ለማንበብ እዚህ ይጫኑ

ለማንበብ እዚህ ይጫኑ

ስለ ሙስሊም ኢትየጵያውያን መሪዎች ለኢሳት ገንዘብ ማሰባስብ ዝግጅት ላይ መገኘትና ስለታማኘ በየነ የዋህ አነጋገር ተክለማካኤል አበበ ለአቀረበው ጹሑፍ ማስተባበያ የቀረበ ነው።

ወደ ዘርዝር ሐሣቡ ከመግባቴ በፊት ስለአንድ ገጠመኝ ጀባ ልበላችሁ፤ ጊዜው ቢረዘምም አይረሳም፤ በ1969 ዓ ም ነበር። ሻለቃ ዮሐንስ ምስክር ብቻውን በምኒልክ ቤተ መንግሥት የከተመውን የደርግ ፣ የካድሬ ጎራ የጦር ሜዳ ቀጠና አድርጓት መዋሉ ምንጊዜም ይወሳል። በዕለቱ እምድር ቁና ትሆናለች፤ ሻለቃ ፣ኮሌኔል፣ ጅንራል ፣ ሊቀመበሩ ሳይቀሩ ከታንክ ውስጥ እንደተጠለሉ ይነገራል። የካድሬው መንጋማ እንደ አሻሮ ተቆላ ተብሎለታል።

ታዳንስ አንድ ሻለቃ ዮሐንስ ምስክርን ኮፍጣና ወታደር መሆኑን የሚያውቅ የዘብ ሃለፊ ሻለቃ ባሻ እሱ መሆን አለበት በማለት ሁኔታውን ያጣራል። እርሱ እንደሆነ ይደርሰበታል። ‘ሻለቃ ዮሐንስ ምስክር ነው! ተረጋጉ!’ እያለ ከአንዱ ማዕዘን ወደሌላው ይሯሯጣል። ምድረ ሻለቃ፡ ኮሌኔል ጅንራል ፡ የደርግ አባል፣ የአብዮት አራማጅ ካድሬ ሳይቀር፤ በየጠረጴዛው፣ ቁም ሳጥኑ ተሸሸጓል። ሊቀመበር መንግሥቱም በታንኩ ውስጥ ኩሼ ብለዋል። የዘብ አላፊው ሻለቃ ባሻ፤ ሻለቃ ዮሐንስ ምስክር ብቻውን ይህን ሁሉ ቀውጤ እንደፈጠረ ሲያውቅ እራሱ ከሻለቃው በላይ ጀግና ለመሆነ ቃጣው። ወታደራዊ ሰላምታ እየሰጣቸው ሁሉንም ከተሸሸጉበት እንዲወጡ አደረገ። ‘አንዱ ሻለቃ ዮሐንስ ምስክር ነው እንደብርጌድ የዘመተብን ደርሸበታለሁ በማለት ተኩራራ፣ ልቡንም አሣበጠ። ከዚያ በኋላማ ማን ይቻለው? የደርጉም ሊቀመበር የሻለቃነት ማዕረግ ሰጡት። ከእርሳቸው በመለስ ለማንም አልታዘዝም አለ። በደርግ ጽፈት ቤት ግቢ እንደልቡ ይፏልል ጀምረ። ጸረ አበዮተኛ እያለ መግደሉን አጧጣፈ።ለትንሹም ለተልቁም መሣሪያ መምዘዙን ጀመረ። ቀደም ያሉት ካፈጸሙት ግድያ በልጦ ለመገኘት የብዙሃንን ነፍስ አጠፋ። ለእርሱ ግን መልካም ሥራ ይመስለው ነበር። ሌሎችም እንደሱ ሰው መሆናቸው ተረሳው። ኮሌኔል አጥናፉ አባተን እርሱ እራሱ እደገደላቸው ይናገራል። የበላዮቹን በሥልጣናቸው እየገባ በእርሱ ብሶ በሥልጣኔ ገባችሁብኝ እያለ በራ ከረዩ ይል ጀመር። እንዲህ ነው ለሕግ ያለመገዛት እንደፈለጉ መፏለል።

ሁለተኛው በቅርብ የሆነ ነው።ነፍሳቸውን ይማረውና ዶክተር ዮናስ አድማሱ ወንደማቸው ዮሐንስ አድማሱ ስለታዋቂው ጻሐፊ ዮፍህታይ ንጉሴ ሥራዎች ጀምረውት የነበረውን ከፍፃሜው ደርሱ ለሕዝብ ይቀርባል።ሥነሥረዓቱን የመሩት ግለሰብ ያሳዩት የሥነምግባር ግድፈት ትዝብት ላይ እንደጣላቸው ተቺው ጠቀስ አድርገው አልፈውታል። መነሻቸው ለሥራው ያላቸውን አድናቆትና ምስጋና ለማቅረብ ነበር።ርዕሳቸውም ያተኮረው ‘ ሦስቱ ዮዎች’ ላይ ነበር። ዮናስ አድማሱ፣ ዮሐንስ አድማሱና ዮፍህታይ ንጉሤ። የነዚህን ታላቅ ዮዎች በመድረክ ላይ ያስተዋውቅ የነበሩት ግለስብ ባለታሪኮቹ በሕይወት ሰለሌሉ እራሳቸው የታሪኩ ፈጣሪ ሆነው መቅረባቸው ነው ያናደዳቸው።ይህ ዓይነቱን መጥፎ ባህል መቼ ነው የምናስወግደው በማለት ነበር ስሜታቸውን የገለጹት።

ልጅ ተክለማርያም አበበ ጹሑፉን በቅርብ በሚያውቀው በሰባአዊ መብት ተከራካሪ ታማኝ በየነ ይጀምራል።ይሄውም የክርስቲያኑ ባዓል ሲከበር የዕስልምና ሃይማኖት ተከታይ ኢትዮጵያውያን አለመከበሩን ታማኝ በየነ በመናገሩ እንደየዋህነት ቆጥሮታል። አበው ሲተርቱ ‘ከጥምጥሙ ይቅደም መማሩ’ ይላሉ።

በ1966 ዓ ም ነበር። የወቅቱ ጠቅላይ ሚኒስትር የነበሩት የተከበሩ እንደልካቸው መኮንን ነበሩ። በአዲስ አበባ ከተማ የእስልምና ሃይማኖት ተከታይ ኢትዮጵያውያን ሃይማኖታችን ተገቢውን እውቅና ይሰጠው ብለው ሰላማዊ ሰልፍ ይወጣሉ። መሳ ለመሳ የክርስትና ሃይማኖት በሰልፉ ላይ ነበር። በወቅቱ የ ቀ ኃ ሥ ዩኒቨርሲቲ ተማሪዎች ዋናኛዎቹ ሰልፉን አስተባባሪዎች ነበሩ።ጥያቄው የፍትህ መሆኑን ይረዳሉ። የኢትዮጵውያን ተማሪዎች ከሚደነቁበትና አክብሮት ከሚቸርበት ተግባራቸው አንዱ ወግተኛ አለመሆናቸው ነው። አቶ ተክለሚካኤል አበበ በእርሱ አስተሳሰብ የአቶ ታማኝን የዋህነት ሲገልጽ ፣ብልህነቱ ስለፍትህ የማያውቁ እሲኪያውቁ ቆሞ ያለመጠበቁ ይሆን?።

ሁለተኛው ደግሞ ለኢሳት ለሚደረገው የገንዘብ አሰባሰብ ዝግጅቶች ላይ ኢትዮጵያውያን ሙስሊሞች መድረኩን ተቆጣጠሩት ፖለቲካውንም ይቆጣጠሩታል የሚል ሥጋት ነው። ልጅ ተክሌ በመላ ምት ላይ ተሞርክዞ ስለ ዘጠና ሚለዮን ሕዝብ ትንተና አይስጥም፤ ነውር ነው። እንዴት ነውር እንደሆነ ወርድ ብዬ አሣያለሁ።

ልጅ ተክሌ ጠላት ወዳጅ ከሚያከበረው ከአበበ ገላው በኢትዮጵያን ስሙ ሲጠራ የማይውለው ታማኝ በየነን አጅብህ በትልልቅ የአሜሪካና የካናዳ ከተማዎች በመድረክ ላይ ሰለታየህ እነርሱን ነህ ማለት አይደለም። የልጅ ተክሌንም ሃይማኖት የጠየቀ አልነበረም። ተክሌ ከሃይማኖቱ በፊት ሰው መሆኑን የኢሳት ሰዎች እንደሚያውቁ እረዳለሁ። እስልምና ተከታይ ወንድሞቻችንም ከሃይማኖታቸው በፊት ሰው መሆናቸውን አይዘነጉም። የሰው ልጅና ፍተህ ሊነጣጠሉ ስለማይችሉ ለፍትህ የሚታገል ሁሉ ሰው ለመሆኑ የሚታገል ነውና ዘር፣ ሃይማኖት፣ ቋንቋ ፣ሞያ ወዘተ ሰው ከሆንን በኋላ የሚመጡ ናቸው። ለልጅ ተክሌ ይህ ይጠፋዋል አልልም፤ በኮታ እንደ ዘር ፓለቲካ ሃይማኖትን ለመመድብ መሞከር በአሁኑ ጊዜ የእስልምና ተከታዩን ወገናችንን የፍትህ ጥያቄ ዳር እስከ ዳር ማጥለቅለቁን ያለማውቁን ያለማቁ ይመስላል።

እንደሻለቃው ባሻና እንደመድረክ አስተዋዋቂው ከዚህም ከዚያም ተሯርጠው ስለነገሩ ጥቂት ካወቁ በኋላ በድንገት በአጋጠሚ ራስን አንድ ቦታ አስቀምጦ ከሌሎች ጋር መላተሙ አይጠቅምም። ይህ ድርጅት እቀፉ ያንን ሃይማኖት አትቀፉ ፣ እንዲህ አድርጉ ለማለት አንተ ማነህ? የሚል ጥያቄ ያጭራልና ከወዲሁ ሰብሰብ ማለቱ አይከፋም። የቁጥጥር ኮሚቴ በኢሳት ውስጥ ይቋቋም ከሆነ መቀበልም ያለ መቀበልም የቦርዱ ነው።ያስተምራል ወይስ ያደናግራል ምርጫው የእነርሱ ነው።

ከዮፍህታይ ንጉሤ ስንኝ አንድ፣ ለመንገድ፤
ለጌሾው ወቀጣ አንደ ሰው አልመጣ፤
ለመጠጡ ጊዜ ከየጎሬው ወጣ።
ምስጋና ይግባቸው ለሦስቱ ‘ዮዎች’ ብዙ ከዚህ እንማራለን።

ታደለ መኩሪያ
tadele@shaw.ca

በዘረኛው የወያኔ አገዛዝ በሀገራችን ዉስጥ የተጣለብን ከፋፍለህ ግዛ ዘመቻ ከቀድሞው በተለየ እጅግ ዘግናኝና አስከፊ በሆነ ሁኔታ ላይ መገኘት የሁሉንም ኢትዮጵያዊ ወኔና ሞራል ሳይነካ አይቀርም ብዬ እገምታለሁ። ከዚህም ውስጥ ዋነኛውና የመጀመሪያው ሰሞኑን በአማራዉ ብሔረሰብ ላይ በመድረስ ላይ ያለው የዘር ማጥፋት ወንጀል ህዝቡን ከአድማስ አድማስ እያነጋገረው መምጣቱ ሲሆን፤ እያንዳንዱ ኢትዮጵያዊ ለሀገሬ ምን ሠራሁ በማለት እራሱን እየጠየቀ ? ይህን ዘረኛ የሆነ የወያኔ መንግስት ከስር መሰረቱ ነቅሎ ለመጣል በቁርጠኝነት በመነሳት ሀገራዊ የዜግነት ግዴታውን መወጣት አለበት ፡፡ ለዚህም በዋንኛነት ትኩረት ተሰጥቶት ለነገ ይደር የማይባልበት ጉዳይ ፣ ማናቸውም የተቃዋሚ ፓርቲዎችና ፥ የድጋፍ ድርጅቶች ፣ አንድ በመሆንና እጅ ለእጅ በመያያዝ ቅድሚያ ለሀገር ሰጥቶ የመጣብንን የወያኔ ሰደድ እሳት ማጥፋት ግድ ይለናል ፡፡

ለዚሁም ለ- April 8 ቀን በኦስሎ ኖርዌይ የዲሞክራሲ ለውጥ በኢትዮጵያና ኢህአፖ የጠሩት ሀገርህን አድን ዘመቻ ጥሪ እንደ አንድ አብነት ሆኖ የሚጠቀስ ነው ፡፡ ዘረኛው የወያኔ መንግስት ከጥነሰሱ ጀምሮ እስከአሁን ድረስ ስልጣን ላይ ፊጥ ብሎ እስከቀጠለበት ድረስ ሰንቆ ያመጣውን የሀይማኖትና የዘር ማጥፋት ትልም በተግባር ላይ ማዋል ከጀመረ እነሆ ብዙ አመታትን አስቆጥሯል ፡፡ ይኸውም የመጀመሪያው በሙስሊም ወገኖቻችን ላይ የተጀመረው የሀይማኖት ብጥብጥ በአይበገሬው የሙስሊም ወንድሞቻችን ትግል ዕለት በዕለት እየተፋፋመ ወያኔን እንቅልፍ ቢነሳውም ፣ ህወሃት-ኢሃዴግ ተስፋ ባለመቁረጥ እንደገና ፊቱን ወደ ኦርቶዶክስ ኃይማኖት በማዞር የተለመደውን የስልጣን ማራዘም ዘመቻና ህዝብን ከህዝብ የማፋጀት አባዜን በማፋፋም እነሆ አሁን ደግሞ የአማራውን ህዝብ ከእናት ምድሩና ሀገሩ የማባረርና ዘር የማጽዳት ዘመቻውን በሰፊው ተያይዞታል።

ይህም ከማናለብኝነትና ለህዝቡ ካለው ከፍተኛ ጥላቻና ንቀት የመነጨ በመሆኑና በአንድ ዘር የበላይነት ብቻ የማመን ጠባብነት ጭምር የተጸናወተው በመሆኑ ነው ። ወያኔ ከመጀመሪያው ጀምሮ በኢትዮጵያ አንድነት የማያምንና ጭራሽ ኢትዮጵያ የምትባል አገር እንደሌለችና ኢትዮጵያ የሚለውንም ስም ያገኘችው በሚኒሊክ ዘመነ መንግሥት መሆኑን ለማሳመን የሚያደርጉትን ባዶ ጥረት በመረጃ አንድ ግለሰብ በኢሳት ቲቪ ላይ ከጋዜጠኛ ሲሳይ አገኔ ጋር ባደረገው ቃለ መጠይቅ ከነ መረጃቸው አስደምጦናል ። ይህም ማለት አማራው ለትግራይ ህዝብ ጠላቱ መሆኑን አስምረው አረጋግጠውልናል ማለት ነው ። እንደውም ለአማራ ያላቸውን ጥላቻና ዘረኝነት ለመግለጽ ሲሉ ! ሆስፒታል ውስጥ አንድ በሽተኛ ከፈረንጅ ሀኪምና ከአማራ ሀኪም ማን እንዲያክምህ ትፈልጋለህ ተብሎ ምርጫ ሲቀርብለት የመለሰው መልስ አማራ ከሚያክመኝ ፈረንጁ የፈለገውን ቢያደርገኝ ይሻለኛል ብሎ በሽተኛው እስከመመለስ መድረሱን አድምጠናል።

ጎበዝ ! ወያኔዎች እኮ ዛሬ አማራውን ነገ ደግሞ ጉራጌውን ከዛም ኦሮሞውን ከሀገር በማፈናቀል እንደተባለውም ኢትዮጵያ የተባለችውንና ለዘመናት ተከብራና ታፍራ የኖረችውን፤ ጀግኖች አባቶቻችን አጥንታቸውን ከስክሰው ደማቸውን አፍስሰው ያስረከቡንን ሀገር ከምድረ ገጽ ለማጥፋት ሆን ብለው የተነሱ አረሞች ናቸው። እምነበረድ ይክበዳቸውና ! አሁን በአካለ ህይወት የሌሉት ፣ የቀድሞው ጠ.ሚኒስተር የነበሩት በራዕያቸው ግን አገሪቱን የሚያስተዳድሩት ሰው ባለቤት የሆንችው ወ\ሮ አዜብ መስፍን(ጎላ) ሰሞኑን በኢቲቪ ማቅ (ጥቁር ለብሳ) እኛን ግን ሳቅ አላብሳናለች ፣ ስለ ባለቤትዋ የወር ደሞዝ ማለት ነው ለኢህአዲግ መዋጮ ከፍሎ የሚደርሰው 4,000ብር ብቻ ነው ብላናለች ፡፡ አንድም ቀን ልጆቼን ፣ ቤቴን ሳይል ለሀገሩ 24 ሰአት ያገለገለ መሪ ነው ፥ ወደዚህ ሀገር ሲመጣም ጭንቅላቱን ብቻ ነው ይዞ የመጣው ብላናለች ። ሌላው ሰው ወደዚህ ዓለም ሲመጣ ምን ጨብጦ እነደመጣ ፣ ኧህ ! ካሏት አዜብ መስፈን ብዙ ቀልዶችን ሳትነግረን አትቀርም ፡፡

ወይዘሮዋን አንድ ያልገባት ነገር ቢኖር ፣ መለስ ጭንቅላቱን አሟጦ የተጠቀመበት ፣ የባንዳ ልጅ እየተባለ ያደገበትን በቀል ፣ህዝቡ ላይ በመበቀል ሙሉ ኃይሉን የተጠቀመ አረመኔ ፥ ጨካኝና ዘረኛ መሪ መሆኑን ያለመረዳቷ ጉዳይ ነው ። ከዚህ በፊት የመለስ ራእይ ሳይደለዝና ሳይበረዝ ትግሉ ወደ ፊት ይቀጥላል ያልሽው እንደተጠበቀ ሆኖ ፣ ዛሬ ደሞ በትንሽ ደሞዝ እየተከፈለው ሌት ተቀን እየሰራ ሀገራችንን ትልቅ ደረጃ ላይ እንድትደርስ ያደረገ የመጀመሪያው መሪ መሆኑ ተሰምሮበት (Guinness book of records) ላይ ተመዝግቦ መቀመጥ አለበት አይነት ትእዛዛዊ የማስጠንቀቂያ መልክት በማስተላለፍ “የሌባ አይነ ደረቅ መልሶ ልብ ያድርቅ” አይነት ጨዋታሽን በጥሩ ተውኔታዊ ገቢር ! የሃዘን ልብስሽን እንደ ጉሬዛ ግንባርሽ ድረስ ተከናንበሽ ትውነሽልናል ፡፡

ምናልባት መለስ ዜናዊ ትግራይን አልምቶ ይሆናል አላውቅም በእርግጠኝነት ግን መናገር የምችለው ቀሪዋን ኢትዮጵያን አድምቷል ። ህዝቡንም እርስ በእርሱ ደም እንዲቀባባና ፥ በዘርና በሀይማኖት በመከፋፈል የሀገሪቷንም መሬት ለባእዳን በመሸጥ ህዝቡን ለከፍተኛ ችግርና መከራ አጋፍጦ ፣ ዜጋ ሁሉ የሚወዳትን ሀገሩን እየጣለ በየአረብ ሀገሩና አውሮፓ ውስጥ እንዲሰደድ ያደረገ ትልቅ የማይረሳ ነቀርሳና ጠባሳ ህዝቡ ላይ ትቶ የሄደ መሪ ነው ። የእርሱን ራእይ በመከተል እነሆ አሁንም ያሉት መሪ ተብዬ ጃሌዎቹ ከሱ በባሰና አስከፊ በሆነ ሁኔታ ህዝቡን ከተወለደበትና እትብቱን ከቀበረበት ቀዬ በግፍና በጭቆና እያባረሩት ይገኛሉ ። ስለዚህ ጎበዝ ይህን ጉዳይ ዝም ብለን ማየት የማንችለውና ሁላችንም በአንድ ላይ ሆነን እጅ ለእጅ ተያይዘን ወያኔንና አንጃዎቹን “በቃ” ማለት የሚጠበቅብን ወቅቱ ከምንግዜውም በላይ አሁን ነው ።

በመጨረሻም ማለት የምፈልገው ነገር ቢኖር የኢህአፓ ወክንድ የሚያደርገው እንቅስቃሴ እጅግ የሚያኮራ በመሆኑ ሳይደነቅ መታለፍ የሌለበት ጉዳይ ነው። ለዚሁም ከዚህ በፊት በሙስሊም ወገኖቻችን ላይ ወያኔ ያደረሰውን በደል አብሮ ከጎኑ በመሰለፍ ፣በኦርቶዶክስ ሀይማኖት ላይም እንዲሁ ችግሩን አብሮ በመጋፈጥና አሁን ደሞ በአማራው ህዝብ ላይ ወያኔ የሚያደርሰውን አሰቃቂ በደል በመቃወም በከፍተኛ እንቅስቃሴ ላይ ይገኛል። ሌላው ደግሞ ማናቸውም ለሀገራችን ተቆርቋሪዎች ነን የሚሉ ኢትዮጵያዊያኖች ወገኖቻችንን በሙሉ የሚያሳትፍ (keep of fighting ethiopian youth forum KOFEYF) የሚል የፓልቶክ (paltalk room) ከፍቶ ዘውትር በየሳምንቱ እሁድ ከ15፡00 – 3፡00pm ሰአት ጀምሮ አንጋፋ የሆኑ የፖለቲካ ባለሞያዎችንና የሀገር ተቆርቋሪዎችን በመጋበዝ ትልቅ አስተዋጾ በማድረግ ላይ ይገኛል ። እርሶም ይህን እድል በመጠቀም ያለዎትን እውቀት ለማህበረሰቡ በማስተማርና በመማር ለሀገርዎ ትልቅ አስተዋጽኦ በማድረግ ዉድ ሀገራችንን ኢትዮጵያን ከገባችበት የድጥ ማጥ ውስጥ እናውጣት የሚል ተማጽኖዬን በማክበር እጠይቃለሁ።

ኢትዮጲያ ለዘላለም ትኑር!!!
እግዚአብሔር አምላክ ኢትዮጵያ ሀገራችንን በምህረቱ ይጎብኛት!!!
Dawit Abebe, April 2013. Oslo

ለማንበብ እዚህ ይጫኑ

ለማንበብ እዚህ ይጫኑ

ለማንበብ እዚህ ይጫኑ

‹‹ብዕር …፣ ብዕር …፣ የብዕር ኃይል ምንጊዜም ያሸንፋል!!››
(ናይጄሪያዊው የብዕር ጀግና ኬን ሳሮዊዋ)

የቀድሞው አፍሪካ አንድነት ድርጅት የዛሬው የአፍሪካ ኅብረት ተመሠረተበትን የ50ኛ ዓመት የወርቅ ኢዮቤልዩ በዓል ለማክበር በተለይ የኅብረቱ ዋና መቀመጫና ለአፍሪካ አንድነትም ሆነ ለኅብረቱ እውን መሆን ከንጉሥ ቀዳማዊ ኃይለ ሥላሴ እስከ ደርግ እና አቶ መለስ ዜናዊ ድረስ ብርቱ ጥረት ግንባር ቀደም ሚና በተጫወተችው በኢትዮጵያ፣ በመዲናችን አዲስ አበባ በደማቅ ሁኔታ ለማክበር መጠነ ሰፊ ዝግጅት እየተደረገ ነው፡፡ ለበዓሉ ዝግጅትም ልዩ ኮሚቴ ተዋቅሯል፡፡

የአፍሪካ አንድነት ድርጅት ከተቋቋመና አብዛኞቹ አፍሪካ አገራትም ነፃነታቸውን ከተጎናጸፉ በኋላ አፍሪካውያን በልባቸው ትልቅ ተስፋንና ራእይን ሰንቀው ነበር፡፡ አፍሪካ በጥቁር አፈሯ የአብራኳ ክፋዮች፣ በልጆቿ መሪነት ወደተሻለ ፖለቲካዊ አስተዳደርና መረጋጋት፣ ማኅበራዊ ተሐድሶ፣ ኢኮኖሚያዊ እምርታና ዕድገት ትገሠግሣለች ተብሎ ነበር በብዙዎች ዘንድ የተገመተው፣ የታሰበው፣ የታቀደውም፡፡
ግና ለአፍሪካ ይመጣል ተብሎ የታሰበው፣ ያ ብሩህ ዘመን የተገመተውንና የተጓጓለትን ያህል ብዙም ተስፋ ሰጪና ብሩህ አልነበረም፡፡ እዚህም እዛም የፈነዱት የብዙ አፍሪካውያን ሕይወት የቀጠፉ የእርስ በርስ ግጭቶችና ጦርነቶች፣ ስደትና መፈናቀል፣ በወታደሮችና በጦር ኃይል የታገዘ ደም አፋሳሽ የሆኑ የመፈንቅለ መንግሥት ሙከራዎች፣ ሙስናና ዝርፊያ አኅጉሪቱን ባልተጠበቀ ፍጥነት ወደ ምድራዊ ገሃነምነት ነበር የቀየሯት፡፡ አፍሪካ ዳግም እንባ በስፍር የሚቀዳባት፣ ልጆቿ እርስ በርሳቸው የሚጋደሉባት፣ የሚተራረዱባት፣ ጽልመት የዋጣት የሰቆቃ፣ የመከራና የዋይታ ምድር ሆነች፡፡
በዚህ አጭር መጣጥፌ በብዙ ተስፋ ስለተደረገው የትላንትናው የአፍሪካ አንድነት ድርጅት፣ የዛሬው የአፍሪካ ኅብረት በአፍሪካ አገራት ውስጥ በፖለቲካ፣ በኢኮኖሚ፣ በማኅበራዊና በሌሎችም ዘርፎች ስላስመዘገበው ስኬቶች፣ ስላጋጠሙት እንቅፋቶችና ውድቀቶች ለመተንተን አይደለም አነሣሴ፡፡

ይሁን እንጂ የዚህ ጽሑፌ ዋና ትኩረት የኅብረቱን 50ኛው የወርቅ ኢዮቤልዩ በዓል ለማክበር ሽር ጉድ እያሉ ባሉት አፍሪካውያን አገራት ውስጥ፣ የምድሪቱ የብዕር ጀግኖች በየአገራቸው የተነሡትን አምባገነኖችን፣ የሰብአዊ መብት ረገጣዎችን፣ የአስተዳር ብልሹነትን፣ መሪዎቻቸው የተዘፈቁበትን ሙስና፣ የሞራል ዝቅጠትንና ውድቀትን… ወዘተ በማጋለጣቸው የተነሣ በየጊዜው የተነሡ አፍሪካውያኑ አምባገነኖች የብዕር ጀግኖቻቸውን ያሳደዱበትን፣ ያጋዙበትንና እንዲያም ሲል ሞት ያወጁባቸውን የአፍሪካ የምንጊዜም ምርጥ የብዕር ጀግኖች ስለሆኑ ኃያላኖች ታሪክ ጥቂት ላካፍላችኹ ወድጄ ነው፡፡
ዛሬም ድረስ የየአገሮቻቸውን አምባገነኖች ለማረም የተነሡትን የከበሩ ምሁራኖችን፣ ጸሐፊዎችን፣ ጋዜጠኞችን፣ የጥበብና ብዕር ሰዎችን ጉሮሮ ለመፍጥረቅ እንደወትሮው ኃይል የማያንሳቸው አፍሪካና አፍሪካውያን አምባገነኖች በየጓዳው በተጽእኖ በትርና በአድርባይነት መርዝ ዛሬም ድረስ ስንቱን የኪነ ጥበብ ሊቅ በግፍ ረግጠው እየገዙ እንዳለ ሊታሰበን ይገባል፡፡ ለአብነትም ያህል በአገራችን በቀደመው ትውልድ ዘመን እነ አቤ ጉበኛ፣ እነ በዓሉ ግርማ፣ እነ ጸጋዬ ገ/መድኅን የመሳሰሉ ኃያላኖች በትንታግ ብዕራቸው አማካይነት ስለ ነፃነት፣ ስለ እውነትና ስለ ፍትሕ በመጮኻቸው ነበር የእብሪተኞችና የአምባገነኖች ሰይፍ ሰለባ ለመሆን የተዳረጉት፡፡

በእኛው ዘመንም በዓለም አቀፍ ደረጃ የብዙ ሽልማቶች ባለቤት የሆነው እንደ ጋዜጠኛ እስክንድር ነጋ፣ እንዲሁም ከሰሞኑ እንኳን የመንግሥታቱ ድርጅት ዩኔስኮ ለነፃ ፕሬስና ሐሳብን በነፃነት ለመግለጥ እውን መሆን አምርራ በብዕሯ የታገለች ምርጥ፣ ጀግና ሴት፣ የብዕር አርበኛ ተብላ የተሸለመችው ጋዜጠኛ ርዕዮት ዓለሙና ሌሎችም በገዛ አገራቸውና መንግሥታቸው ‹‹አሸባሪ›› በሚል ሰበብ በወኅኒ እንዲወረወሩ ያደረጋቸው እምቢ ለእውነት፣ እምቢ ለፍትሕ፣ እምቢ ለነፃነት ባለችው ኃያል ብዕራቸው የተነሣ መሆኑን ማንም ይስተዋል ብዬ አልገምትም፡፡

ዓለም አቀፉ ማኅበረሰብና ተቋማት ድምፃቸውን ከፍ አደርገው የእነዚህን ኢትዮጵያውያን የብዕር ዐርበኞች ገድል እያወጁ፣ ለሥራቸውም ከፍ ያለ ክብር እየሰጡ ነው፡፡ መቼም ዓለም አቀፉ ማኅበረሰብም ሆነ የሰብአዊ መብት ተሟጋች ድርጅቶችና የፕሬስ ተቋማት በታሪክ ‹‹አሸባሪዎችንና ሽብርተኞችን›› ሲሸልሙ፣ ሲሾሙና ሲያከብሩ አይተንም፣ ሰምተንም አናውቅም፡፡ ለመሆኑ መንግሥት ይህን እውነት በአደባባይ እያየና እየሰማ ምን እያሰበ፣ ምንስ መከራከሪያ እያዘጋጀ ይኾን?! ለመሆኑ ‹‹አሸባሪነትስ›› በመንግሥታችን መዝገበ-ቃላት ውስጥ ያለው ፍቺስ ምን ማለት ይኾን?!

ባለፉት ዓመታትም ወጣቱ ከያኒ ቴዎድሮስ ካሳሁን/ቴዲ አፍሮ በጥበብ ሥራው የዛሬው የትላንቱን ለመቀጣትና ለመበቀል ከሆነ ራእዩና ፍላጎቱ ለኢትዮጵያ የታለመው ሰላም፣ ብልጽግና፣ ዕድገትና ዲሞክራሲ አድራሻው ወዴየት ነው?! ቂም በቀል ይቅር፣ ለአንድ እናት ምድራችን በማንዴላ የእርቅ መንፈስ እጅ ለእጅ እንያያዝ፣ እንደጋገፍ፡፡ በብሔር፣ በቋንቋ፣ በዘር መለያየታችን ይቅር፣ ኢትዮጵያችን ሁላችንም የጋራ ቤት፣ የጋራ እናታችን ናት፡፡ ሰንደቀ ዓላማችን፣ ቋንቋችን ፍቅርና ፍቅር ብቻ ይሁን!!

አለበለዚያ ግን የዛሬው መንግሥት በተራው በትላንቱ ላይ በጥላቻ ጥርሱን የሚነክስና የበቀል ሰይፉን የሚያነሣ፣ በቋንቋና በዘር የሚለያየንን የባቢሎንን ግንብ የሚያቆም ከሆነ ‹‹አዲስ ንጉሥ እንጂ መቼ ለውጥ መጣ?!›› ብሎ በማዜሙ የተነሣ ከፍቅር፣ ከፍትሕና ከእርቅ መንፈስ ጋር የተፋቱ የዘመናችን አንዳንድ ብኩኖችና እብሪተኞች በወጣቱ ከያኒ ላይ ጥርሳቸውን ክፉኛ ነክሰውበት፣ እንዲያ ሲያጥላሉትና ሲያወግዙት ለመስማት የተገደድንበት አጋጣሚ የቅርብ ጊዜ ትዝታችን ነው፡፡

ሌላው ቀርቶ በግሌ የማስታውሰው በኦሎምፒያ አካባቢ ተሰቅሎ የነበረው የወጣቱ ከያኒ ‹‹ጃህ ያሰተሰርያል!›› የሚለው የጥበብ ሥራው አልበም ፖስተር ከላይ እስከ ታች ነጭ ቀለም ተረጭቶ ያየኹበትን ትእይንት አሁን ድረስ ሳስታውስ አምባገነኖችና እብሪተኞች በልባቸው ያረገዙትን ክፋታቸውንና በቀላቸውን ለመተግበር ምን ያህል ርቀት ሊጓዙ እንደሚችሉ ነው በሐዘንና በጸጸት ውስጥ ሆኜ እንዳስብ ያደረገኝ፡፡

አፍሪካውያኑ አምባገነኖች በዚህ አካሄዳቸው አገራቸውን የዕድገት፣ የዲሞክራሲ፣ የነፃነትና፣ የፍትሕ ምች እንዲያጠናግረው የፈቀዱ ማን አለብን ባዮች ዓይኖቻቸውን ሳያርገበግቡ ምን መጠበቅ እንዳለባቸው አሳምረው ያውቁታል፡፡ ለእውነት፣ ለሰብአዊ መብቶች፣ ለፍትሕና ለሕዝብ ብሶት የቆሙ የጥበብ ድምፆችን፣ ብሩሾችንና ሐቀኛ ብዕሮችን በዋሉበትና ባደሩበት እያደፈጡ ሲያሴሩና ጥበብን አልከስክሰው በእውነት ላይ ለመማገጥ የታቻላቸውን ሁሉ ያደርጋሉ፡፡ እናም ሊደፋፈሩ የሚገባቸውን ጀግኖቻቸውን ያዋክባሉ፣ ያሳድዳሉ፣ ያግዛሉ፣ ይገድላሉ፣ ያስገድላሉ፡፡

ድንግል አፍሪካ፣ በተፈጥሮ ሀብቷ አቻና አምሳያ የሌላት አፍሪካ… የማርና ወተት መፍለቂያ ምድር እማማ አፍሪካ፣ አውሮፓውያኑ የአፍሪካ በዕዳን ወራሪዎች ካደረሱባት ግፍና መከራ ያልተናነሰ ከማኅፀንዋ የወጡ፣ ጡትዋን ጠብተው ያደጉ ልጆቿ፣ ነፍጥ ማንገታቸው ልባቸውን በእብሪት የወጠረው ወታደራዊ መሪዎቿ ይህ ነው ማይባል የግፍና የመከራ ዘመንን አስቆጥረዋታል፡፡ ለዛሬ የናይጄሪያ ፕሬዝዳንት በነበሩት በጄኔራል ሳኒ አባቻ ዘመነ መንግሥት ለእስራትና ለሞት ስለተዳረገው ስለ ኃያሉና ጀግናው ብዕረኛ፣ ደራሲ ኬን ሳራዊዋ ታሪክ በጥቂቱ ላካፍላችኹ ወደድኹ፡፡
የናይጄሪያዊው ጁንታ መንግሥት የስቅላት ገመድ በአንገቱ ገብቶ በሕይወቱ ላይ ስለተፈረደበት የነፃነት ታጋይ፣ የጥበብ ፊታውራሪ፣ የሕዝብ ልጅ፣ የናይጄሪያውያኑ የኢጎኒ ጎሳ ተወላጅ፣ የሕዝቡ የቁርጥ ቀን ልጅ ስለሆነው ደራሲ፣ ገጣሚ፣ ሐያሲ፣ ነጋዴ፣ የፖለቲካ ሰው፣ ሃይማኖት ሰባኪ ኬን ሳሮዊዋ፡፡

የፈላጭ ቆራጩ የሳኒ አባቻ መንግሥት የደህንነትና የፀጥታ ክፍል ኃላፊዎች ኬን ሳሮዊዋ እትብት ከተቀበረበት ቀዬ ነዳጅ ቀድተው እንዳሻቸው መሆን እንደማይችሉ የተረዱት ናይጄሪያውያኑ አምባገነኖች ይህን በሕዝቡ ፍቅር የተነደፈውን ሐቀኛ ሰው ከማጥፋት ውጭ ሌላ አማራጭ አልነበራቸውም፡፡ እናም ይህን የሕዝብ አለኝታ ከምድራቸው ሊያጠፉት መከሩበት፤ መክረውበትም አልቀረ ያን የሕዝባቸውን የንጋት ኮከብ ገና በአፍላ ዘመኑ ብርሃኑን ጨክነው አጨለሙት፣ አጠፉት፡፡

አምባገነኖቹ ሳሮዊዋን በቁጥጥር ስር ለማዋል ያቀናበሩለት የውንጀላ ሴራም እንዲህ የሚል ነበር፡፡ በዋና ከተማይቱ አቡጃ ትልቁ አደባባይ በጠራራ ፀሐይ በተጠመደ ፈንጅ የታፈሩና የተከበሩ የሚባሉ በሳኒ አባቻ ፊት ሞገስ ያገኙ ሦስት አዛውንቶች በድንገት ተገደሉ፡፡ የእነዚህ አዛውንቶች ግድያ ከኬን ሳሮዊዋ ጋር ሚያገናኘው ምንም ነገር አልነበረም፡፡ በወቅቱ በተደረገው ማጣራትም ግድያው የተፈፀመውም ሆነ አደጋው የተጣለው ወታደራዊውን ጁንታ በሚቃወሙ ወጣቶች መሆኑ ተገልፆ ነበር፡፡

ይሁን እንጂ ወታደራዊው አምባገነን መንግሥት ድርጊቱን በቀጥታ ከሳሮዊዋ ጋር በማያያዝ ለሳኒ አባቻ መንግሥት የእግር እሳት የሆነው የነፃነት ታጋዩ ኬን ሳሮዊዋ በዚህም አለ በዚያ በሐሰትም ቢሆን ተወንጅሎ ከሚወዳት አገሩና ሕዝቡ መወገድ ነበረበት፡፡ እናም ናይጄሪያዎቹ አምባገነኖች ይኽን ውሳኔ አስቀድመው አቅደውና ወስነው የዚህን ጀግና የብዕር ሰው ሞት/እረፍት ለማፋጠን ተቻኮሉ፡፡
ናይጄሪያዊው ደራሲና ብዕርተኛ ኬን ሳሮዊዋ በወቅቱ ሰለ አምባገነኖቹ ወታደራዊ መሪዎች እርምጃ እንዲህ ነበር ያለው፡- ‹‹እነዚህ ሰዎች ነፍሰ ገዳዮች ሆነው ሳሉ እኔን በከንቱ ለመወንጀል ይጥራሉ፤ በበኩሌ የመሠረቱብኝን ክስ እንኳን ለመስማት አልፈልግም፡፡ ችሎቱ በሚካሄድበት ወቅት ማለፊያ የሆነውን መጽሐፌን አንስቼ አነባለኹ፡፡ እነዚህ ሰው በላ ጭራቆች፣ ነፍሰ ገዳዮች፣ ፍትሕንና እውነትን የተጠየፉ አምባገነኖች፣ በሚያዩት ሁኔታ እርካታ አግኝተው እንዲፈነጥዙ ዕድል አልሰጣቸውም፡፡››

ጀሽዋ ሐመር የተባለ ጋዜጠኛ ኬን ሳሮዊዋ ያለአግባብ ተወንጅሎ ወኅኒ ከተጣለ በኋላ አግኝቶ ለማነጋገር ብዙ ጥረት አድርጎ ነበር፡፡ የናይጄሪያ ፖሊሶች ጋዜጠኛውን አታክተውና አሰላችተው ለመሸኘት ያደረጉት ጥረት ግን በሰውዬው አይበገሬነትና ብሎም በሳሮዊዋ ጠባቂ ትብብር ከሸፈና በስተመጨረሻ ሊያገኘው ቻለ፡፡ ጋዜጠኛው ጀሽዋ ሳሮዊዋን ባገኘው ጊዜ ብረት ባነገቱ ወታደሮች ተከቦ ነበር፡፡
ሳሮዊዋ አልጋው ላይ ጋደም ብሎ ፒፓውን እያጨሰ ነበር፡፡ እንዳየኝ ይላል ጋዜጠኛ ጀሽዋ እንዳየኝ ተነሣና ጨበጠኝና ለመሆኑ ከቀናት በፊት የላኩልህ ደብዳቤዬ ደረሰኽ ሲልም ጠየቀኝ፡፡ እኔም ደብዳቤው እንደደረሰኝ አንገቴን በማወዛወዝ ገለጽኩለት፡፡ አብረን በቆየንበት ጊዜ ሳሮዊዋ የአገሩ አምባገነን መንግሥት መሪዎች ፍርደ ገምድሎች፣ ጨካኞችና የሰው ደም የጠማቸው ሆነው ሳለ በከንቱ ሲወነጅሉት የቱን ያህል ልቡ እንደተጸየፋቸው አጫወተኝ፡፡ በሕይወት ዘመኑ ሁሉ ኬን በሠራው ሥራ ሁሉ ፍፁም ጸጸት እንደሌለበትና የአሸናፊነት ስሜት እንደሚሰማውም ነገረኝ፡፡

በዚህ ጨዋታችን መካከልም የእስረኞቹ መኪና መጣ፡፡ ሳሮዊዋ መኪናው ላይ ከሚጫኑት ዋንኛውና አንዱ ተረሻኝ ነበር፡፡ መኪናው ላይ ከወጣ በኋላ የተለየኝ በአውራ ጣቱ አሸናፊነት/የድል ምልክት እያሳኝ በፈገግታ እንደታጀበ ነበር ይላል ጋዜጠኛው ጆሽዋ፡፡ ኬን ሳሮዊዋ በሕይወቱ ጀምበር ማዘቅዘቂያ የመጨረሻ ሰዓት ላይ ጋዜጠኛው ወዳጁን በዚህ መልኩ ከተለየው በኋላ ሳሮዊዋና ሁለት ሌሎች እስረኞች ጥብቅ በሆነ የጥበቃ አጀብ ወደሚሰቀሉበት ፖርት ሐርኮት እስር ቤት ተወሰዱ፡፡

ከመገደያቸው አንድ ቀን ቀደም ብሎ ንስሐ ይቀበሉ ዘንድ አንድ እንግሊዛዊ ካህን ወደ ወኅኒ ቤቱ መጡ፡፡ በስፍራው የነበረ አንድ የዓይን ምስክር እንደገለጸው ሁለቱ እስረኞች ያለ ቅጥ እየተንሰቀሰቁ ሲያለቅሱ ሳሮዊዋ ተመልክቶ ጠጋ በማለት ለእናት ምድራቸው ናይጄሪያና ናይጄሪያውያን መሥዋዕት በመሆናቸው ሊኮሩ እንደሚገባቸው በመንገር በድፍረት የሞትን ጽዋ ይጠጡ ዘንድ ነበር ያበረታታቸው፡፡
የሞት ፍርዳቸው በሚጸናበት ረፋድ ጠዋት ላይ ኬን ሳሮዊዋ አዘውትሮ ከከንፈሩ የማይነጥላትን ፒፓውን ለአባቱ እንዲሰጡለት ገዳዮቹን ተማጸነ፡፡ ጥያቄውን የተቀበለው ሰው ግን አልነበረም፡፡ ወዲያው የአምባገነኖቹ ቅጥረኛ የሆኑት ወታደሮች የእስረኞችን ዓይን በጥቁር ጨረቅ ሸፍነው ወደ መስቀያው ስፈራ እያጣደፉ ወሰዷቸው፡፡ ኬን ሳሮዊዋ የመጀመሪያው ተሰቃይ ነበር፡፡ ይሁን እንጂ በሚገርም ሁኔታ በኬን ሳሮዊዋ አንገት ውስጥ የተጠለቀው ገመድ ለአራት ጊዜያት ያህልም ቢበጠስም በአምስተኛው ግን እነዛ ጨካኞችና እብሪተኞች ሕይወቱን በስቅላት ከነፍሱ ነጠሏት፡፡

ግዑዙ ገመድ እንኳን እምቢ ለፍትሕ፣ እምቢ ለእውነት ብሎ በኬን ጎን በቆመበት፣ በመሰከረበትና ባመጸበት በዛች ቅጽበት አምባገነኖቹ ልባቸውም ሆነ ዓይናቸው ታውሮ ይኼን እውነት ለመገንዘብ ሕሊናቸውም አእምሮቸውም ጨለመባቸዋልና ሊምሩት አልወደዱም፡፡ ወታደሮቹ ለጊዜውም ቢሆን ከዚህ እኩይ ድርጊታቸው፣ በክፉው፣ ሸካራና ጠማማ ጎዳና ላይ ከመገሥገሥ የሚያግዳቸው ምንም ምድራዊ ኃይል እንደሌለ ነበር ለናይጄሪያ ሕዝብና ለመላው ዓለም ለማሳየት የሞከሩት፡፡

ታጋይ፣ ደራሲ፣ ጸሐፊ … የሆነው ኬን ሳሮዊዋ በናይጄሪያ ደቡብ ምስራቅ ጠረፍ በኒጀር ወንዝ ዳርቻ የሚኖር የኢጎኒ ብሔር ተወላጅ ነበር፡፡ በ54 ዓመት ዕድሜው በግፍ በገመድ ተንጠልጥሎ ለሕልፈት የበቃው ሳሮዊዋ በተለያዩት ጊዜያት በጋዜጦች ላይ ባቀረባቸው መጣጥፎች፣ ፖለቲካዊና ማኅበራዊ የሰላ ትችቶቹ፣ በቴሌቪዥን ዝግጅቶቹና ዘገባዎቹ በድፍን ናይጄሪያ ከፍተኛ ተወዳጅነትንና ዝናን ለማትረፍ የቻለ ስመ ገናና ጸሐፊና ገጣሚ ነበር፡፡

‹‹ሶልጀር ቦይ›› የተሰኘ ወጥ የፈጠራ ሥራው ከአገሩ አልፎ ከበሬታን ያተረፈለትና ተነባቢ ሥራው ለመሆን በቅቶለታልም፡፡ ሳሮዊዋ በኑሮው የተደላደለ ቱጃር ለመሰኘት የሚችል፣ የግሉ የሆነ ፕሬስ መሥርቶ በመንቀሳቀስ ላይ የነበረና ይህ ጎደለው የማይባል ሰው የሚባል ዓይነት ቢሆንም እንኳን ናይጄሪያና ናይጄሪያውያን ዕጣ ፈንታ በአምባገነኖቹና በጨካኙ ወታደራዊ ኃይሎች እጅ መውደቁ እረፍት ስለነሣው አምባገነኖችን በብዕሩ አምርሮ ለመዋጋት ተነሣ ጀግና የብዕር ሰው ነበር፡፡

ታጋዩና ደራሲው ኬን ከትውልድ ቀዬው በገፍ የሚቀዳው ጥቁር ወርቅ (የነዳጅ ዘይት) የናይጄሪያ 90 በመቶ የገቢ ምንጭ ከመሆኑም በላይ ለሙስናና ለምዝበራ ለተዘፈቁት ወታደራዊ ገዢዎች መንደላቀቂያነት ሲውል ታዝቧል፡፡ ሕዝቡ ይህ ነው በማይባል ድህነትና ጉስቁልና ውስጥ ተዘፍቀው አምባገነኖቹ እንዲህ መቀማጠላቸው የሕሊና እረፍት የነሣው ሳሮዊዋ ይህን ግፍ ለመበቀል ነበር ብዕሩን በድፍረት ያነሣው፡፡ በዚህም አምባገነኖቹንና ሙሰኞቹን ናይጄሪያውያንን ክፉኛ ነበር ያሰጨነቃቸው፡፡

ደራሲና ታጋይ ኬን ሳሮዊዋ ሙያውን አክባሪና በሙያው ተደሳች እንደነበር ለእንግሊዛዊው ደራሲ ዊሊያም ማድዬ በጻፈው ደብዳቤ እንዲህ በማለት ነበር ማንነቱንና ሥራውን የገለጸው፡-
በእጅጉ የማከብረውንና የምወደውን የኢጎኒ ሕዝብ እነዚያ አበሳውንና ፍዳውን በሚያስቆጥሩት ፈላጭ ቆራጭ ገዢዎችን እንዲጋፈጣቸው ለማድረግ የሥነ ጽሑፍ ስጦታዬን እንደ ታላቅ መሳሪያ ለመጠቀም በመቻሌ በሕይወቴ ውስጥ ትልቁ ነገር ሆኖ ይመዘገባል፡፡ ብዕሬን ለወገኖቼ አርነት ማዋሌን ያህል ሚያስደስተኝ ነገር የለም፡፡ ለወገኔ የእኔ ድምፅ፣ የእኔ ጩኸት በጣሙን ወሳኝና አስፈላጊ ነበር፡፡
በእጅጉ የሚደንቅ ነው!! ፖለቲከኛ ሆኜ እንዲህ ያለ ነገር ማድረግ አልቻልኩም፣ በንግዱ ዓለም ተሰማርቼ በነበር ወቅትም አልሳካልኝ ያለ ነገር ነበር፡፡ ብዕር አንስቼ ከወረቀት ጋር ማዋኻድ ስጀምር ግን ከባዱ ነገር ቀላል ሆነ፡፡ አልሳካ፣ ድምፁም አልሰማ ያለው ነፃነትና የፍትሕ ድምፅም ከአጥናፍ እስከ አጥናፍ በምድሬ በናይጄሪያ ተሰምቶ አምባገነኖቹንና እብሪተኞችን መግቢያና መውጫ አሳጣቸው፣ እረፍትም ነሣቸው፡፡

ብዕር …፣ ብዕር …፣ የብዕር ኃይል ምንጊዜም ያሸንፋል፡፡ ለእኔ ከዚህ በላይ ደስታ የለም፡፡ በዚህ ወቅት የፈለገው ነገር ቢመጣም በቆራጥነት ለመጋፈጥ ተዘጋጅቼያለኹ፡፡ እንደሚመስለኝ በዚህ ሰዓት ታላቅ የሆነ የሞራል ድል የተጎናጸፍኩት እኔ ነኝ፡፡ በጠላትነት የተነሡብኝ አምባገነኖች፣ ጠላቶቼ ከዘላለማዊ እፍረትና ጸጸት ከማያመልጡበት የሲኦል ቅርቃር ውስጥ እንደገቡ ሆነው ነው የሚሰማኝ፡፡ ነበር ያለው ያ ጀግና የብዕር ሰው!!

በእያንዳንዱ ናይጄሪያዊ ሕዝብ፣ የአርነት ታጋዮችና በዓለም ሕዝቦች ሁሉ ዘንድ ብሎም የኪነ ጥበብ ወዳጆችና አፍቃሪዎች ልብ ውስጥ ኬን ሳሮዊዋ ዛሬም ነገም ሕያው ሆኖ ይኖራል፡፡ አባቻና መሰል አምባገነኖች ግን በአረመኔያዊ ግብራቸው ታሪክ በትዝብት ሲያስታውሳቸው ይኖራሉ፡፡
በመጨረሻም በአገራችን ታላቅ የሆነ ብዕራዊ ተጋድሎ ያደረጉትን እነ ጸጋዬ ገ/መድኅንን፣ እነ አቤ ጉበኛን፣ እነ በዓሉ ግርማን አርአያ አድርገው ዛሬም ስለ እውነት፣ ስለ ፍትሕ፣ ስለ ነፃነት … በጨዋ፣ በታረመና ባላመነዘረ ብዕራቸው ተጋድሎ እያደረጉ ላሉ ኢትዮጵውያን ሁሉ ያለኝን አድናቆትና ክብር ለመግለጽ እወዳለኹ፡፡
በአቤ ጉበኛና በበዓሉ ግርማ መንፈስ፣ ሌሎችም በዚህ ዘመን የእነርሱን ብዕር ቁርጠኝነትና ወኔ የተቀላቀሉ ኃያላንና ጀግኖች ብዕረኞች ለተገፉ ወገኖቻቸው፣ ለሰው ልጆች መብት፣ ለፍትሕና ለእውነት በመቆም በተባ ብዕራቸው ላደረጉትና እያደረጉት ላለው ታላቅ ተጋድሎ ሊዘከሩ የሚገባቸው የምን ጊዜም የኢትዮጵያ የብዕር ጀግኖቻችን ናቸውና ልናከብራቸው፣ ልንዘክራቸው ይገባናል ለማለት እወዳለኹ፡፡
ሰላም! ሻሎም!

“አንተ የኔ ጀግና ነህ፡፡ ብትሞትም በእውነትህ ኮርተህ ሙት!” ሰርካለም ፋሲል

ጋዜጠኛ ወሰንሰገድ ገብረ ኪዳን እንደሚከተለዉ የዛሬዉን የጠቅላይ ፍርድ ቤት ዉሎና አሳዛኝ ክስተት እንደሚከተለዉ አስቀምጦታል፡

የእነ አንዱአለም እና እስክንድር ነጋ ነገር
በጠቅላይ ፍ/ቤት
ወሰን ሰገድ ገብረ ኪዳን

“ ሀገሬን ሀገሬን – የምትል ወፍ አለች
እኔን እኔን መስላ፣ ታሳዝነኛለች” – አዝማሪ

ሌሊት ሌሊት እንደ “ዳዊት ደጋሚ” ስለማመሽ ጠዋት ጠዋት ተጋድሜ ማርፈድ ልማዴ ነበር፡፡ ዛሬ ዕለተ ሐሙስ ሚያዝያ 26 ቀን 2005 ዓም፣ ካለወትሮዬ በጠዋት ከዕንቅልፌ ተነሳሁ፡፡ እናም ወደ ጠቅላይ ፍ/ ቤት አመራሁ። ዕለቱን እያሰ ብኩ፡፡

የዛሬው ሐሙስ በክርስትና አማኞች ዘንድ በተለየ መልኩ የሚታሰብ ቀን ነው፡፡ ክርስቶስ ትህትናን በተግባር ያስተማረበት ቀን ነው፡፡የሐዋርያዎቹን እግር ዝቅ ብሎ ያጠበበት ቀን፡፡ በልማድም ቢሆን ሐሙስ የቀን ቅዱስ ነው ይባላል፡፡ ስለዚህም ከእነ አንዱአለም አራጌ እና ጋዜጠኛ እስክንድር ነጋ የይግባኝ ማመልከቻ “የተቀደሰ” ዜና እሰማለሁ የሚል ሃሳብ ተሞልቼ ነበር 6 ኪሎ ወደሚገኘው ጠ/ፍ ቤት በእግሬ ያቀናሁት፡፡

በእግሬ ያመራሁት ተከሳሾቹ ከማረሚያ ቤት የሚመጡት አርፍደው ነዉ በሚል እሳቤ ነበር፡፡ ነገር ግን ከጠዋቱ 3 ሰዓት ላይ እስረኞቹ ችሎት ገብተው ተቀምጠዉ ነበር፡፡ ወዲያው ከእስረኞቹ ውጪ ችሎቱን ለመከታተል የመጡ ሁሉ ከክፍሉ እንዲወጡ ተደረገ፡፡ ችሎቱ ውስጥ አንዱአለም አራጌ እና እስክንድር ነጋ እንዲሁም በሌላ መዝገብ የተከሰሱ ሌሎች 3 እስረኞች ከአጃቢዎች ቀሩ፡፡ በእነ አንዱአለም መዝገብ ተከሰው ይግባኝ የጠየቁት ሌሎች እስረኞች በስፍራው አልታዩም፡፡ እኛ ኮሪደር ላይ ተሰባስበን ለምን ሌሎቹ እስረኞች እንዳልመጡ እየተወያየን ደቂቃዎች በደቂቃዎች ላይ ነጎዱ፡፡

“ ሀገሬን ሀገሬን – የምትል ወፍ አለች
እኔን እኔን መስላ፣ ታሳዝነኛለች ”

3 ሰዓት ከ50 ደቂያ ሲል ናትናኤለ መኮንን እና ክንፈሚካኤል ደበበ (አበበ ቀስቶ) አንድ አንድ እጃቸውን በካቴና ታስረው ከውጪ ወደ ውስጥ ገቡ፡፡ ኮሪደር ላይ ችምችም ብሎ በሚጠብቃቸው ሰው መሃል እያለፉ አንዱ በግራ እንዱ በቀኝ እጁ እየጨበጡኝ አልፈው ወደ ችሎት ገቡ፡- በፖሊስ ታጃበው፡፡ 3 ሰዓት ከ55 ደቂቃ፤ ዳኞች ወደ ችሎት ገብተው ቦታቸውን ያዙ፡፡ ወዲያው ታዳሚ እንዲገባ ፈቀዱ፡፡ ጥቂት ለችሎቱ በር በቅርበት የቆሙ ታዳሚዎች ገቡ፡፡ የደሃ ሳሎን የምታክለው(ደሃ ሳሎን አለው እንዴ?)

ችሎቷ ወዲያው ጢም አለች፡፡ 4 ሰዓት የግራ ዳኛው አንድ እስረኛ ጠሩ፡፡ እናም ውሳኔያቸውን በቃል ቅልብጭ አርገው ተናገሩ – በነፃ፡፡ በሌላ ክስ የታሰረውን ሁለተኛ ተከሳሽ ጠሩ – በነፃ፡፡ እኔ ከጠቀመጥኩበት ወንበር ጀርባ ያሉ ሁለት ሴቶች ወደመሬት ተደፍተው በደስታ አለቀሱ፡፡ መደሰት እንጂ ማዘን አይገባም ብለን ገፋፍተን “አስወጣናቸው፡፡” የቀጣዩን የእነ እስክንድርን መዝገብ ውሳኔ ለመስማት እየቋመጥን፡፡

“ሀገሬን ሀገሬን -የምትል ወፍ አለች
እኔን እኔን መስላ፣ ታሳዝነኛለች”

የመጀመሪያዎቹ መዝገቦች ፍርድ ሲነበብ እኔ በዚያች ጠባብ አዳራሽ ውስጥ ተደራርቦ የተቀመጠውን ሰው ሆን ብዬ ቆጠርኩ፡፡ የጋዜጠኛ እስክንድር ነጋ ባለቤት ቦታ አጥታ ከእኔ ጋር አንድ ወንበር ተዳብላ ተቀምጣለች፡፡ ሌሎችም ሰዎች እንደዛው፡፡ ብቻ በዚያች ጠባብ ችሎት ውስጥ ከተሳሾች፣ ከጠበቆች፣ ከእስረኞችና ከችሎት አስከባሪዎች ውጭ 48 ሰው ታፍጓል፡፡ ሌላው ሰው በቦታ ጥበት ኮሪደር ላይ ተኮልኩሏል፡፡ የመሃል ዳኛው ከፊት ለፊታቸው ተደጉሶ የተቀመጠውን ፋይል እየነካኩ በለሠለሰ አንደበት

“እንግዲህ እናንተ ፍ/ቤቱን … ውሳኔ መቀበል አለባችሁ አሉ፡፡

በአንድ ወንበር ላይ ተፋፍገን የተቀመጥነው እኔና ሰርካለም እርስ በርስ ተያየን፡፡ ዳኛው ቀጠሉ“በዚህ መዝገብ የቀረበው ክስ በባህሪው ከሌሎች መዝገቦች የሚለይና ውስብስብነት ያለው ነው፡፡ አዋጅ ቁጥር 652/2001 በመሆኑ፣ ሕጉ የተቃኘበትን መርህ መቃኘትን” እንደሚጠይቅ አብራሩ፡፡

በዚህ መሰረት በአምስት የይግባኝ ፋይሎች የቀረቡትን አቤቱታዎች ተያያዥነት ያላቸው በመሆናቸው ፍ/ቤቱ በአንድ ላይ በጥልቀት መርምሮ ዉሳኔ መስጠቱንና ገለፁ፡፡ በቅድሚያ የአቃቤ ሕግን ክስ፣ ቀጥሎም የይግባኝ ባዮችን አቤቱታ፣ ከዚያም በከሳሽና በተከሳሽ ወገኖች የቀረቡትን ምስክሮችና ማስረጃዎችን ይዘት በመመርመር ፍ/ቤቱ የሰጠውን ትንታኔና ውሳኔ በንባብ እንደሚያሙ አሳውቁ፡፡

“ ሀገሬን ሀገሬን- የምትል ወፍ አለች
እኔን እኔን መስላኝ፣ ታሳዝነኛለች”

ከእኔ በስተቀኝ የተቀመቡት ዕድሜአቸው ወደ ሰባዎቹ የሚጠጋ ጎስቋላ እናት ዳኛው የሚያነቡትን ነገር በቅጡ የተረዱት አይመስሉም፡፡ አንዴ ወደ እኛ፣ አንዴ ወደተከሳሶቹ እየተንጠራራሩ ያያሉ፡፡ እንደዘበት ሸብ ያደረጉት ሻሻቸውን አልሮ የወጣውን ሽበታቸው እየደባበሱ ቁና ቁና ይተነፍሳሉ፡፡ ገፅታቸው ላይ አንዳች ድካምና የሕመም ስሜት የሚነበብባቸው እኚህ እናት ምቾት አልተሰማቸውም፡፡ ዳኛው ንባባቸውን ከጀመሩ ድፍን አንድ ሰዓት አልፏል፡፡ ድንገት ወደቀኝ ዞር ስል ሴትዮዋ የሆነ ስሜት ስልም ሲያደርጋቸው አየሁ፡፡

ሰርካለምን በክርኔ ጎሽመ አድርጌ ወደሴትየዋ ጠቆምኳት፡፡ እጆቺን በእኔ ላይ አሸጋግራ “አይዞዎት” እያለች ጎናቸውን ጨመቅ ጨምቅ፣ አሸት አሸት አደረገቻቸው፡፡ ወዲያው የእፎይታ ትንፋሽ በረዥሙ ተንፍሰው “ነቃ” አሉ፡፡ የክንፈሚካኤል እናት መሆናቸውን ነገረችኝ እየደባበሰቻቸው፡፡ የእስረኛ ቤተሰቦች ከመላመድ ብዛት እርስ በርስ የሚበረታታበት ሕክምና መሆኑ ነው፡- አልኩ ለራሴ፡፡

“ ሀገሬን ሀገሬን- የምትል ወፍ አለች
እኔን እኔን መስላኝ፣ ታሳዝነኛለች”

ዳኛው ንባባቸውን አላቋረጡም፡፡“ አንዱአለም አራጌን በሚመለከት፡- ሕገመንግስታዊ መብትን ሽፋን አድርጎ በመጠቀም፣ ከግቦት 7 ጋር ለሽብር ተግባር በመመሳጠር፣ ወጣቶችን ለሽብር ተግባር በማደራጀት፣ ለሽብር በመምራት… ወዘተ ናትናኤል መኮንን፡-እንዲሁ ወጣቶችን ወኪል አስተባባሪ በመሆን…. ክንፈሚካኤል ደበበ በህኑዕ የግንቦት 7 አባለ በመሆን፣ በማሴር…. እስክንድር ነጋ በሕገመንግስቱ ለዜጎች የተሰጠውን ሃሳብን በነፃነት የመግለፅ መብት ሽፋን በማድረግ የግንቦት ሰባትን ዓለማ ለማስፈፀም፣ በስብሰባና በፅሁፍ ሕዝብን ለአመፅ በመቀስቀስ፣ ለኢሳት መረጃ በማቀበል፣ ከጋዜጠኛ ፋሲል የኔ አለም ጋር በመመሳጠር..ወዘተ” መከሰሳቸውን መረጃና ምስክር የቀረበባቸው መሆኑን አተቱ፡፡

ሁሉም ተከሳሾች በተራ ቁጥር 1 በቀረበባቸው ክስ የሥር ፍ/ቤት ያሳለፈውን ጠቅላይ ፍርድ ቤቱ የሚነቀፍ ሆኖ እንዳላገኘው ገለፁ፡፡ ሁለተኛው ክስ በአንደኛው ክስ ስር የሚጠቃለል በመሆኑ መሻሩንም አክለው አሳወቁ፡፡ በአጠቃላይ ሁሉም ተከሳሾች በ1ኛ እና በእራተኛ ክስ ጥፋተኛ ተብለው የተወሰነባቸው ውሳኔ የሕግ ስህተት እንደሌለበት አሳወቁ፡፡ ተከሳሾች ጥፋተኛ ሆነው የተገኙበት አንቀፅ 17 እና 18 ዓመት እስራት በአጠቃላይ ድምር ወደ 34 ዓመት እስራት የሚደነግጉ ቢሆንም፣ በሃገሪቱ ከ25 ዓመት በላይ እስር ስለማይፈቀድ የሥር ፍ/ቤት ውሳኔ እንዲፀና መወሰኑን ገለፁ፡፡ይሁን እንጂ የሥር ፍ/ቤት ክንፈሚካኤል ደበበ (አበበ ቀስቶ) ፍ/ቤት በመድፈር በተጨማሪነት የተላለፈበት የ5 ዓመት እስር እንዲሻር ሲሉ ትዕዛዝ ሰጡ፡፡

“ሀገሬን ሀገሬን – የምትል ወፍ አለች
እኔን እኔን መስላኝ፣ ታሳዝነኛለች ”

የፍርዱ ውሳኔ ምንም ለውጥ እንዳላመጣ ቀድማ የተረዳችው ሰርካለም ፋሲል “እስክንድር ወንጀለኛ ነው ከተባለ፣ ወንጀሉ ሃገሩን መውደዱ ነው” ብለህ ፅፍ አለችኝ -በንዴት። “ግንቦት 7 የእስክንድርን እጅ የመጠምዘዝ ኃይል የለውም” አለችኝ በቁጭት፡፡

ችሎቱ ውሳኔውን አሳውቆ ዳኞች እንደተነሱ፣ ተከሳሾች ከፍርድ ሳጥን እየወረዱ ባለ እስክንድር እልሀ በተናነነቀው ስሜት ጮክ “አትጠራጠሩ እውነት ተደብቃ አትቀርም” አለ፡፡ ናትናኤል “የተከራከርነው ፍትህ እናገኛለን ብለን አይደለም፤ ፍትህ ወዳድ ስለሆንን ነው” አለ፡፡ አበበ ቀስቶ “ ለማንኛውም እዚህ መጥታችሁ በእናንተ ኮርተናል” ሲል በችሎት የሰገኘውን ሰው አመሰገነ፡፡ “አንተ የኔ ጀግና ነህ፡፡ ብትሞትም ሙት፣ በእውነትህ ኮርተህ ሙት!” አለች ሰርካለም እንባ እየተናነቃት፡፡ ወዲያው ፖሊሶች ታዳሚውን እየገፋፉ ከችሉት አስወጡ፡፡ በሌላኛው በር አንዱአለምና እስክንድርን አንድ ላይ፣ ክንፈሚካኤል እና ናትናኤልን በአንድ ላይ በካቴና አስረው፡- ወደ ቃሊቲ፡፡“

“አንተ የኔ ጀግና ነህ፡፡ ብትሞትም ሙት፣ በእውነትህ ኮርተህ ሙት!” አለች ሰርካለም እንባ እየተናነቃት። ወዲያው ፖሊሶች ታዳሚውን እየገፋፉ ከችሉት አስወጡ፡፡ በሌላኛው በር አንዱአለምና እስክንድርን አንድ ላይ፣ ክንፈሚካኤል እና ናትናኤልን በአንድ ላይ በካቴና አስረው፡- ወደ ቃሊቲ፡፡

አይዞዎት እማማ፤ ወደፊት የሚመጣው አይታወቅም አልኳቸው ” የክንፈሚካኤልን እናት፡፡ በእኔ ቤት ማፅናናቴ ነው፡፡“ አዎ የሚመጣው አይታወቅም፣ ይኼስ ይመጣል ብሎ ማን አሰበ፡፡ እናንተ ወጣቶች ራሳችሁ አይ ዞአችሁ፡፡ ታሰሩ፡፡ አይዞአችሁ፡፡ ግን አትሙቱ” አሉኝ የክንፈ እናት፡፡“

አይዞአችሁ ታሰሩ! ግን አትሙቱብን!” የእኚያን እናት አባባል እያላመጥኩ ከዳኝ፡፡ እንባዬ መጣ፡፡ ዓዓይኔን እንዳያዩ ፊቴን አዞርኩ፡፡

“ ሀገሬን ሀገሬን – የምትል ወፍ አለች
እኔን እኔን መስላኝ፣ ታሳዝነኛለች ”

አበቃ፡፡

አሁንም የፖለቲካና የህሊና እስረኞች በአፋጣኝ እንዲፈቱ እንጠይቃለን!!!

አንድነት ለዴሞክራሲና ለፍትሕ ፓርቲ(አንድነት) የተሰጠ መግለጫ

ፓርቲያችን አንድነት ለዴሞክራሲና ለፍትህ ፓርቲ (አንድነት) በሰላማዊና ህጋዊ የትግል መንገድ ለውጥ ማምጣት ይቻላላል፤ ዴሞክራሲያዊት ኢትዮጵያን እንፈጥራለን፤ ስልጣንም በግለሰቦች ወይም በቡድኖች ይሁንታ የሚገኝ ሳይሆን በህዝቡ በልካም ፈቃድ ይሆናል የሚል ጠንካራ እምነት በመያዝ ከአምባገነኑ ስርዓት ጋር እየታገለ የሚገኝ ነው፡፡

ይሄ ጠንካራ የትግል መነሳሳታችን እና ያለን የህዝብ ድጋፍ ጠንካራ ተቃዋሚ በዓይኑ ማየት የማይፈልገው ገዥ ፓርቲ ጥርስ ውስጥ የከተተን በምስረታችን ማግስት ጀምሮ ነው፡፡ በርካታ አባሎቻችንንና አመራሮቻችንን ተልካሻ ምክንያት እየተለጠፈባቸው ታስረዋል፣ ተሳድደዋል፣ ተደብደበዋል፡፡

በተለይ ከቅርብ አመታት ወዲህ ደግሞ ጠንካራ የፖለቲካ እንቅስቃሴዎችና ተቃውሞዎች ሁሉ የሚሰጣቸው ስም ሽብርተኝነት የሚል ነው፡፡ የስርዓቱ የስልጣን ማቆያ፣ የሀቀኛ ተቀናቃኞችና ስርዓቱን የሚተቹ ጋዜጠኞች ማሸማቀቂያ ብሎም ማስወገጃ መሳሪያ ሽብርተኝነት ከሆነ ውሎ አድሯል፡፡

ፓርቲያችን አንድነትም ጠኋትና ማታ እየተጠቀሰ ዜጎች እንዲሸማቀቁ የሚደረግበትና የፖለቲካ አመራሮች የሚታሰሩበት የፀረ-ሽብርተኝነት ህግ ተግባራዊ ከመሆኑ በፊት ተቃውሞውን አሰምቷል፡፡ ሰኔ 18 ቀን 2001 ዓ.ም የፀረ ሽብር ህጉ ገና ረቂቅ አዋጅ እንደነበረ ለማፈን እየተሰናዳ መሆኑን በመጥቀስ ‹‹የፀረ-ሽብርተኝነት ረቂቅ አዋጅ በዜጎች ላይ ሽብር ፈጣሪ ነው›› በሚል ርዕስ ባወጣነው መግለጫችን ረቂቅ አዋጁ እንዳይፀድቅ የሚሰማ ባይኖርም አበክረን ጩኸታችንን አሰምተን ነበር፡፡

ወዲያው ህግ ሆኖ እንደወጣም የፀረ ሽብርተኝነት ትግልን ሽፋን በማደረግ የገዥው ፓርቲ የሰብዓዊና ዴሞክራሲያዊ መብቶችን የማፈን ድብቅ ፍላጎት ተግባራዊ መሆን ጀመረ፡፡ የመጀመሪያው ሰለባ አንድነት ፓርቲ ነው ብንል ማጋነን አይደለም፡፡ አንዱአለም አራጌንና ናትናኤል መኮነንን የመሰሉ ከፍተኛ የፓርቲ አመራሮችንና ሌሎችን የፓርቲያችን አባሎች በእስር አጥተናል፡፡ እነዚህ በማናለብኝነት የሚፈፀሙ የገዥው ፓርቲ ሸፍጦች ትግላችንን የበለጠ የሚያጠናክሩና አፈናውን ለመስበር ጉልበት የሚሆኑን ናቸው እንጂ አንገታችንን አያስደፉንም፡፡ የፍትህ ተቋማት ላይ እምነት መጥፋቱ፣ ከላይ እስከታች ያለው የአፈና ቋንቋ ተመሳሳይ መሆኑና የገዥው ፓርቲ እጅ መርዘም ትግሉን ማፋፋምና አጠናክሮ መቀጠል ዋና መፍትሄ እንደሆነ የሚጠቁመን ነው፡፡

ሚያዚያ 24 ቀን 2005 ዓ.ም ይግባኝ ሰሚ ችሎት በነ አንዷለም አራጌ ፍርድ ላይ በአንድ መዝገብ ከተከሰሱት መካከል የአንዱን ጥቂት ዓመታት ከመቀነስ ባለፈ የስረኛውን ፍ/ቤት ውሳኔ ትክክል ነው ብሏል፡፡ ይሄ ፍርድ የሚያስታውሰን የኪሊማንጃሮ ኢንተርናሽናል ኮርፖሬሽን ሊሚትድ በዓለም ባንክ የገንዘብ ድጋፍ ከፀረ ሙስና ኮሚሽን ጋር በመተባበር ይፋ ያደረገውን ጥናት ነው፡፡ በ27 የመንግስት ተቋማት ላይ በተደረገ ጥናት ‹‹በከፍተኛ ደረጃ የህዝብ አመኔታ ያጡ ተቋማት›› በሚል ርዕስ ስር በመጀመሪያ ደረጃ የተቀመጡት ፍ/ቤቶች ናቸው፡፡ ይሄ የሚያሳየው ፍ/ቤቶች የገዥው ፓርቲ ጉዳይ አስፈፃሚዎች እንጅ ገለልተኛ ተቋማት አለመሆናቸውን ነው፡፡

ከፍተኛው ፍ/ቤት ይግባኝ ሰሚ ችሎት ወጣቱን ፖለቲከኛና ከፍተኛ አመራር አንዱአለም አራጌና ናትናኤል መኮንን ሽብርተኞች እንደሆኑና በሰላማዊ ትግል ሽፋን ሽብርተኝነትን እንሚያራምዱ ተደርጎ የቀረበው ሀተታ የፓርቲያችንን ጠንካራ መዋቅር ያላገናዘበ፣ የፓርቲያችንን መልካም ስም የሚያጎድፍ ነው፡፡ እነ አንዷለምም ሰላማዊ ታጋዮች እንጅ ሽብርተኞች አይደሉም፡፡ ሽብርተኝነት በኮሃራም ናይጀሪያ፣ በፓኪስታንና አፍጋኒስታን በየዕለቱ የምንሰማው እንጅ የኢትዮጵያ ችግር አይደለም፡፡

በአጠቃላይም የፀረ ሽብርተኝነት ሕጉ የኢህአዴግ የዕድሜ ማራዘሚያና መጠቀሚያ ከመሆን በዘለለ ፋይዳ አለው ብለን አናምንም፡፡ የአመራሮቻችንንና አባሎቻችንን መታሰር አጥብቀን እንቃወማለን፡፡ አሁንም ደግመን ደጋግመን የምንለው በሽብርተኝነት ስም ዜጎችን ማሰር ይቁም፤ የፖለቲካ እንቅስቃሴ ሽብርተኝነት አይደለም፤ የፖለቲካና የህሊና እስረኞ በአስቸኳይ ይፈቱ፡፡

ትግላችን እስከለውጥ ድረስ ይቀጥላል!!!

አንድነት ለዴሞክራሲና ለፍትሕ ፓርቲ(አንድነት)

ሚያዝያ 25 ቀን 2005 ዓ.ም

አዲስ አበባ

ለማንበብ እዚህ ይጫኑ

ለማንበብ እዚህ ይጫኑ

ለማንበብ እዚህ ይጫኑ

ለማንበብ እዚህ ይጫኑ

ለማንበብ እዚህ ይጫኑ

ለማንበብ እዚህ ይጫኑ

ያፍሪካ አንድነት ሀምሳኛ አመት ክብረ በአል በአዲስ አበባ በፈረንጆች አቆጣጠር may 25 2013 የካሄዳል። ብዙ አፍሪካና የሌሎች አገር መሪዎች ትላልቅ ባለስልጣናትና ዲብሎማቶች ይገኛሉ። ብዙ የውጪ አገር ጋዜጠኞች ለበአሉ አዲስ ይገባሉ። ጊዜው አጭር ነው ልናደርግ የምንችለው ነግር ይኖር ይሆን?። ደደቦች ነን ቀድመን ሊታሰበን ባለመቻሉ።

ይህ ጽሁፍ መታሰቢያነቱ ለአንዷለም አራጌ፤ ለስክንድር ነጋና ለኛ ሲሉ በወያኔ እስር ቤት ለሚማቅቁ ወገኖቻችን ይሁን።

ሁለገብ ትግል የሚለው ጽንሰ ሀሳብ የህዝባዊ አመጽ( አቢዬት) በዋናነት ታሳቢ ያደረገና ያካተተ ነው። ይህ ዛሬም የብዙ ድርጅቶች የትግል መርህ ነው። ይህ አቋም በድርጅቶች የተያዘው የአረቡ አቢዮት ከመጀመሩ አይደልም ከመታሰቡ በፊት ነው። ከአገራችንና ካለንበት ሁለንተናዊ ተጨባጭ ሁኔታ ላይ ተንተርሰው የሚሰራ መሆኑን አስበውበት የያዙት አቋም ተደርጎ ሊወሰድ ይችላል። ይህ አቋም ህዝብ እንቢኝ ለማለትና ለማመጽ በዋናነት አብዛኝው ህዝብ በጭቆናና በአፈና ስር መኖር አለበት ከሚለው ትክክለኛ መሰረት ላይ የተነሳ ነበር።

ለየት ባለ ሁኔታ ደግሞ ኢትዮጵያዊያን አይን ባወጣ አድሎ፤ ዘርኝነትና መበዝበዝ ውስጥ እንኖራለን። የምንታገለው ሀይል በወረቀት ላይ ባለና በታቀደ መንገድ በተደጋጋሚ አንድነታችንን ለመናድና በሉአላዊነታችን ላይ ጉዳት ያደረሰ ወደፊትም የሚያደርስ መሆኑን ለአቅመ አዳም የደረሰ ኢትዮጵያዊ ዜጋ ሁሉ በሚያውቅበት ሁኔታ የሚደረግ የህዝባዊ እንቢተኛነት ትግል ነው። የማያነብና የማይሰማ እስከጭራሹኑ የአገሩን ጠቅላላ ሁኔታ የማይከታታል ዜጋ ቢኖር እንኳ አይኑም ልቦናውም ከአልታወረ ያገራችን ካርታ አሁንና በፊት ምን እንደሚመስል የማያውቅ ኢትዮጵያዊ የለም።

ትግላችን ዜጎች በሙሉ ሊሰኝ በሚችል በጣም በጣም ብዙዎቻችን ከጥቂቶች ጋር የምናደረግው ነው። በእርግጥ አሁን ሁላችንም ድርሻ እያደረግንበት ያለ ትግል አይደለም። ሁላችንም ወይም የበዛነው የድርሻችንን ማድረግ ስንጀምር ለመደቆስ ክርናችን ይጠነክራል። ያኔ ከጥቂቶች ውስጥም አንድ ሁለት ተብለው ሊቆጠሩ የሚችሉ እሰከመጨረሻው ሊገዳደሩን የሚችሉበት እውነት የማያከራክር የትግሉ ባህሪ ነው።

በርግጥ በተለያዩ ምክንያቶች ይህን እአደገኛና አስፈሪ ሁኔታ ለምለወጥ በሚደረገው ጥረት ምንም አስተዋጾ ለማድረግ የማይፈልጉ አሉ። ያም ሆኖ ከዚህ ክፍል ውስጥም ሁሉም እስከመጨረሻው ከዋናዎቹ ተፈራጆች ጋር አብረው የሚታገሉ ናቸው ማለት አይደለም። ቁጥሩ ክዚህ ክፍል እጅጉን የበዛ ደግሞ ዛሬ ሲንገበገብ የሚኖርና ትግሉ ላይ ንቁ ተሳታፊ ነው። ከዚህኛው ቁጥር የበዛው ደግሞ በራሱ ተነሳሽነት ሳይኖረው ቀርቶ ለጊዜው የድርሻውን እያደረገ ባይሆንም በአግባቡ ከተደረሰ ዛሬ የድርሻውን ለማድረግ አሳምሮ የሚፈልግ ነው። ከስካሁን ከገራችን የትግል ተሞክሮም ሆነ የህዝባዊ እንቢተኛነት ከተደረገባቸው አገሮች ልምድ ትግሉን ስራዬ ብለን የያዝነው በግባቡ ልናካሂደው ስንጀምር የበዛው በሂደት ትግሉን እንደሚቀላቀል በርግጠኛነት መናገርም ይቻላል ።

ምስጋና ለአረቡ አለም አቢዬት ህዝባዊ እንቢተኛነት ከድርጅቶች አልፎ ብዙ ቁጥር በአላቸው ዜጎች ዘንድ እንደ አንድ አይነት የትግል አማራጭ ተድርጎ የሚታይ ነው። እንዲያድግ ሆኖ በአገራችን የተተከለ ችግኝ ነው ማለትም ይቻላል። የችግኙ የእድገት ፍጥነት ግን የምንታገለው አካልና እኛ ለችግኙ እንደምናደርግለት እንክብካቤ የሚወሰን ነው የሆነው። እኛ መኮትኮትና ውሃ ማጠጣቱን ስራዬ ብለን አልያዝነውም። ጥሩነቱ ወያኔዎች ግን መንከባከቡን አላቆሙም። በተጨማሪም አሁን እየደበዘዘ ቢመጣም በጊዜው በኛ አገር ተጨባጭ ሁኔታ ይህ አይነቱ የትግል አይነት ይሰራልና አሁን የሚቻል አይደለም በሚል ይደረግ የነበረው ውይይት በተመሳሳይ ይህንን አይነቱን ትግል በማስተዋወቅ ከፍተኛ እገዛ አድርጓል። በርግጥ ውይይቱ አሉታዊሚ አወንታዊም አስተዋፆ ነበረው።

1- ትግሉ በተደረገባቸው አገሮች ውስጥ የነበረው ነባራዊ ሁኔታዎች የተለያዩ ሆኖ እያለም እኛ እንጠቀምበት ዘንድ የግድ ከአንዱ አገር ጋር ሙሉ በሙሉ መመሳሰል አለበት ከሚል ስሌት በመነሳት የማመሳሰል ስራ ነበር።

2- ለምንታገለው ክፍል ጥንካሬ ያልሆኑ ነገሮችን ጥንካሬ አድርጎ ማቅረብ ነበረበት።

ለምሳሌ፤- ሁለት መቶ ሺ አካባቢ የሚቆጠር ከህዝብ የወጣ ሰራዊት በአንድ ዘር ጠቅላላ አመራር ስር መደራጀቱ ጥንካሬ ሆኖ ቀርቧል። ያንድ ዘር የበላይነት በገነነበት አድሎ ጣሪያ በነካበት ወያኔ ከፋፍሎናል ምክንያት ነበር። እነዚህ ጥንካሬ ሊሆን የሚችሉት አግባብ ያለው ስራ እስከጭራሹ ሳንሰራባቸው ወደ ህዝባዊ አመጹ ከገባን ብቻ ነው። ያውም ምን አልባት። እንዲሁ መግደል ማሰርና፤ ማሰደድ ጥንካሬ ሆኖ ተወስዷል። በጅምላ በመግደልና በማሰር መንግሱትን ያፀና ያለ ይመስል።

3- ያስፈልጉናል ጎደሉ ተብለው ሲጠቀሱ የነበሩ ቁም ነገሮች ነበሩ።

የተባበረ ተቃዋሚ፤ ሜዲያ፤ የተደራጀ ሀይል፤ መሳርያ የታጠቀ ሀይል፤ ሽግግሩን ያአገሪቷን ሉአላዊነት አደጋ የማይጥልና ሁከት ያልበዛበት ማድረግያ ብለሀት፤ ቁርጠኝነት ያለው ታጋይ…. የመሳሰሉትን ማስታወስ ይቻላል።

ብዙዎቹ በርግጥም የሚያስፈልጉን ናቸው። ችግሩ ከአልተሟሉ አይቻልም ከሚል አቋምና ይባስም ብሎ እስከጭራሹ ተሰርተው ሊሟሉ የማይችሉ አድርጎ የማቅረብ አዝማሚያ ነበራቸው። በዚህ ምክንያት ህዝባዊ እንቢታው ላይ የነበረውን የትግል መነሳሳት ላይ አፍራሽ ሚና ከመጫወትም አልፎ ያስፈልጉናል የተባሉት ጉዳዮች ጠንክረን እንዳንሰራባቸው አድርጓል። አንዳንዴ መከራከሪያዎቹ አገርን ያነሰ ከመውደድና፤ ህዝብን ከማስጨረስ ጋር ተያይዞ ይቀርብ ስለነበር በጊዜው ዳር ዳር ያሉትም ህዝባዊ እንቢታውን ትግል በሙሉ ልብ አጠንክረው ሊገፋበት አልቻሉም። በተወጠረ ገመድ ላይ ዱላ ይዘው የሚሄዱ ነበር የሚመስሉት። ያም ሆኖ ግን ዛሬም ቢሆን የጎደሉትን ለማሟላት የሚፈጨረጨሩት ህዝባዊ አመጽን እንሞክረው የሚል አዝማሚያ የነበራቸው አካላት ናቸው። ይህ በራሱ ብዙ ይናገራል።

እሰከሰራንበትና ተሰርቶ ይመጣል በሚል ከሆነ ለወደፊቱም አልተሟላምና በበቂ አልተሰራበትም የሚለው ጉዳት የለውም። የአረቡ አቢዮት ከተካሄደባቸው አገሮች ጋር በንጽጽር ስናየው ግን። እኛ ዛሬ ያለንን የሚያህል የተደራጀ ተቃዋሚ ሆነ መዋቅራዊ ጥንካሬ ያላቸው ድርጅቶች አንዳቸውም አልነበራቸውም። የኛዎቹ ተዋህደው አንድ ባይሆኑም ፖለቲካው ሲተነትኑ እንጂ ጥቃትና ጥፋት በአገርና በህዝብ ላይ ሲፈጸም፤ ተባብሮ ለመታገልም ሆነ ስራን የመስራት ችግር አይታይም። እንደውም ተባብሮ መታገሉም ሆነ መስራቱ ከጊዜ ጊዜ በጣም እየተሻሻለ ነው። ትብብርን በሚመለከት መሰባሰቦች አሉ። ቡዙ የተባለበትና የበሰለ ጉዳይ ስለሆነ ግድ ሲል ያሉት ድርጅቶች በቀላሉ አንድ ሆነው ይታገላሉ ብሎ ደፍሮ መናገር ይቻላል። ዛሬ አንድ አላደርግ ያሉን የተራራቁ አቋሞችና አቋሞች በጣም በጣም ተጠጋግተዋል። በአጠቃላይ ህዝባዊ አመጽ ከተካሄደባቸው አገራት ያኔ አይደለም ዛሬ እዚህ ደረጃ ላይ መድረስ ያልቻሉት ይበዛሉ።

ሁሉም መሳርያ የታጠቀና አስፈላጊ ሲሆን ከህዝብ ጎን የሚቆም ሀይል አልነበራቸውም። የነበራቸውም ዛሬ እኛ ካለን ያን ያህል ጠንካራ ነበር ለማለት የሚቻል አይደለም። በተመሳሳይ ካሸነፍን በሗላስ፤ መሸጋገርያው ምን መምሰል አለብተ፤ አገር ማረጋጋት የሚሉት ጉዳዮች ላይ እኛ ዛሬ ያለንን ጠቅላላ ግንዛቤና ዝግጀት አመጹን ሲጀምሩት አንዳቸውም አልነበራቸውም። እንደውም ያሰቡበትም አይመስልም። የብዙዎቹ በውጪ ሀገራት ድጋፍ በመከራ የተጠጋገነ ነው ዛሬም ያለው። በርግጥ የመገናኛ መኖርና ዘመኑ ያፈራውን መገናኛ በመጠቀም ከኛ በጣም በጣም የተሻሉ ነበሩ። እኛ በቀላሉ የማናገኘው ወይ እስከጭራሹ የማናገኘው የሌሎች አገሮች ድጋፍ ነበራቸው። ስለዚህም በቀላሉ የበዛ የአለማቀፋዊ መገናኛ ሽፋን አግኝተዋል።

ሀ- ስለመገናኛ።

ህዝባዊ አመጹን ለማካሄድ ካሉብን መሰረታዊ ችግሮች አንድ በርግጥም በቂ መገናኛ አለመኖር ነው። ችግሩ ግን በቂ መገናኛ አለመኖሩ ብቻ አይደለም። ያሉንንም ትግላችንን በሚያግዝና በሚያፈጥን መንገድ መጠቀም አለመቻላችንም ሌላው ችግር ነው። እንደ አባይ ወንዝ ወራጅነቱ የማይቋረጠው ወያኔ የሚፈጽመውን ግድያ ፤ ማሰቃየት፤ ግፍ፤ ማፈናቀልና እንግልቶች የበዛውን የመገናኛ አውታሮቻችንን ሽፋን ወስዷል። ጥራዝ ነጠቆችና የወያኔ በአለስልጣናት እንዳበደ ውሻ በአሰኛቸው ጊዜ እየወጡ ለሚወረውሩት ሀሳብ ሁሉ ማረሚያና ማስተማርያ የሚሆን መልስ መስጠት እንዲሁ ቀላል የማይባል ሽፋን ይወስዳል። በአጠቃላይ ቀጥተኛ በሆነ መንገድ ህዝብን ለትግል ማዘጋጀቱ ላይ የተሰጠው ትኩረት ለቲካ ቲካ ከሰጠነው ሽፋን በጣም ያነሰ ነው።

ይህን የምንለው በተናጠል የሉንን የመገናኛ አውታሮች ተመልክቶ ግን ይደለም። አንዳንዶች ከሌሎች የሚሻሉበት ሁኔታ አለ። አንዳንዶች ለምን በዚህ መንገድ እንደሚሰሩም ግልጽ ነው። ዘመኑ የፈጠራቸው መገናኛዎችና የድርጅት ራዲዮ ጣቢያዎች በቀጥታ ትግሉ ላይ የማያወሩበት ወይ የማታገያ ጣቢያ የማይሆኑበት ምክንያት ግን የለም። ዋናው ችግር ግን የመገናኛዎች ብቻ አይደለም ትግሉ ላይ በየዘርፉ ምን መደረግ አለበት የሚለው ላይ ሊናገሩና የሚያስተምሩ ጠበበት አለመኖር ነው። ወደህዝባዊ አመጽ ከመግባታችን በፊት ህዘብን ለትግል የማዘጋጁና የለውጥ ግብር ሀይል በየዘርፉ ማዘጋጀት የሚችሉ ጠበብት እጅጉን ያስፈልጉናል።

እንቢተኛነቱ ከመጀመሩ በፊት ቀድሞ ሁሉም የድርሻውን ማወቅ፤ ደረጃ በደረጃ ተግባራዊ የሚያደርገውን፤ መውሰድ የሚገባውን ጥንቃቄ፤ እንቢተኛነቱን የሚያደርግበትን ስረአት ማሳወቅ አስፈላጊ ነው። ይህ አካሄድ ከአለንበት መጠነ ሰፊ አፈና አኳያ ለመደራጀት ላሉብን ከባድ የሆኑ ችግርም መለስተኛ መፍትሄ አድርገን ልንጠቀምበት እንችላለን። መገናኛን በሚመለከት እርቀን ተጉዘንም አንዴ እንቢተኛነቱን ከጀመርን በሀላ ሊኖር የሚችል የግንኙነት መታወክ ድረስ ልናስብበት ይገባል። በኛ በኩል መፍትሄ ብለን ነጻነታችን ላይ የሚንቀለቀል ፍላጎታችንና ጥልቅ ስሜታችንን የመጠቀም አስፈላጊነት ድረስ ወስደንዋል። መናበብን ያመጣንበት አንዱ ምክንያት ይህ ነበር።
በየሜዲያዉ በጽሁፍም በንግግርም አስተዋጾ የሚያደርጉ ዜጎች ጥቂቶች ናቸው። ከእነዚህም የበዙት በቀጥታ ትግሉ ላይ አተኩርው አይሰሩም። ሌላው ህዝባዊ እንቢተኛነቱን ለማስተባበር ሀላፊነት የወሰዱና ቁጥራቸው ቀላል ማይባል የሰቪክ ማህበራት የለውጥ ሀይሉን ማዘጋጀቱን አላማ አድርገው ትግሉን በሚያፋጥንና በሚጠቅም መንገድ ሜዲያዎችን መጠቀም አይሞክሩም። እነዝህን የመሳሰሉ ችግሮች ሜዲያዎቻችን አታጋይ እንዳይሆኑ በጅጉ አድርጓል። አሁንም ቢሆን ነገ ህዝብ ማወቅ ያለበትን ቀድሞ ዛሬ ይወቅ። መሰማቱን እርግጠኛ ለመሆን ቀድመን አሁን መጀመር ብቻ ሳይሆን ተደጋግሞ ይነገር።

መደራጀትን በሚመለከት ከመገናኛ አጠቃቀም ጋር አያይዘን የያንበትን ጉዳይ ሰፋ ለማድረግ። ለሁላችንም የመደራጀት አስፈላጊነት አያከራክርም። ጥያቄው ትግሉን አሸናፊ ለማድረግ ምን ያህል ዜጋ በድርጀት ማእቀፍ ውስጥ ማዘጋጀት አለብን የሚለው ነው?። ይህ ከታወቀ በአገር ቤት ለትግሉ የሚያስፈልገውን የሰው ህይል ለማደራጀት ከአለብን ችግር አኳያ ማደራጀት ከሚገባን አንድ ሶስተኛውን በማደራጀት የቀረውን ሶስት እጥፍ ቀድሞ ባወቀና በገባው ታጋይ ሀይል ልንሸፍነው የምንችልበት ሁኔታ አማራጭ ሊሆን ይቻላል የሚል ግምት አለን። በርግጥ በተያያዥም ማደራጀት የተቻለውን ከፍል ሙሉ አስተዋጾ በአግባቡ መጠቀም ምን አልባትም መስራት ከሚገባው በላይ እጥፍ ማሰራትም አብሮ ሊታሰብበት ይገባዋል።

ጠበብት ስንል፤- በየክፍሉ የጠለቀ እውቀቱ ያለው ካለ እሰየው። ከሌለ እራሳችንን ምሳሌ በማድረግ ብዙዎቻችን ልናደርገው ስለምንችል መድፈር ያለበትና መታረም የሚችል መሆኑን አውቆ አንድን አርእስት ስራዬ ብሎ ይዞ፤ የተቻለውን ያህል አርስቱ ላይ አንብቦ ፤ ጊዜ ሰጥቶ በይበልጥም ተብሰልሰሎ፤ ከኛ አገር ሁኔታና አቅማችን ጋር በተቻለ አስማምቶ ትግሉ ላይ ስለሚደረግ አስተዋፆ ነው።

ማስተማር ስንል ፤- በአለው ግዙፍ አፈና ውስጥ እራሳችንን ስለማደራጀት፤ ወይ መረጃን እንዴት እንደምንለዋወጥ፤ ዘምን ያመጣቸውን መገናኛዎች ትግሉ ላይ አጠቃቀም። ትግሉ ላይ መነቃቃትን መፍጠር ስለሚቻልባቸው መላዎች። ተማሪው፤ ኦፒዲዎው፤ ወላይታው፤ ወታደሩ፤ ቤንጤ ቆስጣሉ አይነት የዜጎችን ድርሻ በየማህበረሰባዊ ስብስቡ ምን አስተዋፆ ማድረግ እንደሚችል ማሳየትን ያካትታል። ትግልን ስለማቀናጀት ወይ ትግሉን ህዝባዊ ለማድረግና ስለቃላት አመራረጥ ሊሆን ይችላል።

ኢሳትን በሚመለከት፤-ጠንካራ የሆነ አማራጭ መገናኛ ማቆም ወሳኝ ነበር። ምስጋና ላስቻሉት ተችሏል። ኢሳት ያለን አንድ ነገር ነው።በጣም ጥሩም እየሰራና ያማራጭ ሜዲያ አገልግሎት እየሰጠ ነው። ስራውን የሚሰሩት ድቅድቅ ባለ አፈናና ዝግ በሆነ አገር ውስጥ ለዛውም በርቀት ሆነው ነው። በአፈናውና በርቀቱ ምክንያት የጠራ መረጃን ለማግኘት የሚኖረውን ችግር ጥሩ አሳቢ የሆነ ሁሉ መገመት አያዳግተውም የሚል እምነት አለን። ያም ሆኖ የጠራና እውነትነት ያለውን መረጃ ለህዝብ ለማቅረብ አዘጋጆቹ ምን ያህል እንደሚጥሩና ጥንቃቄ እንደሚያደርጉ ዝግጅቶቹን ለሚከታተል ሁሉ በደንብ ይታያል። አስገራሚ በሆነ ሁኔታ እስካሁን ተሳክቶላቸው የሚቀርቡት ዝግጅቶች የጠሩና እውነትነት ያላቸው ናቸው። ላንድ መገናኛ ወሳኙና ዋናው ይህ ነው። በተጨማሪም ኢሳት ትግሉ ላይ እያበረከተ ያለው አስተዋጾ ግዙፍ ነው። ስለዚህም ኢሳትን ላይ መረባረብም ልንጠነቀቅለትም ያስፈልጋል። ለኛ ከምንኖርበት ጭቆናና ዘግናኝ በደል አኳያ ትግል ላይ እንዳለ ዜጋ ከተለመደው የመገናኛ አገልግሎት ለየት ባለ በከፊልም ቢሆን በቀጥታ የማታገያ መሳርያም መሆን አለበት ስለምንል አልፎ አልፎ የሚቀርቡት ትችቶች በሙሉ ቅምም አላደረጉንም። የበዙት የቅንጦት ናቸው፤ ሌሎቹ እውነትነት የሌላቸው የቀሩት የተንሸዋረሩ ሆነው ነው ያገኘናቸው።

ለ- የውጪውን አለም ድጋፍ ስለማግኘት።

አውጥተን ስለማንናገረው ነው እንጂ በዋናነት ያደግን ብለው እራሳቸውን ከሚጠሩት አገሮች መንግስታት ላይ ያለን ቅሬታ ለምን ይህን አየነት ግፍና በደል ሲፈጸምብን እያዩ አይረዱንም አይደለም። ለገዳዮቻችና ለጨቋኞቻችን ሙሉ እርዳታ እንደሚያደርጉ ስለምናውቅ ነው። ጥሩነቱ በነዚህ አገራት እጅግ ብዙ ኢትዮጵያዊያን እንኖራለን። እንዴት የሚለውን ዝርዝር እዚህ መናገር አያስፈልግም። እንደ ህዝባዊ እንቢታው እንደሚካሄድበት ሁኔታ ብዛታችንና ልምዳችንን ተጠቅመን እርዳታቸውን እንዲያቆሙ አልፎም ከኛ ወገን እንዲሆኑ ማስገደድ ድረስ ለመሄድ ግን አቅሙ አለን። የመጨረሻው ደረጃ ድረስ ወስደነው ወገናችን በገፍ ሲጨፈጨፍ እያየን ዝም አንልም። በገፍ መታሰር ከሆነ የሚፈልገው በገፍ እንዲያስሩን እንገፋቸዋለን። ሞታችን ከሆነ የሚያሰማን መግደል እሲከጀምሩ ድረስ በያለንበት እናምጻለን። ለመሰማት እራሳችንን መጉዳት ካለብን መጉዳት ድረስ መሄድ አማራጭ እንዳለን ማወቅ አለብን።

በተያያዥ በውጪ አገራት የሚኖረውን ኢትዮጵያዊ በተመለከተ ብዙ የሚባሉ ነገሮች አሉ። ተመችቶት በርገር እየገመጠ የሚኖር። ያገሪቷን ተጨባጭ ሁኔታ የልተረዳ፤ ወጪ ሆኖ አገር ቤት ባሉ ወገኖቹ መሰዋትነት ነጻነትን ማግኘት የሚፈልግ። አገር ውስጥ የሚካሄደው ትግል አሽከርካሪ መሆን የሚፈልግ፤ ትግሉን አጋዥ ብቻ ነው መሆን የሚችለው። እንደውም ሊያደርግ የሚችለው አስተዋፆ ተገድቦ በገንዘብ መርዳትና በዲፕሎማሲው ትግል ዘርፍ ብቻ ነው የመሳሰሉ። ዋናው ምንጫቸው የታወቀ ነው። ያም ሆኖ በውጪም በውስጥም ትግሉ ውስጥ ያሉ ወገኖችም ተመሳሳይነት ያላቸውን ሀሳቦች ሲጋሩ ይሰማል።

በሰፊው አንሄድበትም። ልንከራከርበት እንችላለን በኛ እይታ ግን አንዳቸውም እውነትነት የላቸውም። እነዝህ አይነት ገለጣዎች በውጪ አገራት የሚኖረውን ላገሩ ቀናዊ የሆነ ኢትዮጵያዊ በፍፁም አይገልፁትም። አገር ቤት እያሉ ትግሉ ላይ የድርሻቸውን ሲያደርጉ የነበሩ ሰዎች ወጥተውም ትግሉ ውስጥ እንደምናገኛቸው። በተመሳሳይ በውጪ ሆነው ሲታገሉ የነበሩ ገብተው በቀጥታ ትግሉ ላይ ተሳታፊ እንደሚሆኑ ብዙ አስረጅ መጥራት ይቻላል። በውጪ የሚኖረው እንደ ከዚህ ቀደሞቹ ከቆረጠ በቀጥታ ገብቶ የትኛውም አይነት ትግል ላይ መሳተፍ አሁንም የቻላል። እያደረጉትም ያሉ አሉ።

በዛሬው ጊዜ ከበምንኖርበት የመገናኛ ቴክኖሎጂ አኳያ አንድ ወገናችሁ ውጪ ስለሚኖር ከቆረጠ ያገር ቤቱ ትግል ላይ ላያበርክት የማይችላቸው ጉዳዮች በጣም ትንሽ ናቸው። ማደራጀት ይችላል፤ ማንቃት ይችላል፤ መረጃ መሰብሰብና መልሶ ማቀበል ይችላል። መቦርበር፤ ጠላትን መከፋፈል ይችላል። አገር ቤት ባለው አፈና ምክንያት ምን አልባትም አገር ውስጥ ካላችሁት የትግል አጋሮቹ በተሻለ። አንዳንዴ መሰዋትነቱ ይለያይ ይሆናል እንጂ ሁሉም ግን ያለ መሰዋትነት የሚደረግ ትግል አይደለም። ምክንያቱም ንፁህ አገርና ህዝቡን መውደዱ ብቻ ነው። እንደውም በውጪ ያለው ዜጋ እርቆ እንደመኖሩ እኔን በቀጥታ ስለማያገኘኝ አለማለቱም ምንአልባትም ጥሩ ኢትዮጵያዊነቱን የሚያሳይ ነው።
4- መሰዋትነት ሳይኖረው መደረግ አለበት።

ትግል የሌለበት የሰው ልጅ ታሪክ አልነበረም። በአለም ላይ እስከዛሬም ትግል የማይካሄድበት አገርም የለም። የመሰዋትነቱ አይነት ይለያያል እንጂ መሰዋትነት የሌለውም የትግል አይነትም የለም። ሁሌም ቢሆን ትግል የማይኖርባት ኢትዮጵያ ልትኖር አትችልምና በዚህ አይነት ቅዠት ውስጥ ዛሬም ላላን ይቁረጥ። በርግጥ የኛ ትግል መሰረታዊ ነው። የተለየ ሀሳብ ማራመድ ያስገድላል። መጻፍ መናገር መቃወም ሁሉም ነገረ ሊያስገድል ወይ እዴሜ ልክ ያሳስራል። በዚህ አይነት አገር ውስጥ እየኖርን ዛሬ ገለለተኛ ነን የምንለውም ቢሆን በኛ ሲመጣ ነገ መቃወማችን አይቀርም። ሰውነንና የተለየ ሀሳብ ይኖረናል፤ የማንስማማበት፤ የማንጠቀምበት ወይ ምንጎዳበት ጉዳይ መፈጠሩ አይቀርም። ስለዚህም ዛሬ የሚደረገው ትግል በተቃወምን ቁጥር የማያስገድለን የማያሳስረን በኣጠቃላይ የከፋ መሰዋትነት የማያስከፍለን አገር ለመፍጠር መሆኑን ማወቅ አለብን።

አወዳድረን መሰዋት ስለመሆን የምናወራ ከሆነ እናስላው። የህዝባዊ እንቢተኛነት ትግል ላይ ትኩረት ሰጥተን ማውረቀት ከጀመርን በሗላ ብቻ እንኳ የተከፈለው መሰዋትነት እጅግ ብዙ ነው። ብዙዎች ተገለዋል፤ ብዙዎች ዛሬም ድረስ በእስር እየማቀቁ ነው። በዙዎች ተፈናቅለዋል፤ ብዙዎች አገራቸውን ለቀው መከራ እንዲያዩ ተዳርገዋል። ዜጎች በዘራቸው ምክንያት አገር እያላቸው አገር አልባ እየሆኑ ነው። አገራችን በትግሬ ወያኔዎች ስር እስካለች አይደለም ሌላው አይነት መብት እንደየ እምነታችን በሰላም ፅሎታችንን አድርገን መኖር የማንችልባት ናት።

በተደራጀና መስመር በያዘ መንገድ ሁላችን ትግሉን በጊዜው የሚያስከፈለውን መሰዋትነት ያስከፍል ብለን አድርገነውስ ቢሆንስ ወይ ህዝባዊ አመጹ ላይ እየሰራንበት ቆይተንስ ቢሆን?። ይሄኔ ነጻነታችንን አውጀን ነበር። በዛ ላይ መሰዋትነቱ የፈራነውን ያህል ከባድ ላይሆንም ይችላል። አንዴ የሚያስከፍለውን መሰዋትነት መክፈል ወይ ጨፍጫፊዎችና አረመኔዎች በነገሱበት አገር የዜጎች መገዳደርም ሆነ መሰዋትነቱ ኡደት ነውና ሁለቱም መቀጠሉ አልቀረም። ጥያቄው ይቀጥል ወይ የሚል ነው?። ይቀጥል ካላልን ይገላሉ በሚል ሰበብ ፈቅደን የንጽሀንን ፍጅትና እንግልት እየቆጠርን እንኑር ወደሚል ድምዳሜ የሚያደረስ አይሆንም ወይ?።

በተጨማሪም ህዝባዊ እንቢተኛነቱን በሚመለከት መግደልና ማሰራቸው ሁለት ጎኑ ስለታም የሆነ ቢላም ሊሆን ይችላል። ጭንብል ለባሽ አሸባሪዎችን ማሰወገድን እርግጠኛ ግብ አድርገን በህብረትና በማወቅ ከገባንበት የትግል ጓደኞቻችን መሰዋትነት ያጸናናል ያበዛናል ቁርጠኛ ያደረገናል። ወደፊት እንጂ ወደሗላ እንድንል በጭራሽ አያደርገንም። ያኔ ስለቱ ወደነሱ አብዝቶ መገዝገዝ ይጀምራል። መግደልና ማሰር ለህዝባዊ እንቢታው የጥንካሬ ምንጭ እንጂ ለምንታገላቸው ሀይሎች ጥንካሬ ሁሌ ሊሆን አይችልም።
መግደል ማሰርና ህዝባዊ እንቢተኛነትን በሚመለከት ከሚሰጡት ምክንያቶች አሳማኝ ቁምነግሮችም በርግጥ ነበሩ አሁንም አሉ።

- ሰላማዊና ህጋዊ መሆን አለበት። ትክክል ህዝባዊ እንቢተኛነት ሰላማዊና ህጋዊ ትግል ነው። ገፍተው ከግድያ አልፈው ወደ ጅምላ ፍጅት እስኪያሳድጉትና ወደመከላከሉ እስካልገፉን ድረስ። የገደሏቸውን አንጀታችን እያረረ በክብር በዝተን እየወጣን እየቀበርን የበዛ ትግስትና ጨዋነት ባለበት ለረጅም ጊዜ የምናስኬደው ትግል ነው የሚሆነው።
- መሰዋትነቱን ማሰቀረት አለመቻሉ ታሳቢ ሆኖ ማሳናስ የሚቻልባቸው ስራዎች ሁሉ ቀድመው መሰራትና አማራጮች ሁሉ ላይ ጊዜ ተሰጥቶ ሊታሰብበት ይገባል። ይህም ሁሌም ትክክል ነው። በረግጥም ይህን ማድረግ ይቻላል። መንገዶቹም አሉ።

- ከዚህ በሗላ የተነሳንበትን ከፍጻሜ ሳናደርስ ማቆሙ ጉዳት አለው። የምንታገላቸው ጭንብል ለባሽ መደዴዎች ናቸውና እራስን ከመከላከል አኳያም ሆነ ከታሰበው ግብ ያለጥርጥር ለመድረስ እንደነሱ በተመሳሳይ መሳርያ የያዘ ሀይል ማቆም አለብን የሚለውም ትክክለኛነት አለው። እዚህኛው ቁምነገር ላይ በርግጥ ጅማሮው ጥረቱም አለ። በቂ ርብርቦሽ ግን ዛሬም አይታይም። ህዝባዊ እንቢተኛነቱና እራስን መከላከል በተመለከተ ግን የተላያየ ደረጃዎችና ባህሪያት እንዳሉት ከዚህ ጋር አብሮ መታየት አለበት።
የመጀመርያው ደረጃ ፍጽም ሰላማዊ ህገመንግስታዊም ትግል ነው። ብብዙ ቁጥር እየተሳተፍን ቀላላ ከሆኑ እንቢታዎች የሚጀምር ነው። ከላይ እንዳነሳነው የሚያስሯቸውን እንዲፈቱ እየጠየቅን፤ የገደሏቸውን ጥርሳችንን ነክሰን በዝተን በመቅበር ጥብቅ በሆነ ትእግስትና ስረአት ሰላማዊ በሆነ መንገድ የምናካሂደው ነው።

ከአንደኛው ወደ ሚቀጥለው መሸጋገሩ እነሱ ከሚወድሱት እረምጃ ጋር የተያያዘ ነው። ቀጣይ የሚሆነው ሰረአት አልበኛነታቸውና ጭካኔያቸው በርትቶ የሚገድሏቸውና የሚያስሯቸው ንጽሀን ጓዶቻችን ቁጥር በመቶዎችና በሺዎች መቆጠር የሚጀምርበት ጊዜ ስንደርስ ነው። በዚህ ጊዜ ጩህት፤ እልህና ንዴት ከሁሉም አቅታጫ አየሩን ይሞላዋል። ይህ የሚታይና የሚጨበጥ ስሜት ይሆናል። ያኔ ፍረሀት ቦታ አይኖረውም። እኛ በጣም እየበዛን ስንሄድ እነሱ እያነሱና እየተመናመኑ ይሄዳሉ። አመጻችን በአይነቱም በጥንካሬው ያድጋል። እስከዚህ ድርስ በተቻለ መጠን እንቢታችን ሰላማዊ የሚሰኝ ሆና የሚቀጥል ነው የሚሆነው። መግደሉም ሆነ ማሰሩን ግን ያለ ከፍተኛ ቁጣና አመጽ በቀላሉ ሊያደርጉት የሚቻላቸው አናደርግላቸውም። መቋቋማቸው ከዚሀም ላያልፍ፤ ፍጻሜያቸውም እዚህ ደረጃ ሊሆን ይችላል። በተቻለ መጠን ሁለተኛው ደረጃ ላይ በመሳርያ እራስን ወደመከለካል ሳንሄድ ረዘም ላለ ጊዜ መያዙ ሊጠቅመን ይችላልና በአንክሮ ሊታይ ይገባዋል። መሳርያ የያዘ አካል ስላልነበራቸው በጀመሩት ሰላማዊ አመጽ መጽናት ግድ የሆነባቸው አገራት ተጠቃሚ የሆኑበት አጋጣሚ አለ።

ከዚህም አልፈው ወደ ሶስተኛው ደረጃ ገፍተው መሄድ ከወሰኑ በታዛዥነታቸው ፀንተው አብረዋቸው ያሉትን ይዘው ፍጅት ጀምረዋል ማለት ነው። ነጻነታችንን ለማግኘት በዚህ ውስጥም ማለፍ ካለብን እናልፈዋለን ሌላ አማራጭ የለንም። ያኔ ውሻም ሆነ ሰው የሚንቀሳቀስ ነገር ሁሉ ላይ መተኮስ ስለሚጀምሩ የአመጹ የመጨረሻ ደረጃ ላይ እንደደረስን ይገባናል። በዚህ ጊዜ ላለመገደልና ላለመያዝ መከላከል አማራጭ መሆኑን ሁሉም ይረዳዋል። በርግጥም መከላከሉ መብትም፤ ተፈጥሯዊም ነው። የሰው ልጅ ባይሰለጥንም፤መሳርያም ባይኖረው በጁም በጥርሱም በዶማውም ለመኖር ሲል ይተናናቃል። ሁሉም አካባቢውን ከጭንብል ለባሽ ጨፍጫፊዎች ቢያጸዳ ኢትዮጵያችን ትፀዳለች ድረስ ይሄዳል። ያኔ አካባቢህን አጽዳ፤ ጎረቤትህን እርዳ ነው መፈክሩ የሚሆነው። እዚህ ደረጃ ላይ ስነደርስ ከህዝብ ጎን የሚቆምና መከታ ሊሆን የሚችል የታጠቀና የተደራጀ ሀይል መኖሩ አስፈላጊነቱ አሌ የማይባል ነው። ይህን ማዘጋጀቱ የራሱ ብዙ ችግሮች ሰላሉት ህዝብ እራሱን የሚከላከልበትን መሳርያ ማቅረብ የሚቻልበትን ደረጃ ድረስ መዘጋጀት ከተቻለም ቀላል አይደለም። ስለዚህ ልንረባረብበት የሚገባ ነው።

በአጠቃላይ በህዝባዊ አመጽ ጋር ተያይዞ በየደረጃው ሊፈጠሩ የሚችሉ ነገሮች ላይ የተጠጋ ግምት አሁን ማስቀመጡ ጠቃሚ ነው። በተቻል መጠን የበዛው ህዝብ በተገቢው ሁኔታውን በተረዳበት አመጹን መጀመር ጥሩ ነው። ይህን ማድረጎ ትግሉን አሸናፊ ለማድረግና ስጋቶቻችን ላይ መፍትሄ ቀድሞ ከመስራት አኳያ የራሱ አስተዋጾ አለው። በርግጥ ግምቱ ሰፊና ጥልቅ መሆን አለበት። ሚዛናዊ መሆን አለበት። በኛ በኩል ያለውን ስጋትና አደጋ ብቻ ሳይሆን በምንታገላቸው ክፍሎች በኩል ሊሆን የሚችለውን ባካተተ ተደጋግሞ ቢባልበት ጥሩ ነው።

የአረቡ አቢዮት ከጀመረበትና ይህን አይነቱ የትግል አይነት በአብዛኛው ህዝብ ዘንድ እንደ አማራጭ መታየት ከጀመረ በብዙ መልኩ ያገራችን ተጨባጭ ሁኔታ ተቀይሯል። ምን አልባት ጊዜው ይሆን ወይ?። የስልምና እምነት ተከታይ ወንድሞቻችን ሁለተኛ አመቱን የተጠጋ ሰላማዊ ትግል ለጠቅላላ ህዝባዊ አመፅ መሰረት ይሆን?። ይቀጥላል።
May 01, 2013
dakotareserch2@yahoo.com

ለማንበብ እዚህ ይጫኑ

መግቢያ

በኢትዮጵያ ታሪክ በዓላቶቻችን፤ የገባር ወንዞችን ውሀ እያግበሰበሰ እንደሚጓዘው ዓባይ ወንዛችን፤ በወራት ታዝለው የኡደታቸውን ሂደት በመፈጸም ላይ ሳሉ የሚገጥሟቸውን ክስተቶች እየሰበሰቡ የሚቀጥሉ ናቸው። ክስተቶችም ደስታችንና ሀዘናችንን የምንገልጽባቸው ናቸው። ድርብ በዓላት የሚባል ስምም ተሰጥቷቸውል። ታሪካችንን ሰፊና ጥልቅ ያደረጉት፤ ስነ ጽሑፋችንንም ያዳበሩት አገራችን በዚህ መንገድ በመጓዝ የሰበሰሰበቻቸው ክስተቶች ናቸው። ከውጭ የሚመጣ ጠላትና ከውስጥም የጠላት ወኪል (የባንዳነት ውርስ የተሸከመ የባንዳ ልጅ) ሆኖ የሚሰለፈው መጀመሪያ የሚጋጭ ቀደም ብለው ከነበሩት ክስተቶችን ከተሸከሙት በዓላት ጋራ ነው። ለማንበብ እዚህ ይጫኑ

ለማንበብ እዚህ ይጫኑ