የሰው ልጅ ግላዊና ማህበራዊ ህይወቱን ለማሻሻል እንዲሁም የለት ተለት ህይወቱን የተሻለ ለማድረግ በአካባቢው ወይም በሚኖርበት ሃገር ያለውን አካባቢያዊና መንግስታዊ ስርዓት ጤናማ መሆኑ ግድ ነው። የማህበረሰቡም የለት ተለት ህይወት ከግዜ ወደ ግዜ አስቸጋሪ እየሆነ ሲሄድ የዛ ማህበረሰብ መንግስት ወይም አገዛዝ መቀየሩ አንደኛው መፍትሄ ነው። እንደሁለተኛ አማራጭ መፍትሄ የሚወሰደው ደግሞ የነበረውን አገዛዝ ለአነስተኛና ከፍተኛ ለውጦች ካለው ምቹነት አንፃር ተመዝኖ አስፈላጊ የሚባሉ የፖሊሲና የመንግስታዊ አወቃቀር ለውጦችን መተግበር ሲሆን ይህም በሌሎች ሃገራት ተሞክሮ ጥሩ ሊባል የሚችል ለውጥ ሲያስገኝ ተስተውሏል።

ነገር ግን ወደ ሃገራችን መንግስት ስንመጣ ከበድ ያሉ የማስተካከያ መፍትሄዎችን ቀርቶ እጅግ አነስተኛ የሚባሉ የማህበረሰብ የመብት ጥያቄዎችን እንኳን በሃይል በመጨፍለቅ ሃገራዊና ማህበረሰባዊ ችግሮችን ይበልጡን እያወሳሰበ ይገኛል። ከቅርብ ግዜ ወዲህ የአለማችን ማህበራዊ ፣ ፖለቲካዊና ኢኮኖሚያዊ አቅጣጫ ዝንባሌው ከታችኛ ረድፍ ላይ ያሉትን ሃገራት የወደፊት እጣ ፈንታ እጅግ የከፋ ሊሆን እንደሚችል የሚያሳይ እንድምታ እየተስተዋለበት ነው። ባለፉት ግዜያት በመጨረሻው ረድፍ ላይ ያሉ ሃገራት “ከድህነት ወለል በታች ያሉ ሃገራት” ተብለውም ቢሆን እንደሃገር ይመደቡ ነበር። ነገር ግን ከግዜ ወደ ግዜ ይህ እየተቀየረ እየሄደ ይገኛል። “ከድህነት ወለል በታች ያሉ ሃገራት” ከሚባሉት ውስጥ የተወሰኑ ሃገራት (Failed States) የሚባለው ምድብ ውስጥ እየገቡ ነው። ይህ ማለት በቀላል ማጠቃለያ በሚመጡት ግዜያት እንደ ከዚህ ቀደሙ ደሃ ሃገር ሆኖ መኖር ወደ የማይቻልበት ሁኔታ ውስጥ ገብቷል ማለት ነው። ይህ ደግሞ ከመቼውም ግዜ በላይ የለውጥን አፋጣኝ አስፈላጊነት የሚያመላክት ነው።

ከዚህ ቀደም በአለማችን ታሪክ ለውጥ በተለያዩ መንገዶች ሲካሄድ አስተውለናል ፡ ለአብነት ለመጥቀስም ያህል የነበሩትን ስርዓቶች ጭርሱን በማጥፋት ሌላ ስርዓት መገንባት አንዱ ሲሆን ሌላው ደግሞ በነበረው ስርዓት ላይ ግጭቶችንና የፖለቲካ አመለካከት ልዩነቶችን አቻችሎ ህዝብ በምርጫ መሪዎቹን የሚመርጥበትን መንገድ ማመቻቸት ነው። በወያኔ ኢህአዴግ ስርዓት ህዝባችን በትዕግስትና በጨዋነት የለውጥን አስፈላጊነት አምኖ ፣ የምርጫን ምንነት ተረድቶ ፣ ይሆኑኛል ያላቸውን መሪዎቹን በተስፋ ሲመርጥ በምርጫ 97 አይተናል። ነገር ግን አሁንም ባባሰ መልኩ የህዝብ መብትና ፍላጎት ታፍኖ ህዝብና ሃገር በጉልበተኞች አምባገነናዊ ጭቆና ስር እየማቀቁ ይገኛሉ።

የወያኔ መንግስት ምርጫውን ብቻውን ሊያረገው አይፈልግም የተወሰኑ የፖለቲካ ፓርቲዎች ለይስሙላና ለውጭ ታዛቢዎች ማታለያ እንደሚጠቀመው የሚጠበቅ የተለመደ አካሄዱ ነው። የወያኔ መንግስት ለሃገር እድገትና ለህዝብ መብት መከበር ለሚጥሩ አማራጭ ሃይሎች ህዝብ የሰጣቸውንና የሚገባቸውን የህዝብ ውክልና መቀመጫ በጉልበት እንደነጠቃቸውም የከዚህ ቀደም ተሞክሮን ማስታወስ በቂ ነው። ታዲያ በዚህ መሰል የይስሙላ ምርጫ መሳተፍ ፋይዳው ምንድነው።

መጭው ምርጫን መሳተፍ ማለት ለወያኔ የኢትዮጵያን ህዝብ በረሀብ ፣ በጥማት ፣ በእርዛትና በዲሞክራሲ እጦት አሰቃይ ብሎ ፍቃድ እንደመስጠት ነው፡፡ ምርጫ እኮ የህዝብን ፍላጎት መጠየቂያ ነፃ የሆነ የዲሞክራሲ መንገድ ነው እንጂ የመርሀግበር ማሟያ አይደለም፡፡ እዚህ ላይ ካለፉት ምርጫዎች የተወሰኑ ኩነቶች ማንሳት ይቻላል።

ምርጫ 97፡ በተነጻጻሪ የተሻለ ዲሞክራሲ የታየበት ነው ሲባል ይደመጣል ፡ በእርግጥ ወያኔ ለዲሞክራሲ እና ነፃ ምርጫ ዝግጁ ስለነበር ነው ወይስ ዲሞክራሲያዊ ምርጫ አካሄድኩ ብሎ ደጅ የሚጠናቸውን ምዕራብያዊያንን ልብ ለማለስለስ? ለዚህ ጥያቄ አዘል እይታ እንደ ዋና ማሳያ ሊሆነን የሚችለው ከምርጫው በኋላ ወያኔ የተከተለው የጭካኔ ግድያ ነው፡፡ ስለዚህም ወያኔ ምርጫን መሰረት አድርጎ ለሚመጣ ማንኛውም የስልጣን ሽግግር ያልተዘጋጀና ተቃዋሚዎችም ህዝቡ በሰጣቸው ድምጽ ሳይሆን ወያኔ ተምኖ በሰጣቸው ወንበር ፓርላማ ተቀምጠው ምንም ፋይዳ የሌለው የተቃውሞ እና የድምጸ ተዓቅቦ እጅ የማስቆጠር ስራ ብቻ እንዲሰሩ ስለሚፈልግ ነው፡፡

ምርጫ 2002፡ ወያኔ ከምርጫ 97 ትምህርት በመውሰድ ከምርጫ በኋላ የሚመጣን ስልጣን የማጣት ስጋት ለማስወገድ በከፍተኛ ሁኔታ የተዘጋጀበት ነው፡፡ ይህ ምርጫ ወያኔ ለዲሞክራሲያዊ ምርጫ ያልተዘጋጀ መሆኑ በተጨባጭ የታየበት እና ምርጫ 97 ካጋለጠበት ትክክለኛው ፀረ-ደሞክራሲያዊነት ባህሪው በባሰ መልኩ ምርጫውን ከጅምሩ በቁጥጥር ስር በማዋል ጭቆና እና የመብት ረገጣ እለታዊ የኑሮ አካል በሆነባት ኢትዮጵያ በምርጫ ታሪክ ያልታየ የምርጫ ውጤት ሲመዘገብ አይተናል፡፡

መጭው ምርጫ 2007፡ ምርጫ 2002 በአጠቃላይ ሲታይ ለወያኔው ጨቋኝ መንግስት ከጠበቀው በላይ ቢሆንም ውጤቱ ፀረ-ዲሞክራሲያዊነቱን ፍንትው አድርጎ ያሳየበት መሆኑ ለመጭው ምርጫ 2007 እንዳንድ ማስተካከያ እንደሚያደርግ ይጠበቃል፡፡ ለመገመት ያህልም በመጭው ምርጫ ወያኔ የተወሰኑ ወንበሮችን “ታማኝ” ለሚላቸው ተቃዋሚዎች ለመስጠት የሚያስብ ይመስለኛል፡፡ በዚህ መሰረተ የስልጣን እድሜውን እያራዘመ እና የውሸት ፕሮፓጋንዳውን እየነዛ በኢትዮጵያውያን ላይ ገደብ አልባ ገዥነቱን የሚያውጅ መሆኑ ማንም ሊገነዘበው የሚችል ሀቅ ነው፡፡

ተቃዋሚዎች ለመጭው ምርጫ መዘጋጀት ያለባቸው እንደቀድሞው “ተሳትፎ ለመሸነፍ” ከሆነ የወያኔ የጭቆና አጋፋሪ ከመሆን የዘለለ ለኢትዮጵያ ህዝብ የሚፈይዱለት አንዳች ነገር የለም፡፡ የኢትዮጵያ ተቃዋሚ ፓርቲዎች የህዝቡን ሮሮ፣ ችግር፣ የመብት ረገጣ እና ጭቆና ማዳመጥ እና ታግሎ ህዝብን በማታገል መፍትሄ የማምጣት ታሪካዊ ግዴታ አለባቸው፡፡ ስለዚህም መጭውን ምርጫ አለመሳተፍ ብቻ ሳይሆን ምርጫው እንደቀደሙት ምርጫዎች የህዝብ መብትን ማፈኛ እንዳይሆን መታገል አለባቸው፡፡ ከወያኔ በስተቀር ለማንኛውም የኢትዮጵያን ህዝብ እወክላለው ለሚል ተቃዋሚ ፓርቲ የጋራ አጀንዳ መሆን ያለበት በህዝብ እየተቀለደ የሚደረግ የይስሙላ ምርጫ እንዳይካሄድ ማድረግ ነው፡፡ ሥለዚህም መጭው ምርጫ ከመካሄዱ በፊት የታሰሩ የፖለቲካ መሪዎችና ለህዝብ የቆሙ ሀቀኛ ጋዜጠኞች ሳይፈቱ ፣ ለወያኔ በግልጽ የሚያዳሉና አሳሪ የሆኑትን “የምርጫ ህጎች” ሳይሻሻሉ እንዲሁም ሌሎች መሻሻል ያለባቸው ቅድመ ሁኔታዎች ሳይሟሉ አለመሳተፍ ብቻ ሳይሆን የምርጫው ባለቤት የኢትዮጵያ ህዝብ በመሆኑ ምርጫው እንዳይካሔድ ህዝቡን በነቂስ በመቀስቀስ የታሰበውን የይስሙላ ምርጫ ማስቆም አለባቸው፡፡ አዎ ይህ ምርጫ የኢትዮጵያ ህዝብ እንደ ከዚህ ቀደሙ የሚቀለድበት እንዲሆን ማናችንም መፍቀድ የለብንም፡፡ ይህ ምርጫ እንደ ከዚህ ቀደሞቹ ምርጫዎች ከሚካሄድ ይልቅ ምርጫው ቀርቶ ለአለም የኢትዮጵያዊያንን ችግርና የጨቋኙን የወያኔን ትክክለኛ ማንነት ማሳወቅ እንዲሁም የኢትዮጵያ ህዝብ ትክክለኛ የስልጣን ባለቤትነቱን ወያኔ ባዘጋጀው የይስሙላ ምርጫ ሳይሆን ነፃ የሆነ በሁሉም ተወዳዳሪዎች ይሁንታ ያገኘ አካል በሚያካሂደው እውነተኛ ምርጫ እንዲሆን ማድረግ የሁላችንም ግዴታ ነው፡፡ ምክንያቱም ወያኔ ነጻ ምርጫ ለማካሄድ ጭርሱንም ፍላጎት ስለሌለው።

ውድቀት ለአምባገነኖች !!

ትላንት ሚያዝያ 17 2006 አመሻሽ ላይ ዞን 9 በተሰኘ ድረ ገጽ (ብሎግ) ላይ በሳል ፖለቲካዊና ማህበራዊ ትችቶችን በማቅረብ ከሚታወቁት ፀኀፍት መሀከል 6ቱ ማለትም ማህሌት ፋንታሁን፣ በፍቃዱ ሀይሉ፣ ናትናኤል ፈለቀ፣ ዘላለም ክብረት፣ አጥናፍ ብርሀን፣ አቤል ዋበላ እንዲሁም ጋዜጠኛ ኤዶም ካሳዬ፣ ጋዜጠኛ አስማመው ኃ/ጊዎርጊስ እና ጋዜጠኛ ተስፋለም ወልደየስ በመንግስት የጸጥታ ሀይሎች በቁጥጥር ስር መዋላቸው ይታወቃል፡፡
ግለሰቦቹ በተለያየ ቦታ በየስራ ገበታቸው ላይ እያሉ ሁሉም በተመሳሳይ ሰዓት በፀጥታ ሀይሎች ተይዘው በማዕከላዊ ምርመራ ማዕከል ታስረው የሚገኙ ሲሆን፤ የተለያዩ መረጃዎች እንደሚጠቁሙት እስሩ በደንብ የታሰበበት ነበር፡፡
የኢትዮጵያ ጋዜጠኞች መድረክ ታሳሪዎቹ ታሰሩ ከተባለበት ሰዓትና ደቂቃ ጀምሮ የሚገኙበትን አጠቃላይ ሁኔታ ለማጣራት አየሰራ ሲሆን ፤ እስካሁን በሰበሰበው መረጃ መሰረት ልጆቹን ለእስር የሚያበቃ ምን አይነት ማስረጃ እንደተገኘባቸው ለማወቅ አልቻለም፡፡
ሆኖም ግን ለእስር ከመዳረጋቸው በፊት ከመንግስት ሲርስባቸው በነበረው ህገወጥ ድርጊቶች ምክንያት ለረጅም ጊዜ ስራቸዉን ካቋረጡ በኋላ በቅርቡ ወደ ስራ መመለሳቸዉን ይፋ አድርገው እንደ ነበር ከድረ-ገጻቸው ላይ ለመረዳት ችለናል፡፡ ይህ ጉዳይ እስሩን ይበልጥ አሳሳቢ አድርጎብናል፡፡
ስለሆነም የኢትዮጵያ ጋዜጠኞች መድረክ መንግስት ታሳሪዎቹን ለማሰር ያበቃው ተጨባጭ ማስረጃ ካለ ለህዝብ ይፋ እንዲያደርግ፤ ያ ካልሆነ ግን እስረኞቹን በአስቸኳይ ያለምንም ቅድመ ሁኔታ እንዲለቅ እናሳስባለን፡፡
የኢትዮጵያ ጋዜጠኞች መድረክ
አዲስ አበባ ኢትዮጵያ

ከአርብ ሚያዚያ 17 ቀን ጀምሮ ኢሕአዴግ ዞን ዘጠኝ ተብለው በሶማል ሜዲያ ምህበረሰቡ የሚታወቁ ወጣት ጦማሪያንን ( ብሎገርስ) እንዲሆም ሌሎች ጋዜጠኞችን አይሰረ ሲሆን፣ እስረኞቹ ትልናት እሁድ ሚያዚያ 19 ቀን ፍርድ ቤት እንደቀረቡ ታወቀ።

የታሰሩ የዞን9 አባላትና ጋዜጠኞች ትላንትና እሁድ ሚያዝያ 19 አራዳ ፍርድ ቤት አንደኛ ወንጀል ችሎት የቀረቡት ቤተሰብ ሳይወቅ እና የሕጝ ባለሞያ በሌለበት ሁኔታ ሲሆን፣ ፍርድ ቤቱ የዋስ መብታቸውን ሳይመለከተ ተለዋጭ ቀጠሮ ሰጧል።

እስረኞቹ የታሰሩት ውጨ ሃገር ከሚገኙ የሰብአዊ መብት ድርጅቶች ነን ከሚሉ ጋር በገንዘብና በሃሳብ በመተባበር በማህበረሰብ ሚዲያ ሃገርን ታሸብራላችሁ በሚል ወንጀል ወንጀል ተጠርጥረው እንደሆነም ለማወቅ ተችሏል።

የታሰሪኡት እስረኞች መካከል ሁእቱ ሴቶች ሲሆኑ፣ እስረኞቹ በሶስት ፋይል ለየብቻ ጉዳያችው እንደሚታይም የደረሰን ዘገባ ያመለክታል።

ማህሌት ፋንታሁን አቤል ዋበላ እና በፍቃዱ ሃይሉ ለሚያዚያ 30፣ ጋዜጠኛ ተስፋለም ወልደየስ፣ ጋዜጠኛ አስማማው ሃይለግዮርጊስ እና በአምቦ ዩኒቨርሲቲ የሕግ መምህር የሆነው ዘላለም ክብረት ለሚያዝያ 29 እንዲሁም አጥናፍ ብርሃኔ ኤዶም ካሳየ ናትናኤል ፈለቀ ሚያዝያ 30 ተቀጥረዋል፡፡

“ሁለት ወንድ ልጆቼን በቀይ ሽብር አጥቼያለሁ ። ይሄኛውን ደግሞ በዚህ ላጣው ነው፡፡”ያሉ የአጥናፍ አባት አባት፣ «ኢትዮጵያ እንባችን ካላለቀ ማስቆም አታውቂም?» ሲሉ የተሰማቸውን ሐዘን ገልጸዋል።
የዞን ዘጠኞች እና ጋዜጠኞች መታሰር በሶሻል ሜዲያ ከፍተኛ ተቃዉሞ ያስነሳ ሲሆን፣ በተለይም በበርካት የኢትዮጵያዊያን ፌስቡክ ግሩፖች ትልቅ መወያያ አር፤እስት ሆኗል። ቁጥራቸው እጅግ በጣም በርካታ የሆኑ ኢትዮጵያዊያን አገዛዙ በወሰደው እርምጃ የተሰማቸው ሃዘን እና ብስጭት እየገለጹ ነው።

የዞን ዘጠኝ ስያሜ ለማታዉቁ ፡

“… የዞን 9 የሚለው ስያሜ የመጣው ጋዜጠኛ ርእዮት አለሙን ቃሊቲ እስር ቤት ሊጠይቁ በሄዱበት ሰአት ርእዮት አለሙ ዞን 9 ደህና ነው ? ብላ ስትጠይቃቸው ነበር። ቃሊቲ እስር ቤት ያለው እስከ ዞን 8 ድረስ ነው ከየት አመጣሽው ? አይ ዞን 9 ማለት ከእስር ቤት ውጪ ያለው የኢትዮጵያ ትልቁ እስር ቤትን ነው ብላ መለሰችላቸው።”

ከአዲስነገር ጋዜጣ አባላቶች መሰደድ እንዲሁም ከውብሸት እስክንድር እና ርእዮት አለሙ መታሰር በሁዋላ ለእኔ መንግስት በሚዲያ ሰዎች ላድ በጅምላ የወሰደው ትልቅ ክስረት ነው። ፅሀዮ መንግስታችንም የኢትዮጵያውያን በነፃነት የመኖር ህልም ማጨናገፉን ስራዮ ብሎ ተያዞታል ምን ያህል እንዳዘንኩኝ አላውቅም ብዙ ሰው ስለሀገሬ አያገባኝም ባሉበት ሰአት ስለሚያገባን እንጦምራለን( እንፅፋለን) በማለት ለሀገራቸው ያላቸውን ቀና ነገር በበሳል ብእራቸው ሲፅፉ ነው የማውቀው።

የ ዞን፱ አክቲቪስቶች እንደ አብዛኛው የ ሳይበር ፓለቲከኛ ሆይ ሆይታ ነገር የማይስባቸው እና በሳል እና core የሆኑ ህሳቦች በሚያነሱት ሀሳቦች፣ በምክንያት ላይ የተመሰረተ መንግስትን የሚሞግቱበት አውድ ከፍተው የማይታሰብ የሚመስለውን አሳይተውናል።

ለኔ ሁሌም የሚገርመኝ የቡድኑ ስብስብ ብዙ ሰው እንደሚያስበው ተመሳሳይ እምነት እና አቁዋም ያላቸው አድርጎ አለመሆኑ ነው።ለዞን፰ ዋንኛው መሰባሰቢያቸው እና አንድነታቸው ስለሀገራችን ያገባል ነው። በተረፈ ከአጥባቂ ህይማኖተኛ እስክ ኢ-አማኝ ኤቲስት ድረስ ስብስብ እና በኢትዮጵያ ጉዳይ ላይም የተለያዮ የፖለቲካ አተያይ ያላቸው የወጣት ምሁራን ስብስብ ነው።

በነገራችን ላይ የዞን ፱ የሚለው ስያሜ የመጣው ጋዜጠኛ ርእዮት አለሙን ቃሊቲ እስር ቤት ሊጠይቁ በሄዱበት ሰአት ርእዮት አለሙ ዞን 9 ደህና ነው ? ብላ ስትጠይቃቸው ነበር።
ቃሊቲ እስር ቤት ያለው እስከ ዞን 8 ድረስ ነው ከየት አመጣሽው ? አይ ዞን 9 ማለት ከእስር ቤት ውጪ ያለው የኢትዮጵያ ትልቁ እስር ቤትን ነው ብላ መለሰችላቸው።

ከተወሰኑ ወራቶች ጀምሮ የዞን ፱ እንቅስቃሴ እየተዳከመ እና ጭርሱኑ ቆምዋል በሚባልበት ደረጃ ባለበት ሰአት ብዙ የብሎጉ ተከታታዮች እነሱ ያሉባቸውን ችግሮች ካለመረዳት በመነጨ ሲወቅሱዋቸው ነበር። እነሱም አላሳፈሩንም እንደ ገና እንቅስቃሴያቸውን ጀምረው ነበር ነገር ግን መፃፍ መጀመራቸውን ተከትሎ ለመታሰር ብቅተዋል በኔ በኩል አሁን ችግራቸው ግልፅ የሆነልን ይመስለኛል።

የኢህአዲግ እንቅልፍ የዛፍ ላይ እንቅልፍ ነው እንዳሉት ዶ/ር መረራ መንግስት ስጋ እንዳየ አሞራ እያንዣንበባቸው እንደነበረ ፍንጭ የሚሆነው ከዞን፱ አባላት አንዱ አቤል ዋበላ ከጥቂት ሳምንታት በፊት ባልታወቁ ሰዎች ተባለና ተደብድቦ ላፕቶፑን የተቀማ ጊዜ ነው ይሄ የነገሩ መጀመሪያ መሆኑን አይተን ትንሽም ሳንቆይ። ኢትዮጵያውያንን ሆይ ስለሀገራችሁ የሚያገባኝ እና የምንወስንላችሁ እኔ እንጂ ማንም አይደለም እኔ ባልኩዋችሁ እና በሰፈርንላችሁ ነፃነት ልክ ብቻ ነው ኢትዮጵያ ውስጥ መኖር የምትችሉት በሚል ምክንያት ድርሰት እና ድራማ መስራት በማይደክመው መንግስታችን ተይዘው ታስረዋል።

ለኔ ዞን 9 የአዲሱ ትውልድ ጀግኖች ናቸው በፌስቡክ ላይ እና በብሎጋቸው መንግስትን የሚሞግቱ ምሁራዊ አስገራሚ ፅሁፎችን ፅፈውም አስገርመውናል። እንደ ሳይበሩ አለም ጀግኖች ማንነታቸውን ሳይደብቁ ወይም ውጪ ሀገር ሳይሆኑ ለሀገራችን ይጠቅማል የሚሉትን ሀሳብ እራሳቸውን ከጨካኙ ስርአት ጋር አጋፍጠው ለሀገራችን ይበጃል የሚሉትን ነገር ሲሰነዝሩ ነው የከረሙት። እናም መንግስት ድንጋይ ቢደረድር ህንፃ እና መንግስት ቢሰራ ሀገሩ ሰው ሰው ካልሸተተ ምን ሊረባን ነው።

ፈራን ፈራን ዙበርክ የሰጠንን መብት መጠቀም ፈራን
የምናስበውን እና የምናምነውን ላይ ኮሜንት ማድረግ ፈራን
ለሀገራችን በጎ መመኘት እና መጠየቅ ፈራን
ኢትዮጵያ የኛ ሳትሆን የጥቂቶች መሆንዋን ማየት ፈራን አስፈራን

በመጨረሻም ስለ ጋዜጠኛ ተስፋለም ወልደየስ የረዥም ግዜ የስራ አጋሩ የነበረው ዳኝነት መኮንን ያለውን እዚህ ጋር ብዮ ላጠቃልል
Tesfalem Waldyes ሁሌም ስለ ጋዜጠኝነት አለባዉያን፣ መሠረታውያን፣ ቀመር፣ እና ሥነ ምግባር አብዝቶ የሚጨነቅ ምናልባትም ብቸኛው ጓደኛችን ነው። ጋዜጠኝነት ማለት accuracy, balance, clarity, and neutrality ከኾነ የማውቀው አንድ ጋዜጠኛ ተሥፋዓለም ወልደየስ ነው። የዜና ዘለላ መቁጠር፣ የፊቸር አለላ ማሰባጠር ማን እንዳንተ ተስፍሽ! ዜናና ታሪክ ሲሠራ ቀዳሚ እና ፊተኛው፤ እስረኞችን ቃሊቲ ሄዶ በመጠየቅ ታታሪው ወንድሜ ጠያቂ እና ስንቅ አሳሪ ያብዛልህ። የእስር ቤት ማስታወሻህን ወይም ደብዳቤህን በናፍቆት እጠብቃለሁ።

አበበ ቶላ እንዳለው “በጠቅሉ ኢህአዴግዬ ጠቅላላ ኢትዮጵያን ቆልፎ ”ዴሞክራሲያዊ ፌደራሊያዊ ቃሊቲ እና ቂሊጦ” የምትባል ሃገር ሳይመሰርትልን አትቀርም! ” አበቃሁ

በማዕከላዊ የሚገኙ የዞን ዘጠኝ አባላትን ከተፈቀደልን ለመጠየቅ ካልሆነም የታሰሩበትንና ፍርድ ቤት የሚቀርቡበትን ቀን ለማወቅ ወደ ስፍራው ዛሬ ማለዳ አምርተን ነበር፡፡የጦማርያኑ ቤተሰቦች ያመጡትን ምግብ ከማቀበል ውጪ ማንንም ሊያናግሩ እንደማይችሉ ተነግሯቸው በሐዘን እንዲመለሱ ተደርገዋል፡፡

መቼ ፍርድ ቤት ይቀርባሉ ለሚለው ጥያቄም ኃላፊነት ወስዶ የሚናገር አካል በመጥፋቱ ማወቅ አልተቻለም፡፡ለምን ታሰሩ ለሚለው ጥያቄ ግን መልስ ከተባለ‹‹ ተረጋጉ መስማታችሁ መቼ ይቀራል››ተብሏል፡፡
የበፍቃዱ ኃይሉ እናት መረጃ ለመጠየቅ በማለታቸው በተአምር ወደ ውስጥ እንዲዘልቁ ተፈቀደላቸው፡፡መረጃ ለመጠየቅ ያንን ባለጣውላ ደረጃ እየወጡ ከአንድ ቢሮ ፊት ለፊት ልጃቸው(አቡሽ በማለት ነው የሚጠሩት)ሁለት እጆቹ በካቴና ታስረው አገኙት፡፡በደስታ ተውጠው እላዩ ላይ በመጠምጠም በእናትነት ፍቅር ሳሙት፡፡በድንገት የቢሮው በር በመከፈቱ ግን ከዚህ በላይ ከበፍቄ ጋር መቆየት አልቻሉም፡፡
ጉዞ ወደ ፍርድ ቤት

ዞን ዘጠኞች እሁድ ዕለት ፍርድ ቤት ቀርበዋል የሚል ወሬ ጆሯችን በመድረሱ ጊዩርጊስ ቤተክርስቲያንን ከፊት ለፊቱ ወደ ሚመለከተው አራዳ ፍርድ ቤት አመራን፡፡በመንገዱ ቁልቁል እየወረድን በአዲስ አበባ ፖሊስ ቅጥር ግቢ(በማዕከላዊ) ውስጥ ትልቅ ነጭ ድንኳን ተጥሎ አየን የድግስ አገር እያልን ጉዟችንን ስንቀጥል የፖሊስ የማርሽ ቡድን ሙዚቃውን እያስደመጠ አገኘን፡፡ምክንያቱ ምን ይሆን ስንል አረንጓዴ ኮፊያ ያጠለቁ ቦርጫቸው የከበዳቸው ብዙ ሰዎችን ተመለከትን አይ ቦርጭ ለጤንነት ጠንቅ መሆኑ ተደርሶበት እርምጃ ሊወሰድበት ይሆናል ከማለታችን ትልቅ ባነር የያዙ ፖሊሶችን አየን፡፡ባነሩ የፍትህ ሳምንት እየተከበረ መሆኑን የሚገልጽ ነበር፡፡

ፍትህን የት ነበር የምናውቀው?ምናልባት ባነሩን የያዙት ፖሊሶች ፍትህ ሲሉና እኛ ፍትህ ስንል ካልተለያየ በስተቀር ‹‹ተጠርጥሮ የተያዘ ሰው በቤተሰቦቹ፣በወዳጆቹ፣በጠበቃው፣ በሐኪሙና በሐይማኖት አባቱ›› የመጎብኘት መብቱን ማግኘት ከሚለው የሚጀምር አይደለምን?ታዲያ ፖሊሶቹ አይናቸው ስር በሚገኘው የወንጀል ምርመራ እንዲህ አይነት የፍትህ እጦት እየተከሰተ የትኛውን ሳምንት ይሆን የሚያከብሩት?አጃኢብ አያሰኝም ትላላችሁ፡፡

በአራዳ ፍርድ ቤት የዞን ዘጠኝ ቤተሰቦች ቀድመውን ደርሰው ኖሮ ሁሉን አጣርተው ጠበቁን፡፡ዘጠኙን ወጣቶች በሶስት ምድብ በመክፈል ፖሊስ ክስ በማቅረብ ማንም ባልተገኘበት በትናንትናው ዕለት (በዕለተ እሁድ) ተጨማሪ ጊዜ ቀጠሮ በመጠየቅ ለሚያዚያ 29 እና 30 እንዲያቀርባቸው መታዘዙን አረዱን፡፡ፖሊስ በእሁድ ቀንም ቢሆን ልጆቹን ፍርድ ቤት ማቅረቡ ጥሩ ሊሰኝ ቢችልም ቤተሰቦቻቸው ወይም የልጆቹ ጉዳይ የሚመለከታቸው ሁሉ በተገኙበት በክፍት ችሎት ጉዳያቸው እንዳይታይ ማድረጉ አሳፋሪ ነው፡፡
ከዞን 9 ጦማርያን ጋር ከታሰሩት መካከል የአዲስ ጉዳይ መጽሔት ከፍተኛ አዘጋጅ አስማማው ኃ/ጊዩርጊስና በሶሻል ሚዲያ በተለይም በትዊተር ንቁ ተሳትፎ በማድረግ ያለ ፍርሃት ሐሳቧን ትገልጽ የነበረችው ኤዶም ካህሳይ ትገኝበታለች፡፡አስማማውና ኤዶም በኤፍ ኤም 96 አዲስ መዝናኛ የተሰኘ መረጃ ሰጪና አዝናኝ ፕሮግራም ሲያቀርቡ ቆይተዋል፡፡ኤዶም የአዲስ ዘመን ጋዜጣ ሪፖርተር በመሆንም የቴክኖሎጂ ውጤቶችን የተመለከቱ ዘገባዎችን ትሰራ ነበር፡፡

ጠቅላይ ሚኒስትር ኃይለማርያም የመንግስታቸውን የዘጠኝ ወራት ሪፖርት ለፓርቲያቸው የፓርላማ አባላት ባቀረቡበት ወቅት(ሁለት ወንበር ከማጣታቸው ውጪ) ‹‹ዴሞክራሲያዊነት ለመንግስታቸው የህልውና ጉዳይ ››እንደሆነ አውስተው ነበር፡፡ልማታዊ በመሆናችን ዴሞክራሲን እንደ ትርፍ ነገር የምንቆጥር የሚመስላቸው ተሳስተዋል ለማለት አስረግጠው ሲናገሩ አድምጬ ነበር፡፡

ኢህአዴግ በየጊዜው የፖለቲካ አክሮባት እየሰራ ንፋሱ እንደወሰደው ከአንዱ ርዕዩተ ዓለም ወደ አንዱ እንደፌንጣ እየዘለለ ‹ልማታዊ ወ ዴሞክራሲያዊ ነኝ› እያለን ነው፡፡ድርጅቱ ወይም ጠቅላይ ሚኒስትሩ የሚመሩት መንግስት አንዱን መሆን ሳይችል በእመስላለሁ የፖለቲካ ድርቅና ልማቱም ዴሞክራሲውም አይቅርብኝ እያለ ነው፡፡

ልማትን እንደ ኢህአዴግ ችሮታ ከሚቆጥሩ ሰዎች ጋር መከራከር ትርፉ ልፋት ብቻ ቢሆንም አንድ መንግስት መንገድ፣መኖሪያ ቤት፣ግድብ ሆስፒታል ወይም የትምህርት ተቋማትን ካልሰራ ምኑን መንግስት ተሰኘ?እነዚህን ነገሮች ስለሰራም ሊኮፈስ አይችልም፡፡ምክንያቱም እነዚህ ነገሮች የሚሰሩት ከህዝብ በሚሰበሰብ ግብር አገሪቱ ከድርጅቱ በኋላም ቢሆን በምትከፍለው ዕዳ ነው፡፡ኢህአዴግ እነዚህን ነገሮች ለመስራት ከራሱ የሚያወጣው ሰባራ ሳንቲም የለም፡፡

እነዚህ ነገሮች በሙሉ ራሳቸውን ‹ልማታዊ መንግስት› በማለት በማይጠሩ ገዢ ፓርቲዎች የሚከወኑ መሆናቸውንም መዘንጋት የለብንም፡፡ከልማታዊነት ጎን ለጎን ኢህአዴግ ራሱን የሚመለከተው ‹ዴሞክራሲያዊ› በማድረግ ነው፡፡የተከበሩ አቶ ኃይለማርያም ለድርጅታቸው ዴሞክራሲያዊነት የህልውና ጉዳይ መሆኑን አስረግጠው ነግረውናል፡፡አቶ ኃይለማርያም ይህንን ንግግር ካደሩ በኋላ ባሉት ጥቂት ቀናቶች የተፈጸሙ የኢ-ዲሞክራሲያዊነት መገለጫዎችን እንመልከት፡፡

በወለጋ ዩኒቨርስቲ የሚማሩ የኦሮሞ ተወላጆች ላነሱት ጥያቄ የተሰጣቸው ምላሽ ከጠረጴዛ ዙሪያ ውይይት የተገኘ አልነበረም፡፡ፖሊሶችና ፌደራሎች በተለመደው መንገድ ተማሪዎቹን ቀጠቀጧቸው፣የዞን ዘጠኝ ጦማሪያን ይፋ ባልሆነ መንገድ ተለቃቅመው እስር ቤት ተወረወሩ፣ታሳሪዎቹ በምን ሁኔታ ላይ እንደሚገኙ ለማወቅ የተደረጉ ጥረቶች በሙሉ የተሳኩ አልነበሩም፡፡ህገ መንግስቱ የህጎች ሁሉ የበላይ መሆኑ ቢነገርለትም በተዋረድ በወጣ አዋጅ ተሸሮ ተጠርጣሪዎቹ በዘመዶቻቸው፣በጓደኞቻቸው እንዳይጠየቁ ተደርገዋል፡፡እነዚህ ለመጥቀስ የሞከርኳቸው የጥቂት ቀናት ጥቂት ድርጊቶች ገዢው ፓርቲ ዴሞክራሲያዊነትን የህልውናው ማስጠበቂያ በማድረግ እንደማይወስደው ‹‹ዴሞክራሲያዊነትን››ለምዕራባዊያን ማታለያነት ሊጠቀምበት እንደፈለገ ማሳያ ነው፡፡

ሰማያዊ በመባል የሚታወቀውና የወጣቶች ፓርቲ እንደሆነ አዘወትሮ የሚናገረው ሰማያዊ ፓርቲ ባለፈው ሳምንት በወጣ ልሳኑ ‹‹ነገረ ኢትዮጵያ›› ላይ ታዋቂውን ኢትዮጵያዊ ምሁርና በተቃውሞ ጎራ እድሜ ሳይገድባቸው ትግል እያደረጉ ያሉትን ምሁር ዶ/ር ኃይሉ አርአያን አሰደበ፡፡

የፓርቲው ልሳን ዶ/ር ሃይሉን ለመሳደብ የተገደደው <<የፖለቲካ ፓርቲዎች መሰባሰብ አለባቸው>> የሚል ጠንካራ አቋም ስላላቸው ሲሆን ሳሙኤል አወቀ በተባለ ጎረምሳ ፀኃፊ በኩል <<የማይረቡና ለሀገር የማይጠቅሙ እንዲሁም አጥፊ>> ተብለው መገለፃቸው ብዙዎችን ያሳዘነ ሲሆን ከኢትዮጵያዊ ጨዋነት ያፈነገጠና ለአባቶች ክብር የማይሰጥ ዘመቻ በፓርቲው ልሳን መጀመሩ በህዝቡ ዘንድ ብዙ ጥያቄ አስነስቷል፡፡
ዶ/ር ኃይሉ በኢትዮጵያ ውስጥ ስመጥር ከሆኑ ምሁራን አንዱ ሲሆን መንግስቱ ሃይለማሪያምን ፊትለፊት ‹‹ስልጣን ልቀቅ!›› ብለው የተጋፈጡ፤ ለኢህአዴግ ስርዓት ተቃዋሚ በመሆናቸው ከዩኒቨርስቲ ከተባረሩ ምሁራን አንዱ የሆኑና ተቃውሟቸውን በመግፋት እስካሁን ደከመኝ ሳይሉ እየታገሉ ያሉ አንጋፋ አባት መሆናቸው ይታወቃል፡፡

ምሁሩ ‹‹ተባበሩ ወይ ተሰባበሩ›› የሚለውን ታሪካዊ ጥቅስ ለመጀመሪያ ጊዜ በመናገራቸው የሚታወቁና አሁንም በፓርቲዎች መሰባሰብ ላይ የሚሰሩ ናቸው፡፡ ታዲያ ሰማያዊ ፓርቲ ልሳኑ ላይ ሀሳብን በሀሳብ መመከት ባልቻለ ፀሃፊ ዶክተሩን ርካሽ ፖለቲካ ትርፍ ፈላጊ ተብለው ተገልፀዋል፡፡

በጋዜጣው የተቆጡ ኢትዮጵያዊያን ፓርቲው ምሁሩን በአስቸኳይ ይቅርታ እንዲጠይቅ አሳስበዋል፡፡ ሰማያዊ ፓርቲ በኢትዮጵያ ተቃዋሚ አለ ብለን አንዋሃድም ማለቱ ይታወሳል፡፡

ማዕከላዊን በከፊል አውቀዋለሁ፡፡ ትናንት ሰባት የሚሆኑ ጋዜጠኞች፣ ብሎገሮችና አክቲቪስቶች መታሰራቸውን ተከትሎ ወደ ማእከላዊ መወሰዳቸውን ሰምተናል፡፡ በቀጣዮቹ ቀናት ምን ሊፈጠር እንደሚችል ማሰብ ተገቢ ነው፡፡ ጨለምተኛ ልመስል እችል ይሆናል፤ እውነታው ግን ይኸው ነው፡፡

መጀመሪያ ክሱ ምን ሊሆን ይችላል የሚለው አጓጊ ጥያቄ ነው፡፡ ይህን ለማወቅ ወሳኝ ፍንጭ የሚሰጠው የቤት ፍተሻው ነው፡፡ የታሰሩትን ሰዎች ቤት የሚፈትሹት ፖሊሶችና መርማሪዎች ቤቱን የሚፈትሹት ለጥቂት ሰዓታት (ቢበዛ ለሁለት ሰዓታት) ከሆነና በጣም ብርበራ ያልበዛበት ከሆነ አለቆች በጸረ ሽበር ሕግ ለመክሰስ እንዳላሰቡና አስፈራርተው ብቻ በዋስ ለመልቀቅ እንዳሰቡ ፍንጭ ይሰጣል፡፡ በተቃራኒው ፍተሻው በትንሹ ከስድስት ሰዓታት በላይ የሚረዝምና በቤቱ የተገኘውን ወረቀት፣ መጽሐፍ፣ ሲዲ፣ ኮምፒውተርና ሞባይሎች ምንም ሳይስቀሩ ሰብስቦ የሚያስኬድ ከሆነ ጉዳዩ በጸረ ሽብር ሕግ ከመክሰስ ጋር የተያያዘ እንደሆነ መጠርጠር ያሻል፡፡

ይሄ የቤት ፍተሻ የቤቱን ኮርኒስ መቅደድና ወለሉን እስከመቆፈር ይደርሳል፡፡ በዚህ ጉዳይ ውስጥ ዋናው ግንዘቤ መወሰድ ያለበት ነገር ሰዎቹ የሚያስሩት ማስረጃ በመያዝ ሳይሆን፤ ማስረጃ ሊሆን የሚችል ማንኛውም ነገር በፍተሻው አግኝቶ እሱን ቀባብቶና አሳምሮ መክሰስ መቻላቸው ነው፡፡ ለዚህ ደግሞ መርማሪዎች፣ አቃቢ-ሕጎችና ተሰያሚ ዳኞች ተገናኝተው እንዲያወሩ ስለሚደረግ ነገሩን ፍርድ ቤት አድርሶ የሚፈለገውን ውሳኔ ለማስወሰን መንገዱ ጨርቅ ነው፡፡

በማእከላዊ ከተወሰዱ በኋላ ቢያንስ ለሦስት ቀን ያህል ከቤተሰብም ሆነ ከማንም ጋር መገናኘት የማይተሰብ ነው፡፡ ይህ ታሳሪዎቹንም ሆነ ቤተሰቦቻቸውን የበለጠ ለማደናገጥና የሥነ-ልቦና ጫና ውስጥ ለመክተት ወሳኝ ነው፡፡ ታሳሪዎቹ በቀጥታ የሚወሰዱት ‹‹ጣውላ ክፍል›› ወደሚባሉ የእስር ክፍሎች ነው፡፡ በዚህ ክፍል የሚታሰሩ ሰዎች በ24 ሰዓት ውስጥ ለ15 ደቂቃ ያህል የሚቆይ ጸሀይ መሞቂያና መጸዳጃ ቤት መሄጃ ፈቃድ ይሰጣቸዋል፡፡ እነዚህ ከፍሎች በግምት አራት በአራት ስፋት ያላቸውና ወለላቸው ከጣውላ ጣሪያና ግድግዳቸው ከኮንክሪት የተሠራ ሲሆን፤ ቦታው ሻል ካለው የእስር ኮሪደር ‹‹ሸራተን›› እጅግ ያነሰ ነጻነት ያለውና፤ በጣም ከባሰው ጨለማ ክፍል ‹‹ሳይቤሪያ›› የተሻለ ቦታ ነው፡፡ ምርመራው ለእስር በገቡበት ምሽት ይጀመራል፡፡ የኢ-ሜይልና ሌሎችም አካውንቶች ፓስወርዶች በግድ እንዲሰጡ ይደረግና የኮምፒውተር ሀ ሁ በማያውቁ ‹‹መርማሪዎች›› አካውንታቸው ይበረበራል፡፡

ከዚሁ ጎንለጎን ቀለል ያለ ምርመራና ጥያቄና መልስ ይካሄዳል፡፡ በቀጣዮቹ አምስት እና አስር ቀናት ‹‹ጠቃሚ ውጤት በምርመራ አላገኘንም›› ብለው ካሰቡ ወደ ሌላኛው የእስር ክፍል ወደ ‹‹ሳይቤሪያ›› ያዘዋውሯቸዋል፤ በዚህ ወቅት የምርመራ ስልቱና አጠቃላይ ሁኔታውም ይለወጣል፡፡ ታስረው መቆየት ‹‹አለባቸው›› ወይም ‹‹የለባቸውም›› የሚለውን የሚወስኑት በዚህ ጊዜ ነው፡፡ ውሳኔው ይፈቱ ከሆነ ወደ ‹‹ሸራተን›› የእስር ክፍል ያዘዋውሯቸዋል፡፡ ይህ ከቤተሰብ ጋር መገናኘት የሚያስችል የእስር ቦታ ሲሆን፣ በጊቢው ካሉት የእስር ክፍሎች ሁሉ የተሻለ አንጻራዊ ‹‹ነጻነት›› ያለው ነው፡፡

በጥቅሉ ሳይቤሪያ ከአንድ ሜትር ስኩዌር ብዙም የማይበልጥ፣ ጨለማ፣ በጣም ቀዝቃዛና አምስት ቀናት ቢቆዩቡት መላው አካልን ወደ አመድነት (ነጭነት) የሚለውጥ ዘግናኝ ቦታ ነው፡፡ በዚህ እስር ክፍል ውስጥ ሰዎች የሚታሰሩት ያላደረጉትን ነገር አድርገናል ብለው እንዲያምኑ ወይም የያዙትን ‹‹ሚስጥር›› ‹‹እንዲያወጡ›› ነው፡፡ በዚህ ክፍል የሚታሰሩ እስረኞች አንዳንዴ ያልተቋረጠና እስከ 14 ሰዓት የሚደርስ ምርመራ በፈረቃ በሚቀያየሩ መርማሪዎች ይደረግባቸዋል፡፡ በምርመራው እንደ እስረኛው ሁኔታ የሚላላና የሚጠነክር ድብደባና ቶርች መጠቀም የተለመደ ‹‹አሠራር›› ነው፡፡ ቶርች የተደረጉ ሰዎች ቁስላቸው እስከሚያገግም ከቤተሰብም ሆነ ጠበቃ ጋር ማገናኘት የማይታሰብ ነው፡፡ በእነዚህ ሁሉ ወቅቶች ቤተሰብ ምግብ ለማድረስ፣ ጠበቆች ደንበኞቻቸውን ለማግኘት የሚደርጉት ጥረት ውጤት አልባ ነው፡፡ ኢትዮጵያ ይቺ ነች፡፡

ዘወትር እንደምታደርገው ሁሉ በምታዝበት ሬዲዮ ጣቢያ ጓደኞቿን ሰብስባ ወደ ስቱዲዮ የገባችው ሚሚ ስብሃቱ ከትናንት በስቲያ ጀምሮ ስለታሠሩት ሁለት ጋዜጠኞችና ሰባት ጦማሪዎች ከፖሊስ አገኘኹት ያለችውን መረጃ ጠቅሳ ስታወራ ነበር፡፡ ኢትዮጵያን ለማተራመስ ከሚሠራው አርቲክል ዐሥራ ዘጠኝ ከሚባል ድርጅት ጋር ሲሠሩ ነበር፣ ትልልቅ ሆቴል እየተገናኙ ይወያዩ ነበር፣ ኢትዮጵያ ውስጥ ሰዎችን ያደራጁ ነበር፣ ከሰብዓዊ መብት ተሟጋች ድርጅትና ከአምነስቲ እንዲሁም ከግብጽና ከኤርትራ ገንዘብ ይቀበሉ ነበር፤ የሚሉ ውርጅብኞችን በማውረድ እነርሱን የኢትዮጵያ ጠላት እራሷን ደግሞ የኢትዮጵያ ወዳጅ አድርጋ በመሳል ውንጀላዋን ስታዥጎደጉደው ነበር፡፡

በወሬዋ መካከልም ‹‹ይህ ሞያ ሠላሣ ዓመት ያገለገልኩበት ነው፡፡ ታአማኒነት ያለኝ ጋዜጠኛ ስለመኾኔ ደግሞ የኢትዮጵያ ሕዝብ ምስክር ይኾነኛል›› ስትል ነበር፡፡ እንዳለችው ሠላሳ ዓመት በማገልገል ተአማኒነት የሚገኝ ቢኾንማ ዛሬ ጋዜጠኝነት በዚህ ደረጃ አይዘቅጥም ነበር፡፡ ሚሚ ዛሬ እንኳን ከፖሊስ አገኘኹት ያለችውን መረጃ ዜና አድርጋ ለማቅረብ አልፈለችገም፡፡ ከእርሷ በዕድሜ በጣም የሚያንሱትን በአስተሳሰብ ግን በእጅጉ የሚልቁትን ወጣቶች አገር ሊያተራምሱ ስትል ወቀሰቻቸው፡፡ ኢትዮጵያ እኮ የአንድ ግለሰብ መኖሪያ አይደለችም፡፡ የሁላችንም ናት፣ ሁላችንም ባለመብቶች ነን፡፡ እነዚህ ወጣቶች እዚሁ አገር ቤተሰብ አላቸው አገሪቱ ስትተራመስ ቤተሰቦቻቸው ይተራመሳሉ ቢያንስ እርሱ ያሳስባቸዋል፡፡

በአመለካከት እና በአስተሳሰብ ስለተለዩ አገር ያተራምሳሉ ማለት ትንሽ እንኳን ጉሮሮን ያዝ አያደርግም?

ተስፋለም በዕድሜም በጋዜጠኝነት ልምድም በቁጥር ከእርሷ በእጅጉ ያንሳል፡፡ በአስተሳሰብ፣በጠንካራ ሞራሉ፣ለሞያው በሚሰጠው ትልቅ ክብር ደግሞ ከእርሷ በእጅጉ ይለያልም ይልቃልም፡፡ እርሱ የሞያው ሥነምግባር በሚፈቅድለት ልክ ‹‹ጋዜጠኛ›› ነው፡፡ እርሱ የተቀደደ ጫማ አድርጎ ይሄዳታል እንጂ ለገንዘብ ሲል እስኪሪፕቶውን አያንሻፍፍም፡፡ እንደርሱ ቢኾንማ በጣም ቀላል ነበረለት እኮ እርሷ እንዳለችው ምን አርቲክል 19 ድረስ አስኬደው እርሷ የምታደርገውን ከእርሷ በላይ ማድረግ ይችል ነበርኮ ያውም ከእርሷ በተሻለ፡፡ እርሱ ግን የእዚህ ሰው አይደለም የእርሱ ፍላጎትና ጥረት ኢትዮጵያ ውስጥ ጋዜጠኝነት በራሱ ኃይል እንዲቆም የሚጥር፣ለሞያው ሥነ ምግባርና ክብር አንገቱን የሚሰጥ በማንኛውም መልኩ ትክክለኛ ዘገባ ለማቅረብ የሚጥር ጋዜጠኛ ነው፡፡ ለነገሩ ሚሚ ጋዜጠኞችን ለመወንጀል ስትሽቀዳደም ዛሬ የመጀመሪያዋ አይደለም፡፡ እኔም ከዛሬ በስተቀር ለዚች ሴት ቦታ ሰጥቼያት አላውቅም፡፡

ከእሥረኞቹ አንዱ ማንነቱን አበጥሬ የማውቀው ጋዜጠኛ ተስፋለም ነውና በእንደርሷ ያለች ጋዜጠኛ ተብዬ ‹‹ጋዜጠኛው ተስፋለም›› ሲወነጀል እየሰማኹ ግን መቻል አቃተኝ፡፡ እናም ወ/ሮ ሚሚን እንዲህ ልላት ፈለኩ፤ ‹‹ይቺ አገር የእሷና የጓደኞቿ ብቻ አይደለችም፣ ይቺ አገር እንዲህ ኾናም አትቀርም፤ምናልባት ነገ እርሷ በተስፋለም ቦታ እርሱ ደግሞ በእሷ ቦታ ይኾኑ ይኾናል፤ ዕድሜ ይስጣት እንጂ ያኔ ተስፋለም የጋዜጠኝነትን ሀሁ ጥሩ አድርጎ ያስተምራታል›› አበቃሁ!

በአራት ዪኒቨርሲቲዎች የሚገኙ የኦሮሞ ተማሪዎች የአዲስ አበባ አዲሱን ማስተር ፓልን በመቃወም ተቃዉሞውውቸዉን አሰሙ።

በዉጭ አገር የሚገኘውና በቅርቡ የተቋቋመው የኦሮሞ ሜዲያ ንቴዎርክ ማስተር ፓልኑን በመቃወም ከፍተኛ ቅስቀሳ እያደረገ የነበረና የሚገኝ ሲሆን፣ በዶር መራራ ጉዳናን የሚመራዉ የኦሮሞ ፌዴራሊስት ኮንግረስን ጨመሮ በርካታ የኦሮሞ ድርጅቶች በርካታ የኦሮሞ ድርጅቶች ፕላኑን አዉግዘዋል።

የኦሮሞ ተማሪዎች ም በአምቦ፣ በወለጋ፣ በጂማና በሃረማያ ሰላማዊ በሆነመንገድ ተቃዉሟቸውን ለማሰማት የሞከሩ ሲሆን፣ በአጸፋው የፌዴራል ፖሊስ ከፍተኛ ደብደባ በተማሪዎች ላይ እንዳደረሰ ለማወቅ ችለናል።

በወላጋ ፖሊስ ጥይት የተኮሰ ሲኦሆን በርካቶች እንደቆሰሉ የተቀረኡትን በአካባቢዉ ወዳለ ጫካ እንደትበታተኑ ለማወቅ ተችሏል። በጂማ 11 በአምቦ ደግሞ 15 ተማሪዎች ታስረዋል።
ተማሪዎቹ «ቡራዩ አይሸጥም፣ ሱሉልታ አይሸጠም፣ ለገጣፎ አይሸጥም፣ ኦሮሚያ ለኦሮሞዎች ብቻ ! ፊንፊኔ የኦሮሚያ ናት..» የመሳሰሉ መፈክሮችን ሲያሰሙም ነበር።

በኢትዮጵያ ሕገ መንግስት አዲስ አበባ የኦሮሚያ አካል እንደሆነች በግልጽ የተቀመጠ ሲሆን፣ ኦሮሚያ ከአዲስ አበባ ማግኘት ያለባትን ጥቅም ማግኘት እንደሚኖርባትም ይደነግጋል። የኢትዮዮጵያ ግዛት ባለቤት የኢትዮጵያ ሕዝብ ሳይሆን ብሄረ ብሄረሰቦች እንደሆነ የሚደነግገው ሕገ መንግስቱ፣ ብሄር ብሄረሰቦች ራሳቸው በራስ የማስተዳደር መብት ያዉም እስከመገንጠል እንደሚፈቅድም ይታወቃል።
አገሪቷ በቋንቋ ላይ የተመሰረተ ፌዴራል አወቃቀር እንዲኖራት የተደረገ ሲሆን፣ ይሄም አወቃቀር ያል ሕዝብ ፍቃደ በኦነግ፣ በሕወሃት እና በሻቢያ ተዘጋጅቶ ተግባራዊ እንደሆነ ይታወቃል።
የኦሮሚያ ሕግ መንግስት የኦሮሚያ ባለቤት ኦሮሞ ብቻ እንደሆነ በአንቀጽ ስምንት ባስቀመጠዉ መሰረት፣ ኦሮሞ ያልሆኑ ኢትዮጵያዊያን በኦሮሚያ ዉስጥ እንደ እንግዳ እንደሚታዩም የሚገልጹ በርካታ ክስተቶች አሉ።

በኦሮሞ ተማሪዎች ሲባሉ የነበሩት «ኦሮሚያ የኦሮሞውች ናት። አዲስ አበባ የኦሮሚያ ናት» የሚሉት መፈክሮች፣ አገዛዙ ራሱ በሰነድና በወረቀት የሚቀበለውና የሚስማማበት እንደመሆኑ፣ ተማሪዎች ሰላማዊ በህነ መንገድ በኦሮሚያ ሕግ መንግስት ዬትቀመጠዉን በመድገማቸው መደብደባቸው ፣ አሳፋሪ እና አዛዝኝ እንደሆነም ብዙዎች እየተናገሩ ነው።

ዜጎች በኢሕአደግ ባለስልጣናት ከቅያቸው የሚፈናቀሉት በሁሉም ክልሎች እንደሆነ የገለጹት ያነጋገርናቸው አንድ የፖለቲክ ተንታኝ ፣ በልማት ስም በኦሮሞዎችም ሆነ በማንም ኢትዮጵያውያን ላይ የሚደርስን ግፍ እያንዳንዱ ኢትዮጵያዊ መቃወም እንዳለበት ይናግራሉ። አዲስ አበባን በተመለከተ « አዲስ አበባ ማደጓ አይቀርም። እድገቷ ፍትሃዊ በሆነ መንገድ ይፈጸም መባል ነው እንጂ ያለበት፣ የኦሮሚያ ሬፑብሊክ ወደፊት ለመፍጠር ከሚኖር ፍላጎት የተነሳ የኦሮሚያ ክልል ለምን አነሰች የሚል ጠባብ መከራከሪያ የትም አያደርስም።» ሲሉ ተማሪዎቹም ሆነ በዉጭ ያሉ የኦሮሞ ብሄረተኞች ያለዉን ተጨባጭ እዉነታ እንዲገነዘቡም ይመክራሉ።

የኢህአዴግ ፖለቲካ ዜጎችን የማሰር፣ ዜጎችን የማሸበር ፖለቲክ ነው። በቅርቡ በዞን ዘጠኞችና ጋዜጠኖች ላይ እየተፈጸመ ያለው ግፍ የሚያሳየው፣ አገዛዙ ሃሳብን በሃሳብ መመከት ሲሳነው የሃይል እርምጃ ለመዉሰድ ወደ ኋላ የማይል መሆኑን ነው።

ኢሕአዴግ ሽብርተኝነትን ለመከላከል ሳይሆን፣ ሰላማዊ ዜጎችን ለማሸበር ሲል ያወጣዉ የጸረ-ሽብርተኝነት ሕግ እንዲሰረዝ በመጠየቅ፣ የሚሊዮኖች ድምጽ ንቅናቄ ማድረጉ ይታወሳል። በአገሪቷ ክፍሎች ያሉ ሚሊዮኖች፣ አገዛዙ ዜጎችን በማሸበር እንዲያቆም ቢጠይቁም፣ አገዛዙ፣ የሕዝብን ጥያቄ በመናቅ ፣ አሁንም ኢትዮጵያውያን እየታሰሩ ናቸው። አሁንም የግፍ ቀንበር በሕዝባችን ላይ እየተጨነ ነው።
የአንድነት አባላት፣ ዜጎች ሃሳባቸውን በነጻነት በመግለጻቸው የማይታሰሩባት ኢትዮጵያን ለመገንባት፣ የታሰሩት ያለ አንዳች ቅድመ ሁኔታ እንዲፈቱ ለማድረግ ይታገላል። በተለያዩ እስር ቤቶች የታሰሩ ወገኖቻችን፣ አገዛዙ እንደሚለው ሽብርተኞች ሳይሆኑ ፣ «ለመብታቸው፣ ለነጻነትናቸውና ለአገራቸው ክብርና አንድነት የቆሙ፣ ብርቅዬ የኢትዮጵያ ጀግኖች ናቸው» ብሎ ነው የሚያምነው።

የታሰሩ እስረኞችን ለማበረታታት፣ ለነርሱም መፈታት አንድነት ያለዉን ቁርጠኝነት ለማረጋገጥ፣ ሚያዚያ 19 ቀን 2006 ከፍተኛ የአንድነት አመራር አባላት በሶስት እስር ቤቶች (ቃሊቲ፣ ቂሊንጦና ዝዋይ) አመርተው ነበር።

የአንድነት ሊቀመንበር ኢንጂነር ግዛቸው ሽፈራው፣ አቶ አስቻለው እና አቶ አክሉ ግርግሬ በቃሊት እስክንደር ነጋ፣ ርዮት አለሙን እና አንዱዋለም አራጌን ለመጎነብኘት የሄዱ ሲሆን፣ ርዮት አለሙን እና እስክንደር ቢያገኙም አንድዋለምን ማነጋገር አትችሉም ተብለዉ ተመልሰዋል። ርዮት አለሙ፣ በአካል ጤንነቷ በጥሩ ሁኔታ ላይ ባይገኝም፣ በመንፈሷ ግን በጣም ትልቅ ጥንካሬ እንደሚታይበት ለማረጋገጥም ችለዋል።

በአንድነት ፓርቲ ዋና ጸሃፊ፣ አቶ ስዩም ነገሻ የሚመራ ቡድን ደግሞ ወደ ቂሊንጦ እሥር ቤት ነበር ያመራው። ከአቶ ስዩም ጋር የአዲስ አበባ የአንድነት ምክር ቤት ሰብሳቢ አቶ ዘካርያስ የነበሩ ሲሆን፣ በዚያም የታሰሩ ሰላማዊ የሙስሊም ችግር መፍተሄ አፍላላጊ ኮሚቴ አባላትን አግኝተው አነጋግረዋል።

የአንድነት ሁለቱ ሊቀመናብርት አቶ ተክሌ በቀለን እና አቶ በላይ በፍቅዱን፣ የድርጅት ጉዳይ ሃላፊው አቶ ዳንኤል ተፈራን፣ የሕዝብ ግንኙንተ ክፍል ሃላፊው አቶ ሃብታሙ አያሌውን፣ ደራሲና የአንድነት ደጋፊ አቶ አስራት አብርሃ ያቀፈ ወደ ሃያ የሚጠገ የአንድነት አባላትና ደጋፊዎች ቡድን ፣ ወደ ዝዋይ በማምራት በዚያ ከሚገኙ በርካታ እስረኞች ጋር ሰፊ ዉይይት አድርጓል። ናትናኤል መኮንን፣ አንድዋለም አያሌው፣ ዉብሸት ታዬ፣ ጀነራል አሳምነው፣ ሻምበል የሺዋስ፣ በቀለ ገርባ፣ ኦልባና ለሌሳ፣ አበበ ቀስቶ ..እንዲሁም በርካታ እስረኞች ለማነጋገር ተችሏል።

«እኛ በአካል ብንታሰርም፣ በመንፈሳችን ነጻ ሰዎች ነን። ነጻነት ያለ ትግል፣ ነጻነት ያለ ዋጋ አይገኝም። እኛ ዋና እየከፈልን ያለነው ለነጻነትና ለኢትዮጵያ ነው። ሁሉም ኢትዮጵያዊ ከፍርሃት፣ ከዝምታ፣ ከራስ ወዳድነት ተላቆ የድርሻዉን ለማበርከት ይዘጋጅ» ሲሉም፣ የሕሊና እስረኞች፣ ለኢትዮጵያውያን መልክት አስተላልፈዋል።

የአንድነት ፓርቲ የፊታችን ሚያዚያ 26 ቀን በአዲስ አበባ የ«እሪታ ቀን» በሚል ሰላማዊ ሰልፍ እንደጠራ ይታወቃል። በዚህ ሰልፍ ከዉሃ፣ መብራት፣ ትራንስፖርት ችግር በተጨማሪም፣ በቃሊቲ፣ በቂሊንጦና በዝዋይ ለታሰሩ ጀግኖቻችን፣ እንዲሁም በቅርቡ ደግሞ የአገዛዙ የግፍ በትር ላረፈባቸውና በማእከላዊ ለሚገኙት ለዞን ዘጠኝ ወጣቶችና ጋዜጠኞች ያለንን አጋርነት የምንገልጽበት አጋጣሚ ተመቻችቷል።
ኑ ፣ እንነሳ ! ድምጻችንን እናሰማ ! የግፍ አገዛዝ በቃን እንበል ! ከሚሊዮኖች አንዱ እንሁን!!

የአንድነት ፓርቲ የፊታችን ሚያዚያ 26 ቀን በአዲስ አበባ ሰልፍ እንደሚያደርግ ማሳወቁ ይታወቃል። መጋቢት 28፣ ሚያዚያ 5፣ ሚያዚያ 19 ሰልፍ ለማድረግ ጠይቆ ፣ አስተዳደሩ በተለያዩ ምክንያቶች እውቅና ለመስጠት ፍቃደኛ ባለመሆኑ ነበር አንድነት የሰልፉን ቀን ለሚያዚያ 26 ያስተላለፈው።

አንድነት ፓርቲ የአሜሪካ ውጭ ጉዳይ ሚኒስትር ለሆኑት Jhon Kerry በኢትዮጵያ ውስጥ ያለውን የሰብዓዊ መብት አያያዝ ጉዳይ ደብዳቤ ፃፈ፡፡

ከአንድነት ለዴሞክራሲና ለፍትሕ ፓርቲ(አንድነት) የተሰጠ መግለጫ

ፓርቲያችን አንድነት አበክሮ በተደጋጋሚ እንደገለፀው ኢህአዴግ ያነበረው አምባገን እና ክፉ ስርዓት ዜጎች በተለያየ ጊዜ የሚያነሱትን የሰብዓዊ መብት፣ የዴሞክራሲና የፍትህ ጥያቄ የሚቀለብሰው ወታደራዊ አቅሙን በመጠቀም ነው፡፡ በዚህ ህገ-ወጥ አካሄዱም ስርዓቱን ይቀናቀናሉ የሚላቸውን ጋዜጠኞች፣ ፖለቲከኞች፣ ታዋቂ ሰዎችና በግለሰብ ደረጃ ተቃውሞ የሚያሰሙ ዜጎችን የተለያየ ስም እየሰጠ ወደ እስር ቤት አውርዷል፡፡ እያወረደም ይገኛል፡፡ በርካታ ዜጎች የአስከፊው ስርዓት ሰለባ ሆነዋል፣ እየሆኑም ነው፡፡ ሀገራችን በመነጋገርና በመደማመጥ ችግራችንን የምንፈታባት እንዳትሆን ሆን ተብሎ ለዘላለም መንገስ በሚፈልጉ ባለጊዜዎች የፊጥኝ ታስራ፤ ዜጎቿ እንደቀደመው ስርኣት ሁሉ በእስር እየተሰቃዩ ይገኛሉ፡፡

እንደዜጋም በታላቋ ሀገራችን በሰቆቃ እንድንኖር ተፈርዶብናል፡፡ ኢህአዴግ ዛሬም ከመንገድ አፍሶ መውሰዱን ቀጥሏል፡፡ ማሰቃየቱንና ማንከራተቱን ገፍቶበታል፡፡ ከጊዜና ሁኔታዎች እንደመማር ዛሬም ለስርዓቱ አደጋ ናቸው የተባሉ ወጣቶች ሰበብ እየተፈጠረ ወደ ማሰቃያ ስፍራ እየተጋዙ ነው፡፡ የገዥው ፓርቲ አፈ-ቀላጤ በሆኑ ሚዲያዎች የታሰሩት ክስና ወደፊት የሚታሰሩት እነማን እንደሆኑ እየተነገረ ይገኛል፡፡ ወጣት አመራሮቻችንና አባላትን የማሸማቀቅ ስራ እየተሰራም ነው-ስራ ከሆነ፡፡

የኢህአዴግ መንግስት ሰሞኑንም በግል ተነሳሽነታቸው ለሀገራቸው አስተዋፅኦ ለማድረግ ወስነው በብዕራቸው የሰብኣዊ መብት እንዲከበርና ዴሞክራሲያዊ ስርዓት እንዲረጋገጥ በሚወተውቱ የነበሩ የዞን ዘጠኝ አባላትና ጋዜጠኞች ላይ የወሰደው የእስር ርምጃ የሚያመለክተው በቀጣዩ አመት የሚካሄደውን ምርጫ አስመልክቶ የተወሰደ የማሸማቀቅና የወጣቶችን ጥያቄ ለመቀልበስ የሚፈልገው የአምባገነኑ ስርዓት ተግባር ነው፡፡

ፓርቲያችን ሚያዝያ 17 ቀን 2006 ዓ.ም አመሻሽ ላይ ዞን 9 በተሰኘ ድረ ገጽ (ብሎግ) ላይ በሳል ፖለቲካዊና ማህበራዊ ትችቶችን በማቅረብ ከሚታወቁትን ወጣት ጋዜጠኞች ማህሌት ፋንታሁን፣ በፍቃዱ ሀይሉ፣ ናትናኤል ፈለቀ፣ ዘላለም አጥናፍ ብርሀን፣ አቤል ዋበላ እንዲሁም ጋዜጠኛ ኤዶም ካሳዬ፣ ጋዜጠኛ አስማመው ኃ/ጊዎርጊስ እና ጋዜጠኛ ተስፋለም ወልደየስ በመንግስት የጸጥታ ሀይሎች በቁጥጥር ስር መዋላቸው ሀሳብን በነፃነት የመግለፅ መብት የሚሸረሽር እንደሆነ እናምናለን፡፡ አፈናው ግን ሌሎችን በሺዎች የሚቆጠሩ ብሎገሮችና የሰብዓዊ መብት ተሟጋቾችን እንደሚፈጥር አንጠራጠርም፡፡

የኢህአዴግ መንግስት የከፈተው የእስር ርምጃ በአስቸኳይ እንዲያቆምና የታሰሩትም ታሰሩ ከተባለበት ሰዓትና ደቂቃ ጀምሮ የሚገኙበትን አጠቃላይ ሁኔታ እንዲጣራ፤ መንግስት ያሰረበትን ተጨባጭ ማስረጃ ካለ ለህዝብ ይፋ እንዲያደርግ፤ ያ ካልሆነ ግን እስረኞቹን በአስቸኳይ ያለምንም ቅድመ ሁኔታ እንዲለቅ እናሳስባለን፡፡ ፓርቲያችን ዘላቂው መፍትሄ ዴሞክራሲያዊ ስርዓት ለመፍጠር የሚደረገውን ትግል አፋፍሞ መቀጠልና በሰላማዊ ትግል አምባገነኑን ስርኣት ማስወገድ ብቻ እንደሆነ ያምናል፡፡

ድል የህዝብ ነው!!!

አንድነት ለዴሞክራሲና ለፍትህ ፓርቲ (አንድነት)
ሚያዚያ 21 ቀን 2006 ዓ.ም
አዲስ አበባ

አንጋፋዉ አርቲስት ቴዲ አፍሮ ቅዳሜ ሚያዚያ 18፣ ቀን በጊዮን ሆቴል ከአስር ሺህ ህዝብ በላይ በተገኘበት ፣ የፍቅርና የኢትዮጳይዊነት ጣእም ዜማዎችን ሲያቀርብ እንዳመሸ ከስፍራው የደረሰን ዜና ያመለክታል። ታዋቂዎቹ «ጥቁር ሰው» እና «ያስተሰርያል» የተባሉት ዘፈኖች በሕዝቡ ጥያቄ በድጋሚ እንደዘፈኑ የተደረገ ሲሆን፣ሕዝቡ ዘረኝነትና ክፍፍል፣ ጥላቻና ቂም በቀለ እንደመረረዉ በመገልጸ ፍቅርን፣ የሰላምን እና የአንድነት መልእክት ማስተላለፉን ለማየት ተችሏል።

በተለይም ጥቁር ሰው የተሰኘውን ተወዳጅ ኢትዮጵያዊ ብቻ ሳይሆን አፍሪካዊ ዜማን የሚቃወሙ፣ አንዳንድ አክራሪዎች ፣ በዚህ ጣእመ ዜማ ምክንያት፣ ከፍተኛ የስም ማጥፋት ዘመቻ በአርቲስት ቴዲ አፍሮ ላይ ከማድረጋቸውም በተጨማሪ የቴዲ አፍሮ ኮንሰርቶች ስፖንሰር እንዳየገኙ ከፍተኛ ግፊት ሲአይደርጉ እንደነበረም ይታወቃል።

እንደዚያም ሆኖ፣ ከ10 ሺሆች በላይ የሚሆን ሕዝብ በዚህ ኮንሰርት በመገኘት ለተዲ አፍሮና ለሚዘናቸው ዘፈኖች ያለዉን አክብሮትና አደናቆት ገልጿል። ብዙ ድምጹ በአደባባይ የማይሰማው ሰፊዉ ሕዝብ፣ በኮንሰሩ በመገኘት ፣ ጥላቻን ሳይሆን ፍቅርን፣ ዘረኝነትን ሳይሆን አንድነትን እንደሚፈልግም ያረጋገጠበት ሁኔታ እንደሆነ ለማየት የተቻለው።

ጥቁር ሰው የተሰኘው ዜማ፣ ለኢትዮጵያ ብቻ ሳይሆን ለአፍሪካ ሁሉ ኩራት የሆነውን ታላቁን የአድዋ ድል በአል የሚያስታወስ ከመሆኑም በተጨማሪ፣ አጼ ምንሊክ ፣ ሕዝቡን አስተባብረው የነጭን ኃይል ያንበረከኩ የመጀመሪያዉ ጥቁር መሪ የኢትዮጵያውያን ብቻ ሳይሆኑ የጥቁር ሕዝብ ሁሉ አባት መሆናቸውን ያመላከተ ነው።

«ባልቻ አባቱ አባ ነፍሶ ፣
መድፉን ጣለው ተኩሶ»

ሲል የባልቻ አባ ነፍሶን ጀግንነት የሚያቀነቅነው የጥቁር ሰው ዜማ

«ዳኛው ያሉት አባ መላ ፊት ሃበቴ ቢነግዴ፤
ሰልፉን በጦር አሰመረው ፊት ሆኖ በዘዴ»

ሲል ስለጥበበኛዉ አባ መላም ይጠቅሳል።

የአድዋ ድል ባይኖርም ኖሮ፣ በፈረንጆች እጅ ወድቀን፣ አሁን ያለን መንነታችን አይኖረን እንደነበረ ለመገልጽ «ወይ ሳልለው ብቀር ያኔ፣ እኔን አልሆንም ነበር እኔ» በማለት የጠቁር ሰው ዜማ ይጠናቀቃል።

«ቅርብ ነው አይቀርም የኢትዮጵያ ትንሳኤ፣ በአንድነት ከገባን የፍቅር ሱባኤ
ፍቅር አጥተን እንጂ በርሃብ የተቀጣን፣ አፈሩ ገራገር ምድር መች አሳጣን
በተስፋዉ መሬት እንዲፈጸም ቃሉ፣ ሞፈርን ያዙና ይቅር ተባበሉ»

ሲል ደግሞ ሌላ በድጋሚ እንዲዘፈን በተጠየቀዉ በያስተሰርያል ዜማ የፍቅር፣ የተስፋ መልእክቶችም ተቀንቅነዋል።

የአንድነት ፓርቲ ሚያዚያ 26 ቀን ሰላማዊ ሰልፍ እንዲያደርግ የእውቅና ደብዳቤ እንደሰጠ ቢታወቅም፣ ሕጉን ተከትለው ሰላማዊ የሆነ የቅስቀሳ ሥራ በመስራት ፣ ለሕዝቡ በራሪ ወረቀቶች ሲያድሉ የነበሩ ስድስት የአንድነት አባላት ሜክሲኮ አካባቢ በፖሊስ ተይዘው፣ በእሥር ላይ እንደሚገኙ፣ የሚሊዮኖች ንቅናቄ ግብረ ኃይል አሳወቀ።

አስተዳደሩ ለአንድነት ፓርቲ በሰጠዉ የእውቅና ደብዳቤ ላይ በግልጽ እንደተቀመጠው፣ ለብሄራዊ መረጃና ደህንነት አገልግሎት፣ ለዉስጥ ደህንነት ዋና መምሪያ፣ ለፌደራል ፖሊስ፣ ለአዲስ አበባ አስተዳደር ፖሊስ ኮሚሽን እና ለአዲስ አበባ ከተማ ፍትህ ቢሮ፣ ግልባጭ ደብዳቤ የተላከ ሲሆን፣ ፖሊስ በሚመለከታቸው መስሪያ ቤቶች እውቅና ያገኘን እንቅስቃሴ ለማሰናከል፣ ሰላማዊ ዜጎችን ማገቱ፣ ምን ያህል አንዱ የሚወስነውን ሌላ የሚሽርበት፣ አንዱ የፈቀደዉን ሌላው የሚከለክልበት፣ አገሪቷን ማን እየመራ እንደሆነ የማይታወቅበት ሁኔታ እንዳለ የሚያመለክት መሆኑ ብዙዎች ያናገራሉ።

የታሰሩ እስረኞች ስም ዝርዝር የሚከተለው ናቸው፡
ዳን ኤል ፈይሳ
አበበ ቁምላቸው
አብነት ረጋሳ
ሳሙኤል ይትባረክ
አያክሉህም ጀንበሩ
ዳግማዊ ተሰማ

http://www.abugidainfo.com/amharic/wp-content/uploads/2014/04/udj_permit.jpg

የአሜሪካ የዉጭ ጉዳይ መስሪያ ቤት የታሰሩ ብሎገሮች ጉዳያቸው በአስቸኳይ ታይቶ እንዲፈቱ በቀጥታ የኢትዮዮጵያን መንግስት መጠየቃቸው ቃለ አቀባይዋ ሚሲስ ፕሳኪ ገለጹ።

የኢትዮጵያ መንግስት በሕገ መንግስቱ የተደነገጉትን መብቶች ማክበር እንዳለበት፣ አሜሪካ ጠንካራ አቋም እንደሆኑ የገለጹት ሚሲስ ፕሳኪ፣ የዉጭ ጉዳይ ሚኒስተሩ ጆን ኬሪ በአፍሪካ ጉብኘት ባደረጉበት ጊዜ ሁሉ የሰባአዊ መብት ጉዳይ ባገኙት አጋጣሚ ሁሉ እንደሚያነሱ ለመጠቆም ሞክረዋል።

ከታሰሩ ብሎገሮች መካካል አንዱ ናትናኤል ፈለቀ፣ ከአሜሪካዉ የዉጭ ጉዳይ ሚኒስቴር ጆን ኬሪ ጋር የተነሳዉን ፎቶ ይመልከቱ።

የአሜሪካ የውጭ ጉዳይ መስሪያ ቤት ቃል አቀባይ፣ በኢትዮጵያ ጉድያ ላይ ከተናገሩት ጥቂቱን ከዚህ በታች ማንበብ ይችላሉ።
======================
State Department Daily Briefing regarding Secretary Kerry’s visit to Ethiopia.
MS. PSAKI: Sure, I can. We are aware that six independent bloggers and three independent journalists were detained by Ethiopian police April 25th through 26th. We urge the Government of Ethiopia to expeditiously review the cases of these detainees and promptly release them. We have raised these concerns on the ground directly with the Government of Ethiopia.
And we, of course, reiterate our longstanding concern about the abridgment of the freedom of press and the freedom of expression in Ethiopia, and urge the Government of Ethiopia to fully adhere to its constitutional guarantees. And certainly while the Secretary is there as part of his trip to Africa, he often raises, at every opportunity, issues surrounding human rights, whether it’s media freedoms or equal treatment, freedom of speech, and I expect that will be the case this time as well.

ሚያዚያ 21 ቀን 2006 በአዲስ አበባ በሃያ ሶስቱም ወረዳዎች፣ በራሪ ወረቀቶች ለሕዝቡ በማደል ሰፊ ቅስቀሳዎች ሲደረጉ ዉለዋል። የቅስቀሳ ተግባራትን ለማጨናግፍ ፖሊስ አንዳንድ ቦታ ሲሞክር የተየበትም ሁኔታ የነበረ ሲሆን ስድስት አባላት በሜክሲኮ አካባቢ ታግተዋል።

ከተሰሩ የአንድነት አባላት መካከል ሁለቱ

በቅስቀሳ ላይ

ርዮት አለሙ፣ እስክንድር ነጋ፣ በቀለ ገርባ …….እያልን ስሞችን መዘርዘር እንችላለን። በብዙ ሺሆች የሚቆጠሩ ዜጎች ሕገ ወጥና ኢፍትሃዊ በሆነ መንገድ የታሰሩ ወገኖቻችን፣ ከእሥር እንዲፈቱ ስንጠብቅ ፣ ሌሎች እየተጨመሩ ነው። ከቃሊት ዉጭ ሆነው እነ ርዪትን ሲጎበኙ የነበሩ አሁን እነ ርዮት አለሙን እየተቀላቀሉ ነው።

ዞን ዘጠኞች ፣ እነ ጋዜጠኛ ተስፋአለም፣ የሚጽፉትን ፣ የሚጦምሩትን እኛም አንብበነዋል። በድብቅና በሚስጠር አልነበረም ሃሳባቸውን ሲያካፍሉን የነበሩት። የኛ አካል ናቸው። እነማን እንደሆኑ እናውቃቸዋለን። የታሰሩት ወንጀል ስለፈጸሙ አይደለም። ሕግን ስለጣሱ አይደለም። ወንጀላቸው አገራቸውን መዉደዳቸው ነው። ወንጀላቸው ለፍትህ መቆማቸው ነው። ወንጀላቸው ዶር መራራ ጉዲና እንዳሉት፣ ከጫካ የወጡ ግን ጫካ ከነርሱ ያልወጣ፣ ከበስተጀርባ ሆነው እነ ኃይለማሪያም ደሳለኝ እያዘዙ የሚፈልጡና የሚቆርጡ፣ ከሕግ በላይ የሁኑና ለሕግ ደንታ የሌላቸው፣ ጥቂቶች እንዲጽፉ የማይፈልጉት ስለጻፉ ነው። «እነዚህን የሳይበር ስፔስ አርበኞች ልክ ብናገባቸው፣ ሌሎችም ፈርተው አርፈው ይቀመጣሉ» የሚል የተሳሳተና እንጭጭ አስተሳሰብ ስላላቸው ነው።

እንግዲህ ጥያቄዉ «የኛ ምላሽ ምንድነ ነው የሚሆነው ? » የሚለው ነዉ። የአለም አቀፍ ድርጅቶች፣ በግለሰብ ደረጃ በርካታ ኢትዮጵያዊያን የተሰማንን ሐዘንና ንዴት ገልጸናል። ተገቢም ነው።
ነገር ግን ከዚያ አልፈን መሄድ መቻል ያለብን ይመስለኛል። አገዛዙ ዋና ግቡ እኛን ተስፋ ማስቆረጥ ነው። ገዛ ተጋሩ በሚባል የፓልቶክ ክፍል አንዲት የአገዛዙ ካድሬ ትሁን ደጋፊ፣ አገዛዙ ላይ ችግር ያለንን ሰዎች »ፓፕ ኮርኖች» (ፈንድሻውች) ነበር ያለችን። ለጊዜ ቡፍ ብለን ጸጥ የምንል !!!!!!

እንግዲህ ምርጫዉ የኛ ነው። እኛ ሚሊዮኖች ነን። እነርሱ ጥቂቶች ናቸው። እኛ ፍቅርን ፣ ሰላምን፣ እኩልነትን አንድነት እንፈልጋለን። እነርሱ ዘረኝነትን፣ ጭካኔን፣ ግፍን፣ መከፋፈልን ይሰብካሉ። እኛ አገራችን በፍቅር እንገባ እንላለን። እነርሱ ግን «እኛ ስልጣን ላይ እንቅይ እንጂ አገር ብትፈልግ ትፈራርስ» ይላሉ። እኛ የዘር፣ የሃይማኖት የጾታ፣ የእድሜ ልዩነት ሳይኖር እያንዳንዱን ዜጋ፣ አዎ ከጠ/ሚኒስተሩ ጀመሮ እስከ ሊስትሮዉ ፣ በስብእናዉና በኢትዮጵያዊነቱ የከበረ ነው እንላለን። እነርሱን ግን« ሁሉንም አዋቂዎች፣ ፖሊሱም ፣አቃቢ ሕጉም፣ ዳኛዉም፣ ሕግ አውጭዉም፣ ሕግ አስፈጻሚዉም፣ ኢኮኖሚስቱም፣ ኢንጂነሩም እኛ ብቻ ነን። ሌላዉ ከጫማችን በታች ተረግጦ መቀመጥ ነው ያለበት» ይላሉ።

እንግዲህ ምርጫው የኛ ነው። እንደ እንስሳ አንገታችን ላይ ማነቆ ታስሮ፣ ጥቂቶች እየጎተቱን እና እንደፈለገ እየተጫወቱበን መኖር፣ ወይም ነጻነታችንን ማወጅ። ዝም ብለን ለጊዜው ብቻ የምንጮህ ፓፕኮርኖች መሆን ወይም አለትን የሚሰባብር ዳይናሚት መሆን። እነርሱ እንደሚፈልጉትና እንደሚመኙት፣ ዝምታን መርጠን፣ አፋችን ዘግተን መቀመጥ፣ ወይም ዳግማዊ ዞን ዘጠኖች በመሆን የዞን ዘጠኝ አባላት ቁጥርን ከስድስት፣ ወደ 6 ፣ ስድሳ ሚሊዮን ማሳደግ። የናንተን አላውቅም እኔ ግን፣ ከዛሬ ጀመሮ የዞን ዘጠኝ ኩሩ አባል መሆኔን አረጋግጣለሁ።

መርዛማ እባብ ከመንደፍ ዉጭ፣ ሌላ ነገር አያውቅም። እነርሱም ማሰር እንጂ መፍታት አያውቁም። ዜጎችን ማሸበር እንጂ ማረጋጋት አያውቁም። ኢትዮጵያዉያንን ማዋረድ እንጂ ማክበር አያውቁም። ይህ ለሃያ አመታት የዘለቀ ግፍ አንድ ቦታ ላይ መቆም አለበት። አሁን መቆም አለበት። ሊያስቆሙት የሚችሉት ደግሞ እነ ጆን ኬሪ አይደሉም። እኛ ብቻ ነን።

ሚያዚያ 26 (ሜይ 3 ቀን) በአንድነት ፓርቲ የተዘጋጀ የእሪታ ቀን ሰላማዊ ሰልፍ በአዲስ አበባ ይደረጋል። ከብዙ ግፊትና ትግል በኋላ አስተዳደሩ ለሰልፉ እውቅና ሰጧል። ሰልፉ ሰላማዊና ሕጋዊ ሰልፍ ነው። የምንፈራበትም፣ የምንሸሽበት ምንም ምክንያት የለም። ሰልፍ የምንወጣዉ ለፖለቲከኞች ወይንም ለአንድ ፓርቲ ፣ ወይንም ለሌሎች አይደለም። ሰልፍ የምንወጣው ለራሳችን ስንል ነው። «በአዲስ አበባ እድገት አለ። ዴሞክራሲ አለ። ስርዓቱ መቀጠል አለበት። ኢሕአዴ ጥሩ እያደረገ ነው። የታሰሩትም መታሰራቸው ተገቢ ነው» የሚሉ እነ ሚሚ ስብሀቱ ሰልፍ ባይወጡ ብዙ አያስገርምም። ግን በልባችን ለውጥ እየፈለግን፣ መሰረታዊ የመብትና የኢኮኖሚ ጥያቄዎች እያሉን፣ ዝምታን ከመረጥን ግን፣ ይሄን የሚያዚያ 26ቱን ሰልፍ እንደ አንድ መድረክ ተጠቅመን ድምጻችንን ማሰማት ካቃተን ግን፣ ታዲያ እንዴት እንዘልቀዋለን ?

እንግዲህ ከሚሊዮኖች አንዱ እንሁ እላለሁ። እንዉጣ። ድምጻችንን እናሰማ። መብታችንን እናስከበር። የሕዝብ ጉልበትና አቅም ምን ማለት እንደሆነ እናሳይ። ለታሰሩ አጋርነታችንን እንግለጽ። ስድስት ዞን ዘጠኖች ቢታሰሩ ሚሊዮኖች እንደተወለዱ እናስመስክር።

እመኑኝ የሕዝብን ጉልበት ሊቋቋም የሚችል ማንም ኃይል የለም !!!!!!

የቀድሞው የአረና ፓርቲ የህዝብ ግንኙነት ኃላፊ አቶ አስራት አብርሃምን ጨምሮ ታዋቂ ፖለቲከኞችና ምሁራን አንድነት ፓርቲን መቀላቀላቸውን አንድ አንድነት ፓርቲ ከፍተኛ አመራር ለፍኖተ ነፃነት ገለፁ፡፡
ከፍተኛ አመራሩ ለፍኖተ ነፃነት እንደገለፁት ታዋቂው ወጣት ፖለቲከኛና ደራሲ አቶ አስራት አብርሃ እና ሌሎች በርካታ ወጣት ምሁራን አንድነት ፓርቲን መቀላቀላቸው ፓርቲው በሀገር አቀፍ ደረጃ በሁሉም የህብረተሰብ ክፍል እያገኘ ያለውን ተቀባይነት የሚያሳይ ነው ብለዋል፡፡ አቶ አስራት አብርሃም በቅርቡ በአንድነት ፓርቲን መቀላቀላቸውን በልዩ መርሀግብር ይፋ እንደሚያደርጉ ይጠበቃል፡፡ በሂደት አንድነትን እየተቀላቀሉ ያሉ የሌሎች ታዋቂ ፖለቲከኞችና ምሁራን ስም ይፋ እንደሚደረግም ከፍተኛ አመራሩ ለፍኖተ ነፃነት ተናግረዋል፡፡

አቶ አስራት አብርሃም “ከሀገር በስተጀርባ”፣ “መለስና ግብፅ” ፣ “ፍኖተ ቃዬል” የሚሉና ሌሎች መጽሓፍትን የጻፉ መሆናቸው ይታወቃል፡