ነው።

ከላይ በመግቢያው ላይ የተዘረዘሩት ድርጅቶች፤ ከተለያዩ አክቲቪስቶችና ታወቂ ግለሰቦች ጋር በመሆን ከጁላይ 2-3 የምክከር ጉባዔ በጋራ ያዘጋጃሉ። የጉባዔውን ውጤት ለማሳወቅ ሕዝባዊ ስብሰባም ይዘጋጃል። የመሰብሰቢያ ቦታ፤ ዝርዝር ፕሮግራሞችና ተያያዥ እንቅስቃሴዎችን በተከታታይ እንደምናሳወቅ ከወዲሁ መግለጽ እንወዳለን።

ስለዚህ፤ መላው የኢትዮጵያ ሕዝብ፣ የፓለቲካ ድርጅቶችና የሲቪክ መኅበራት፣ የነገ ሀገር ተረካቢ የሆናችሁ ወጣቶች፤ በሀገራችን ነፃነት ሠላም እኩልነትና ፍትኅ ይሰፍን ዘንድ የምትተጉ የቴሌቪዥንና የሬዲዮ አዘጋጆች፣ የፓልቶክ ክፍሎች፣ ጋዜጠኞች፣ አክቲቪስቶች፣ ምሁራንና የሀገር ሽማግሌዎች፣ የእምነት አባቶች፤ እንዲሁም ለሀገር ደህንነት ተቆርቋሪ የሆናችሁ ዜጐች በሙሉ፤ የሚገነባው የተባበረ አማራጭ ኃይል ባለቤት እንደመሆናችሁ መጠን የሂደቱ ቀጥተኛ ተሳታፊ በመሆን፤ በሀገራችን ነፃነት እውን እንዲሆን በሚደረገው ወሳኝ ሕዝባዊ ትግል ውስጥ የበኩላችሁን አስተዋፅዖ ታበረክቱ ዘንድ፤ እንዲሁም በሕዝባዊ ስብሰባው ላይ ንቁ ተሳትፎ እንድታደርጉ አደራ እያልን በአክብሮት ሀገራዊ ጥሪያችንን እናቀርባለን።

ይህ አደገኛ የቁልቁለት ጉዞ እንዲገታ በጋራ እንቁም!

የኢትዮጵያ ህዝብ የጋራ ትግል ሸንጎ (SHENGO)
የኢትዮጵያ ብሄራዊ የሽግግር ምክር ቤት (ENTC)
የኢትዮጵያ ሙስሊሞች ሰላማዊ ንቅናቄ ደጋፊዎች ህብረት (UEM-PMSG)
የኢትዮጵያ ወጣቶች ብሄራዊ ንቅናቄ (EYNM)

ግንቦት 22፤ 2007 (May 30, 2015)